Ndwen 8 ngoenz 28 daengz ngoenz 29, bi 2018 comzyienj fwen minzcuz vunznoix Guengjsae youq Namzningz Si Vujmingz Gih banh. Baez hozdung comzyienj fwen neix yinx daeuj Namzningz、Liujcouh、Gveilinz、Gveigangj、Hocouh、Hozciz、Baksaek、Ginhcouh、Fangzcwngzgangj、Cungzcoj daengj 10 aen si 23 aen doih fwen minzcuz vunznoix caeuq Guengjsae Sawcuengh Hagdangz、Guengjsae Vaigozyij Yozyen、canghgo ndawbiengz Bouxcuengh Luz Yiz daengj 7 aen cezmuz daegbied iucingj camgya yienjok, gungh 31 aen cezmuz、180 lai boux canghfwen minzcuz vunznoix camgya yienjok, neix bonjbauq bauqlwnh gvaq. Mboengqneix, gicej youh caijfangj 4 aen doih fwen ndaw 23 aen doih fwen neix, dingq gyoengqde gangj gij goj mizyinx.

Aendoih Yienjciengq Fwenbizbaz Sanhgyangh: Swnjcienz Minzcuz Vwnzva Maenhndei Mbanjdung

Youq gwnz bi 2018 comzyienj fwen minzcuz vunznoix Guengjsae, aendoih yienjciengq fwenbizbaz Sanhgyangh yienjciengq ndaej ndei aeundaej mingz daih’it baez comzyienj doxdax neix.

Aendoih yienjciengq neix dwg aen “gyoebhab bohlwg Dungcuz”, youz bohlwg sam boux gyoebbaenz, daxboh Siz Mingzveih、 dahhung Siz Yez、 dah’iq Siz Ginhcingh. Siz Mingzveih bi 1980 doekseng youq Sanhgyangh Dungcuz Swciyen Liengzgouj Yangh Liengzgouj Cunh. De dwg bouxyienj nyuenz Sanhgyangh Dungcuz Swciyen Dungcuz Yisuzdonz, bi 2012 aen yisuzdonz neix gaij baenz Aen Cungsim Baujhoh Caeuq Hwngfat Feihvuzciz Vwnzva Yizcanj Sanhgyangh Dungcuz Swciyen, seizneix de dwg bouxguhhong aen cungsim feihyiz neix.

Siz Mingzveih 11 bi hainduj hag fwenbizbaz Dungcuz, cujyau dwg canghfwen ndaw mbanj son de fwenbizbaz, doxboh、aulungz de hix rox fwenbizbaz Dungcuz, gyoengqde cungj son Siz Mingzveih gvaq.

Bi 2013 ndwen 9, Siz Mingzveih daiq dahlwg hung hainduj gyoebbaenz aen “gyoebhab bohlwg Dungcuz”, cujyau yienjciengq fwenbizba z、golaux Dungcuz、go’iq Dungcuz. Doengzbi, “gyoebhab bohlwg Dungcuz” camgya ciengqyienj fwen minzcuz youz Guengjsae Namzningz Bozvuzgvanj cawjbanh haenx, ndaej sam daengjciengj; bi 2015 ndwen 12, “gyoebhab bohlwg Dungcuz” camgya Liujcouh Si cezmuz maenhndei doxdax ndaej ciengj yienjciengq ceiq ndei; “gyoebhab bohlwg Dungcuz” lai baez camgya Guengjsae Densidaiz “sing ndeu gyaez maij·Diegdeih fwen mbinfoen” lanzmoeg loegguh. Geij bi neix daeuj lai baez ndaej ciengj gih、si、yienh lai aen hozdung doxdax gvaq. Bi 2017 ndwen 12 doxdaeuj, dah’iq gyahaeuj aen gyoebhab. Aen “gyoebhab bohlwg Dungcuz” neix vih swnjcienz caeuq cienzboq minzcuz vwnzva Sanhgyangh guh’ok gungyen.

Mwh gicej caijfangj yawjraen, aen “gyoebhab bohlwg Dungcuz” neix miz aen daegdiemj hawj vunz cimyawj he: Song dah lwg maj ndaej gig gyaeundei, daenj buhvaq minzcuz engq dwggyaez hawj vunz maez, daxboh bouxyienj okndang neix hix gig baenzmbauq, ndigah aen gyoebhab neix baez hwnj daiz couh yinx ndaej haujlai bouxyawj, bingzveij hix gya faen hawj gyoengqde.

“Dou ceiq yinx vunz lijdwg gij sing fwen Dungcuz nyuenz miz neix.” Siz Mingzveih riu naeuz, “Baenz lai bi doxdaeuj youq mwh yienjciengq fwen Dungcuz, dou bungzdaengz haujlai vunz bangcoh gvaq dou caeuq gij saeh miz yiyi. Lumjbaenz ndaej daengz Denz Cingh bouxyinhyozgyah ciengqgo mizmingz、lauxhangz baujhoh feihvuzciz vwnzva yizcanj diemjbingz caeuq dajyinx. Denz Cingh naeuz, aeu yawjnaek hwngfat fwen minzcuz bonjfaenh, aeu fwen minzcuz bonjfaenh yienj ndei, swnjcienz ndei engq youqgaenj.” Dajneix, aen gyoebhab neix genhciz yienjciengq fwen Dungcuz nyuenz miz neix, gyoengqde nyinhnaeuz baenzneix engq miz leih swnjcienz caeuq hwngfat fwen minzcuz bonjfaenh.

Aendoih Biujyienj Hwzsanh Cunh Fuconh: Daihdaih Doxcienz, Louz Gij Cingz Mbanj

Youq gwnz bi 2018 comzyienj fwen minzcuz vunznoix Guengjsae, hot fwen 《Fwenduzmbaj Yauzcuz》 aendoih biujyienj Hwzsanh Cunh Fuconh Yauzcuz Swciyen yienjciengq haenx ndaej daengz yienhciengz bingzveij caeuq bouxyawj haenhndei.

Fwenduzmbaj Yauzcuz dwg gij fwen ndawbiengz Fuconh vunzlai dangdieg gangj cingz cienz cingz、aj ak cienzciengq haenx, gyoengq canghfwen youq gak giz mbouj doengz guh hong roxnaeuz ngoenzciet couxbawx baehaq begsaeh ciengq haenx, ndei dingq dangqmaz, gyoengqde ciengq ndwi roxnaeuz doiq ciengq, gig miz minzcuz daegsaek, ndaej daengz gyoengq vunzlai haengjgyaez. Fuconh Yauzcuz Swciyen Bwzsanh Cin Hwzsanh Cunh dwg dieggoek、dieg swnjcienz fwenduzmbaj, ndaw mbanj miz gyoengq beixnuengx Yauzcuz.

Bi 2016 ndwen 6 ngoenz 24, 《Fwenduzmbaj》 Yauzcuz wngq Cunghyangh Densidaiz 《Hoihhung Minzgoh Cungguek》 cezmuzcuj iucingj, gyoengq bouxguhnaz dieggoek caeuq dieg swnjceinz fwenduzmbaj Fuconh guekgya gaep feihvuzciz vwnzva yizcanj、hagseng yienh minzcuz cunghyoz、gyoengq bouxyienj yienh vwnzva’gvanj gungh 180 lai boux, bae Baekging loegguh cezmuz, hawj fwenduzmbaj sing ndei neix ciengq ok Mbanjyauz, ciengq daengz Baekging, ciengqgok daengx guek.（caengz sat）