Daeghaij naemj baenzhwnz lo, naemj dwk aen’uk dotmyagmyag. De caiq naemj roengzbae, lauheiq fatbag bae. Naemj daengz ranzrongh, de gietdingh lo, cangguh vunzngoemx, hawj haex raek ndaw dungx suenq lo. De mbouj cingznyinh gienh saeh neix, byawz rox dwg de haici bungq vunz?

Ngoenzlwenz haetromh 8 diemj lai cung, Daeghaij hwnq congz nguh lo, de ganj seizgan bae hwnjban. Buenq loh, de caij danci baenq gvaq baihgvaz. Byawz liuh, henz roen miz goenglaux ndeu sawqmwh daj loh- vunzbyaij vang gvaqdaeuj, Daeghaij baez vueng, danci doq ngad deng goenglaux. Goenglaux ndang baez ngeng, “bob” naengh roengz gwn namh bae, doengzseiz song fwngz rag dawz aen danci, gaem ndaet mbouj cuengq. Daeghaij caengz raen gvaq seiqmienh, sawqmwh bungq deng yiengh saeh neix, de naj bienq ndang saenz, din fwngz mbouj rox cuengq gizlawz bae. De mbajmbwdmbwd naeuz:“Daxgoeng, doiq mbouj hwnj, gou……gou rex mwngz hwnj- daeuj……” De doq naeuz doq cengj ndei danci, iet fwngz bae rex goenglaux.

Cingq youq seizneix, seiqhenz comz daeuj haujlai vunz, mwngz coenz gou coenz lwnhfodfod. “Yawj ha, caiq miz vunz bungqmeng lo.” “Ngaiz goenglaux beng dawz mbouj cuengq fwngz, deng boihseiz lo.” “Daeg hauxseng neix catsaij lo.” Vunz yied comz yied lai, mbouj miz vunz naeuz Daeghaij bungq vunz, gyoengqvunz dauq bae hongznaeuz goenglaux bungqmeng. Goenglaux deng gik dwk najhoengz hozfoed, de euq naeuz: “Sou mbouj caen da raen, baenzlawz ndaej luenh naeuz ni. Mingzmingz dwg de bungq gou, sou cam de……”

Gyoengqvunz raen Daeghaij gangj mbouj ok vah daeuj, naj mbwng’yauyau, gij yiengh de gig utheiq, engqgya nyinhnaeuz dwg goenglaux bungqmeng lo. Gyoengq- vunz doq ndaq goenglaux doq heuh Daeghaij vaiq deuz. Daeghaij siengj nyoengx aen danci bae, hoeng goenglaux dai mbouj cuengq fwngz. De mwnhsaengsaeng ndwn youq gizhaenx. Miz vunz coi de:“Gaej aeu danci lu, lotdeuz youqgaenj.” Daeg- haij menhmenh cuengq danci, menh- menh ndonj ok geh vunzlai byaij okma. De ngeux gyaeuj muengh doxdauq, geizheih, mbouj raen miz vunz haeujsim de, gyoengqvunz lij youq gizhaenx youh hongznaeuz youh gaebaeh goenglaux haenx. Daeghaij dauq muenxluenh caez lo: Haxbaenh dauqdaej dwg gou bungq deng goenglaux haenx, roxnaeuz dwg de bungqmeng gou?

Daeghaij din fouzfedfed byaij daengz gunghswh hwnjban. De baenz aen banhaet cungj simfouz mbouj dingh. Banringz, de caegcaeg bae daengz gizdieg bungq ci haenx. It dwg siengj yawj danci swhgeij lij youq mbouj, ngeih dwg daeuj yawj goenglaux haenx baenzlawz yiengh lo.

Daeghaij daeuj daengz gijhaenx, caenh raen ci bae ci dauq, vunz byaijfodfod, lumj mbouj ok maz saeh gvaq nei, aen danci de hix mbouj raen ngaeuz lo. Daeghaij gag ngeix, aen danci mbouj dij geijlai cienz, goenglaux haenx mbouj deng sieng couh ndaej. Yienghneix, de cij miz di cuengqsim.

Ngoenz daihngeih, Daeghaij ciuqyiengh bae gunghswh hwnjban. Aenvih ndaw dungx miz saeh, ndigah de gig noix gangj vah, lau loh ok gij saeh de haici bungq vunz. De naengh youq gwnz eij, cangguh nyinhcaen yawj gij bauqbiuj gwnz dennauj, hoeng, mbaw rwz de cix daengj hwnjdaeuj, yaek dingq gyoengq doengzsaeh rox mbouj rox gienh saeh neix, baenzlawz yawj gienh saeh neix, youh lau rox dwg de nyex okdaeuj.

Cingqcaen, mbouj geij nanz, gyoengq doengzsaeh ngeixlwnh hwnjdaeuj lo. “Ya, sou rox lwi? Ngoenzlwenz fatseng gienh saeh ndeu, ndaw baengzyouxgien cungj cienz doh lo.” Boux gangj vah neix, dwg doengzsaeh Dahluenz. Baez raen de hemqyatyat, bouxwnq cungj ngeux gyaeuj cam de:“Gijmaz la?” “Caiq miz vunz bungqmeng lo.” “Gizlawz ha? Hawj gou yawj, hawj gou yawj.” Dahsiu ciengj naeuz. “Gou hix aeu yawj.” Dahvanj hix ceng yawj. Geij dahsau doxcomz gvaqdaeuj yawj. Ndaw bangunghsiz lumj gwnz haw neix nauhyied hwnjdaeuj.

“Naeuz miz boux hauxseng ndeu youq gwnz roen gwih danci, deng goenglaux ndeu bungqmeng, rag dawz de mbouj cuengq, caeklaiq miz vunz bangcoh, daeg hauxseng cij ndaej duetdeuz. Mboujnex, yaek deng hangz aeu bae geijlai cienzyw mbouj rox lu.” “Goenglaux neix caen vaih, ngah cienz lumj ma ngah haex nei, aeu cienz mbouj aeu mingh, nyengh aeu ndang bae bungq ci.” “Ae! Seizneix, mbouj rox dwg vunzlaux bienq vaih, roxnaeuz vunzvaih bienq laux.” “Lumj goenglaux yienghneix baengh bungq- meng ra cienz, wnggai bae gauq de cij deng, gyaeng de geij ngoenz, hawj de roxhit. Mboujnex, bouxlaeng cungj gaen guh, aen sevei neix lij baenzmaz yiengh dem.” Gyoengq doengzsaeh yied lwnh sing yied hung, yied gangj yied hozndat, haeb faenz haeb heuj, bek daiz bek daengq, haemz mbouj ndaej bok naeng goenglaux geij caengz cij ndaej bemxhoz. Daeghaij yied dingq yied hoj youq, gyoengqvunz ndaq goenglaux, dauq lumj ndaq de nei. Bouxwnq mbouj rox, de dang- yienz rox goenglaux deng ien’uengj lo, ndaw sim de lumj deng nonnyaiq raih nei. De dingq mbouj roengzbae lo, laeglemx byaij daengz gehhongh, sup gaemz heiq raezraez ndeu.

Doengxhaemh gwn haeuxcaeuz, Daeghaij daegdaengq doiq bohmeh naeuz:“Mboengqneix, ndaw baengz- youxgien cienz gienh saeh ndeu, sou rox lwi?” “Gijmaz saeh? Yinxdaeuz lwi?” Daxmeh ceiq haengj dingq gij saehrogndoi lo, de byaengq da doq cam. Daeghaij naeuz:“Miz daeg hauxseng ndeu, gwih danci mbouj siujsim, bungqdeng goenglaux ndeu laemx bae. Hauxseng deuz lo, goenglaux dauq deng vunz naeuz de bungqmeng. Sou naeuz goenglaux ien’uengj lwi?” Daxboh doengzcingz naeuz:“Caen bw, goenglaux neix caen hojlienz.” Daxmeh ciep naeuz:“Daj Nanzgingh ok Bungz Yij anq le, gij vunz gyacizgvanh couh bienq lo. Ae, caen mbouj rox baenzlawz guh lo, goenglaux neix cij ndaej dang byaij roen deng daemjndoet ndwi lo.” Caemdingh yaep he, daxboh naeuz:“Ndaej ra raen daeg hauxseng bungq couh baenz lo.” Daxmeh hix naeuz:“Guh vunz yaek miz liengzsim cij baenz. Bungq deng vunzlaux mbouj wnggai deuz.”

Dingq daxboh daxmeh yiengh- neix naeuz, Daeghaij engq roxnyinh swhgeij loek lo, bohmeh ciengzseiz son de guh vunz aeu lauxsaed, caemhcaiq miz liengzsim, bungq vunz duetdeuz de roxnyinh doiq mbouj hwnj bohmeh baenzneix yunghsim son de. Ngeix daengz gijneix, Daeghaij ngaemgyaeuj najmong naeuz:“Daeg hauxseng haenx couhdwg gou.” “A?” Daxboh daxmeh doeksaet dwk ajbak ngubngub, seiq ceh da doxcim myoeg- myoeg. “Gou loek lo, ngoenzlwenz gou bungq deng goenglaux haenx le, bonjlaiz siengj rex de hwnjdaeuj, cazyawj miz mbouj miz sieng. Byawz rox, henzndang miz bang vunz ndeu humx gvaqdaeuj, dauq hongznaeuz goenglaux haenx bungqmeng, lij coi gou vaiq deuz. Gou mbouj rox baenzlawz guh, lau caez, couh cuengq ci buet lo……”

“Caeklaiq byaij lo.” Daxmeh baez bek fajfwngz, angq loh gwnz naj. Daeghaij ngeizvaeg cim daxmeh, aen uk de nyungq lo. Daxmeh youh naeuz:“Cungj saeh neix, gaej nyex haeuj ndang, ndaej deuz couh deuz, ndaej ndoj couh ndoj, deng laih boiz lai cienz, couh nyapnyuk dwgrengz lo.” Daxboh mbouj cuengqsim naeuz:“Hoeng, ngaiz caz okdaeuj, engqgya youqgaenj, mboujcaih boizcienz, lauheiq lij deng gyaeng, baenz- neix……”“Vunzhumxyawj cungj naeuz dwg goenglaux haenx bungq- meng, lau gijmaz.” Daxmeh gat duenh gij vah daxboh, cienq naj doiq Daeghaij naeuz:“Daj seizneix hwnj, mwngz haep bak mbouj ndwet, hawj haex raek ndaw dungx. Rox lwi?” Youq ndaw ranz, daxboh caeuq Daeghaij cungj miz di lau daxmeh. Raen daxmeh maenjgywdgywd, dax- boh mbouj miz vah lo, Daeghaij hix ngaemgyaeuj mbouj ok sing.

Gwn caeuz sat, Daeghaij ma daengz ndaw rug de, hai dennauj, de siengj hwnj vangj bae cazyawj, miz mbouj miz yiengh saeh doxdoengz. De daj song cih “bungqmeng” baez sou, gwnz bingzmu yaepyet diuq ok haujlai sinhvwnz bungqmeng daeuj. De cug diuz cug diemjhai. Mbouj yawj mbouj roxyiuj, baez yawj doeksaetyat.

(caengz sat)