“Fan najdenz neix couhdwg yungh doenghgij baengz nwnh baenz gok baenz gok neix doxgap nyib baenz, moix giz raizva cungj dwg gij dozanq conzdungj Bouxcuengh, gyoengqde daiqbiuj mizfuk habhoz.” Mboengq- neix, youq ndaw aending canjlanj “yisuz baengzgyoeb caeuq conz- dungj——vunz·doxgaiq·gwndaenj” Gvangjsih Minzcuz Bozvuzgvanj, Vangz Bizyiz canghdajsiuq “ban 80” neix naihsim gejgangj caeuq langhbaij gij dinfwngz siuqbaengznem Boux- cuengh hawj bouxhek yawj.

Doiq Vangz Bizyiz daeuj gangj, gij de gaemdawz haenx mbouj dandan dwg faenh dinfwngz conzdungj ndeu, engq dwg swnjcienz gij gyaez daxmeh, youq ndaw lwed vunz Mbanjcuengh laedoengh, simsoh cix ceiq ndaej hawj vunz simdoengh.

Baez Cim Baez Mae Cienzndenq Gij Raeuj Caencingz

Mbanjranz Vangz Bizyiz dieg- youq Baksaek Si Lungzlinz Gak Cuz Swciyen Sahliz Yangh Nganzcangz Cunh, haenx dwg aen mbanj Boux- cuengh conzdungj ndeu, hoeng youq ndaw geiqndaej seizlwgnyez Vangz Bizyiz, gij daegsaek Bouxcuengh ndaw mbanj caen mbouj yienhda saekdi. “Samcaengzlaeuz” doenghgij buhvaq conzdungj mehmbwk Bouxcuengh ngoenznaengz daenj haenx caeux couh deng naenx youq daej loengx, gij dinfwngz dajsiuq Bouxcuengh hawj vunz hozhaenz gvaq haenx hix deng bouxcoz yawj baenz gij hong baeg vunz youh mbouj canh cienz dem lo.

Caenhguenj gij fungsug conz- dungj menhmenh deng vunzlai lumz bae, hoeng cungj mizmbangj cingz- gamj rag laeg goek maenh cingq laeglemx lienzdaemh roengzbae. Seiz dahlwg okhaq, fan najdenz daxmeh vih de nyinhcaen yunghsim bwh ndei haenx dwg gaiq gyaqcang ceiq dijbauj, gij dozanq miz fuk baez cim baez cim nyib baenz haenx daiqbiuj gij hohfuk ceiq caensim. Youq mwh diuz sengmingh moq doekseng, aennda vunz ranzdaiq gag doenghfwngz nyib baenz haenx couhdwg gij dakbaengh ceiq unqnemq、ceiq maenhrem lwg- nding lo.

Gij siuqbaengznem Bouxcuengh dwg gij dinfwngz seiz cauhguh aennda caeuq najdenz gingciengz yungh haenx. Doenghbaez vunzlai ndaem faiq、dozfaiq、daemjbaengz、nyib guh buhvaq, aenvih diuzgen rwix aeuyungh bi ndeu engqlij geij bi cij guh ndaej baenz dauq buhvaq ndeu, ndigah daegbied insik baengz. Gij guhfap denjhingz siuqbaengznem Bouxcuengh couhdwg yungh gak cungj baengz nwnh daet guh buhvaq lw roengzdaeuj haenx, ciuq gij dajsuenq boux- cauhguh, gyoeb nem baenz gak cungj dozanq, liuxle yungh maesei dinghaed biengok nyib baenz najdenz doenghgij doxgaiq neix.

Mwh ndaej 13 bi, Vangz Bizyiz couh maij hwnj loengh cim loengh mae lo, baez miz seizgan couh bae bomq- yawj beixnuengx roxnaeuz vunzgeq ndaw mbanj siuq doxgaiq. Gij baengz nwnh bonjlaiz couh gig bingzciengz haenx youq ndaw fwngzmbaeu meh- mbwk Bouxcuengh, caeuq gij siuq gyaqciq dox giethab, gyoebbaenz gij doxgaiq moq hawj vunz siengj mbouj daengz, miz le gij sengmingh yisuz gyaeundei miz yinxdaeuz lo.

Dinfwngz Conzdungj Bungzdaengz Gij Yungyiemj Saetcienz

Hoeng, vunz dangdieg cix mbouj ngah cungj “gyaeundei gyoebbaenz” neix, neix hawj Vangz Bizyiz roxnyinh doeknaiq caeuq youheiq. Daegbied dwg bi 2007 gonqlaeng, Yinznanz、Gveicouh doengh gizdieg neix miz vunz daeujdaengz Lungzlinz soucawx baengzdoj caeuq gij huqsiuq Boux- cuengh, bog baengzdoj ndeu dan sou 3 maenz ngaenz, dauq buhvaq Boux- cuengh ndeu cij gai ndaej song sam bak maenz ngaenz.

“Vunz ndaw mbanj cungj mbouj miz gij siengjfap baujhoh gij doxgaiq fwngz guh neix, couh lumj gaiq mbawgyoij nei, baenz bog baenz bog gai okbae hix mbouj rox sim’in.” Mwhhaenx Vangz Bizyiz ngamqngamq baenzranz, miz goenggvan de haeuj- coengh, Vangz Bizyiz hainduj youq dangdieg soucomz gak cungj huqsiuq Bouxcuengh, lij saeqsim yo ndei dem.

Vangz Bizyiz youq Namzningz hai le aen bouq cienmonz gai gij huqsiuq Bouxcuengh fwngz guh ndeu gvaq, maqmuengh engq lai vunz ndaej youq henzgyawj ngonzyawj gij dinfwngz conzdungj Bouxcuengh. Gij cingzgvang yienhsaed caen mbouj ndei saekdi, cauhguh gij huqsiuq gawq sai seizgan youh dwgrengz, hoeng gij vunz caencingq rox huq haenx mbouj miz geijlai, haujlai vunz ciengzseiz dwg cam geijlai cienz gvaqlaeng couh baenq ndang lizhai.

Youq mwh boux vunz ndeu genhciz guh gienh saeh ndeu, cungj yaek bungzdaengz seizgeiz liuh mbouj daengz. Bi 2010, Vangz Bizyiz itcig nyinhcaen yenzgiu gij dinfwngz siuq- baengznem Bouxcuengh neix yungh le ca mbouj geijlai bi ndeu, gag boux dog cauhguh le fan najdenz daih’it yungh baengz nwnh sam gok gyoeb siuq baenz ndeu, dajsuenq louz hawj daeglwg bonjfaenh. Fan najdenz gyaq- ciq neix cungqgyang youz 60 vengq baengz sam gok gyoebbaenz, moix vengq baengz gwnzde yungh maesei siuq guh roxnaeuz yungh baengz nwnh gyoebbaenz duzsip、duzmbaj、heujma doenghgij dozanq conzdungj Boux- cuengh neix.

Mwhhaenx Gvangjsih Minzcuz Bozvuzgvanj cingqngamj cwngcomz gak loih doxgaiq fwngz guh minzcuz vunznoix, fan najdenz Vangz Bizyiz cauhguh neix aenvih dinfwngz ndei、vwnzva neihanz fungfouq deng boz- vuzgvanj sourom, yienghneix Vangz Bizyiz hix baenz le bouxhek ciengzseiz daeuj bozvuzgvanj, ciengzseiz youq ndaw gak loih hozdung feihyiz baij gij dinfwngz siuqbaengznem Bouxcuengh hawj bouxhek yawj.

Cozbinj Ok Guek Cam- gya Canjlanj Saenqsim Saenqhwnj

Bi 2013 ndwen 1 ngoenz 8, ciengz yisuz canjlanj mingz heuh “bienq iq baenz hung: 25 boux cauhguh baengzgyoeb Meijgoz 21 sigij” ndeu youq Gvangjsih Bozvuz- gvanj banh, gij doxgaiq canjlanj dwg lai fan najdenz baengzgyoeb conz- dungj daj 18 aen couh Meijgoz daeuj haenx. Vangz Bizyiz lumz mbouj ndaej gij simcingz saenqdoengh seiz byaij- haeuj aending canjlanj nyinhcaen ngonzyawj yenzgiu gij dozanq raizva caeuq gij dinfwngz cauhguh ndawde haenx.

Vih gijmaz gij najdenz baengz- gyoeb rog guek yienghhaenx deng vunz yawjnaek, engqlij deng dangguh gij huq yisuz daeujdaengz Cungguek canjlanj, gij najdenz baengzgyoeb raeuz bonjfaenh cix bungzdaengz gij yungyiemj saetcienz ne? Vangz Bizyiz gig saenqdoengh, engqgya giendingh gij saenqniemh swnjcienz gij dinfwngz siuqbaengznem Bouxcuengh, fatyiengz gij dinfwngz baengzgyoeb lo.

Bi 2017 ndwen 7, ndaej Gvangj- sih Minzcuz Bozvuzgvanj iucingj, Vangz Bizyiz bae Sinhmwzsihgohcouh Meijgoz guh vwnzva canjyenj, gij doxgaiq riengz ndang ceiq dijbauj de haenx dwg 7 fan najdenz baengzgyoeb daezgonq bi ndeu dajveh, caemhcaiq caeuq mbangj vunzgeq ranznden caeuq vunzsug rox dajsiuq doxcaez ganj guh haenx. Hawj Vangz Bizyiz roxnyinh loeklak dwg, gij najdenz de dajveh haenx ndaej daengz vunz rog guek gyaezmaij, engq youq canjyenj dingzsat le, cungj deng vunz dangdieg yungh gij gyaqcienz 3000~5000 maenz cawx aeu liux.

Bae Meijgoz dauqma le, Vangz Bizyiz saenqsim saenqhwnj, caemh- caiq giva cwkrom 30 fan najdenz cauhnduj le, banh gij canjlanj najdenz baengzgyoeb bouxvunz. De maq- muengh doenggvaq bonjfaenh roengz- rengz, ndaej hawj engq lai vunz yawjraen caeuq roxyiuj gij gyaeundei gij huq fwngz guh conzdungj ndawbiengz youq ndaw ndwenngoenz cwkrom roengzdaeuj haenx.