Bi 2018 Comzyienj Fwen Minzcuz Vunznoix Guengjsae Riengzlaeng Bauqlwnh

（ciep geizgonq）

Bi 2017《Fwenduzmbaj》 Yauzcuz camgya Guengjsae Veisi 《Gou Yaek Hwnj Sam Nyied Sam》 genjleh fwen ndaej mbawgaj cigdoeng, gyoengq bingzveij yienhciengz cienzbouh ndek ok aendomq diemjhaenh, camgya daizheiq aen ciet angq Guengjsae yienjok fwen, fwenduzmbaj Yauzcuz Hwzsanh ciengqgok Guengjsae.

Geij bi neix daeuj, Fuconh Yauzcuz Swciyen Yenveij、Yen Cwng- fuj gyalai ligdoh bued cienz baujhoh caeuq swnjcienz vwnzva maenhndei conzdungj minzcuz, youq Bwzsah、Lenzsanh caeuq Liujgyah daengj yanghcin laebbaenz dieg swnjcienz feihvuzciz vwnzva yizcanj, caemhcaiq youq yienhsingz cungh siujyoz caeuq youwzyenz cienzdoh fwenduzmbaj Yauzcuz. Seizneix, vunzmbanj Hwz- sanh Cunh gag miz aen daizheiq、bouxswnjcienz caeuq aendoih biuj- yienj bonjfaenh.

Aendoih Fwenleuz Bingzgoj: Baijyienj Aeu Hab “19、60、40”

Youq mwh bi 2018 comzyienj fwen minzcuz vunznoix Guengjsae, aendoih Fwenleuz Bingzgoj Yen Bak- saek Si yienjciengq 《Gvangjsih Ndei Raixcaix》 ndaej ciengjmaenhndei.

Aendoih Fwenleuz Bingzgoj Yen Baksaek Si youz Vangz Gozgvanh、Yiz Yenjgunh、Liengz Couhli、Liu Meijyen 4 boux canghfwen gyoebbaenz, Vangz Gozgvanh dwg boux veicangj Aen Hezvei Fwenleuz Bingzgoj. “Senj geij boux canghfwen neix miz gij yienzaen haenx, geij boux canghfwen neix mboujdanh camgya Cunghyangh Den- sidaiz 《Minzgoh·Cungguek》 cezmuz loegguh, ciengq Fwenleuz Bingzgoj ndei dingq hawj gyoengq bouxyawj daengx guek gvaq, lij miz song boux ok guek camgya yienjciengq gvaq, bi 2011 ndwen 7, gou daengz Daigoz Manguz camgya yienjok hozdung gvaq, bineix ndwen 8, Liu Meijyen riengz duenz camgya ‘rangh ndeu loh ndeu·ciengqgok daengzcog’ 2018 Majlaiz- sihya gozci Vazyinz habciengq doxdax youq Majlaizsihya Gizlungzboh banh haenx, aen duenzhabciengq ak gvaq 30 aen doih camgya doxdax haenx, doeklaeng ndaej ciengjgim ciengj ceiq ndei baez doxdax neix.” Vangz Goz- gvanh doiq gicej naeuz. Vangz Goz- gvanh lwnh gij saeh yinx camgya biujyienj hawj gicej: Ciep ndaej Bak- saek Si Minzyijveij gij dunghcih miz- gven cujciz camgya bi 2018 hozdung comzyienj fwen minzcuz vunznoix Guengjsae le, de roxnyinh yungh vah minzcuz bonjfaenh camgya yienj- ciengq engq hab, doeklaeng de dingh yungh Vahcuengh yienjciengq fwen. Vangz Gozgvanh naemj le haujlai baez, dauqdaej miz lingzganj——Mwh de dingh gij neiyungz swz fwen, giethab “19(gij cingsaenz Cibgouj Daih)、60(Swcigih laebbaenz 60 hopbi、Gozvuyen baecinj fatbouh 《Fueng- anq Sawcuengh》 60 hopbi)、40(gaijgwz hailangh 40 hopbi)” geij cih soq neix, yungh Sawcuengh bienraiz hot Fwencuengh 《Gvangjsih Ndei Raix- caix》 ndeu. Diuh fwen yungh cauh- moq caeuq diuh fwen conzdungj dox giethab, yungh habciengq caeuq doiq ciengq dox giethab, hawj daengx hot fwen ndei dingq youh mizyinx.

Vangz Gozgvanh lwnh gicej, “Mwh gou yawjraen mbawdan cezmuz, yawjraen miz haujlai cezmuz yungh Vahcuengh daeuj yienjciengq, hoeng mbawdan cezmuz yungh Sawcuengh daeuj raiz dan miz aen cezmuz aen- doih dou, neix hix dwg gij diemjrongh dou ha.”

Aendoih Yienjciengq Fwenmyauz Yungzsuij: Damqra Cauhmoq, Bauj- maenh Gij Rengzmingh Hung’ak Fwenmyauz

Ndwen 8 ngoenz 28 daengz ngoenz 29, aendoih yienjciengq Fwenmyauz Yungzsuij Myauzcuz Swciyen gungh 4 boux youz Fung Sauswh nyuenz gizcangj Yungzsuij Minzcuzgiz、canghfwen geq daiq doih haenx camgya bi 2018 comzyienj fwen minzcuz vunznoix Guengjsae, bouxyienjciengq faenbied dwg Liengz Gyanghhoz nyuenzciengq 《Cingz Mbanjmyauz》, Liengz Gveivah nyuenzciengq 《Aenvenz Caeuq Dahsau》, Liengz Cuiyungz nyuenz- ciengq 《Ranz Youq Byayenzbauj》 caeuq Siz Cibingz bouxyienjboq aen Digmyauz, gyoengqde cungj dwg canghfwen camgya Yungzsuij gaiq daih’it fwen doxdax caemhcaiq ndaej ciengj、vunzlai Mbanjmyauz gig haengjgyaez haenx.

Liengz Gyanghhoz、Liengz Gveivah、Liengz Cuiyungz lai baez camgya Fwenmyauz doxdax caemh- caiq ndaej ciengj dem, caeux couhdwg boux mizmingz lauxnyaeq mbanjmbanj rox haenx. Hoeng, aen cezmuz 《Cingz Mbanjmyauz》 geij boux mingzsingh Fwenmyauz Mbanjmyauz caeux couh okmingz camgya yienjciengq haenx dauq mbouj ndaej faensoq sang lumj naemj nauq. Gyoengq bingzveij yienhciengz yawj gyoengqde yienjok le, doiq gyoengqde bingzgyaq dwg: Moqsag hoeng feih Myauz mbouj doh, seizhwng hoeng conzdungj mbouj doh, gamjdoengh vunz hoeng yisuz mbouj doh, ronghlwenq hoeng saenqdaenh mbouj doh. 4 aen haenhndei、4 aen mbouj doh gyoengq bingzveij, hawj gyoengqde doiq bonjfaenh miz roxyiuj moq, ra raen mbouj doh, yawjraen maqmuengh.

Liengz Gyanghhoz naeuz: “Yienznaeuz dou youq gwnz daizheiq ndaw yienh gaenq mizmingz, hoeng ngoenzneix yienjok dwg aen daizheiq hung daengx gih. Danghnaeuz caeux camgya hoihhoengh baenzneix, caeux roxyiuj bingzveij ndei baenzneix, Fwenmyauz Yungzsuij yienjciengq suijbingz caeux couh ndaej daezsang lo.”

Siz Cibingz lwnh gicej, “Fwen Myauzcuz, aenvih gij yienzaen lizsij、vwnzva caeuq vanzging, hab youq gvangjcangz yienj, hoeng mbouj hab aen daizheiq baijyienj hung baenz- neix. Coglaeng, yienjciengq aeu giet- hab gij aeuyungh daizheiq baijyienj, hag gij dinfwngz aendoih yienjciengq fwenbizbaz Sanhgyangh、aendoih biujyienj Hwzsanh Cunh Fuconh、aendoih Fwenleuz Bingzgoj、aendoih yienjciengq Fwencuengh Sanglinz daengj, damqra cauhmoq fuengfap moq、diuzroen moq baijyienj fwen Myauzcuz, baujmaenh gij rengzmingh hung’ak fwen Myauzcuz.”