Bi’ndwen 80 bi, gig yungzheih hawj vunz naemj daengz gij yiengh bi’ndwen geq ndangdaej nyieg, din fwngz mbouj riengj neix. Hoeng Liuz Ginjyi boux vunzlaux Mbanjdungzloz Sinhcunh Sahcingj Gaihdau Gyanghnanz Gih Namzningz Si neix, ciuqyiengh dwg cingsaenz gvaekgvaek. De miznaj dwk naeuz, bonjfaenh cingsaenz ndei, dwg daj ndaw maij gij hozdung vwnzyi aeundaej ndeicawq.

Bi’gvaq byaibi, Liuz Ginjyi daiqdaeuz cujciz laebguh le Aenduenz Yisuz Vahsengj Sinhcenz Ndawbiengz Gyanghnanz Namzningz Si aeu Mbanjdungzloz Sinhcunh guh haedsim haenx. Baihlaj aen duenz neix miz aen doihfwen Vahsengj ndeu、aen duenz heiq goengsae ndeu、sam aen doih diuqfoux、aen doih habciengq ndeu, gij vunz dinghmaenh miz daengz 80 lai boux, hoeng gij vunz maij yisuz riuzdoengh caeuqfaenh haenx cix lai daengz mbouj miz banhfap suenq okdaeuj.

Liuz Ginjyi boux vunzlaux neix naeuz, Gyanghnanz Gih dwg diegcomzyouq gij vunz gangj Vahsengj, vunzlai giekdaej vwnzva Vahsengj conzdungj maenh, de daj iq couh maij fwen Vahsengj vanzlij caeuq bangeq doxcaez ciengq doeg, engqlij ciengzseiz cauhguh fwen sei Vahsengj dem. Gyoeblaeb aenduenz yisuz, couhdwg vunz ndaw mbanj iugouz, gij vunz aenduenz yisuz cawzbae gyoengqde Mbanjdungzloz Sinhcunh, lij miz vunz ndaw Sanhcinh Cunh、Yinzyi Cunh daengj doenghgij dieg neix dem. Mboengqneix, seiz gicej daeuj daengz ndaw mbanj caijfangj, vunzmbanj naeuz:“Seizneix mbouj you gwn mbouj you daenj, aeu gyaepgouz cingsaenz ndwenngoenz, daezswng vwnzva binjvei caeuq cingsaenz yiengjsouh.”

1.“Daengx Dungx Raemxmaeg” De Baenz Bouxdaiqdaeuz Vwnzva Ndaw Mbanj

“Byaij vaih haiznyangj ra sienfwen, diuz sienq yien baengzyoux lajmbwn. Haengj saenq fwen saed- yienh ceiqheiq, mok ndaej boenq sanq haij ndaej dienz.” Neix dwg gij sei Liuz Ginjyi seizcaeux cauhguh haenx, ndaw cih ndaw coenz cungj yawj ndaej ok de gig gyaezmaij caeuq yawjnaek doigvangq fwen.

Liuz Ginjyi dwg vunz bonjdieg Mbanjdungzloz Sinhcunh, doeg gvaq haujlai saw, doeklaeng youh bae doeg bandaconh cinsiuh, dwg gij vunz “ndaw dungx cungj dwg raemxmaeg” ndaw bak vunz ndaw mbanj. Vunz ndaw Mbanjdungzloz Sinhcunh bingzciengz gangj Vahsengj, vunzmbanj youq seiz guhhong maij doiqciengq fwen Vahsengj, neix hawj de daj iq couh doiq fwen Vahsengj haeujyinx dangqmaz, caemhcaiq daj bangeq gizhaenx hag rox haujlai fwen Vahsengj. Riengz cihsiz menhmenh demlai, de hainduj gaengawq gij minzfungh minzsuz dangdieg cauhguh fwen Vahsengj、 sei Vahsengj、siujbinj Vahsengj, mboujdan bonjfaenh ciengq, hix son hawj vunzmbanj ciengq. Aenvih gij fwen、siujbinj de cauhguh haenx gig ciep deihheiq, swnh bak dangqmaz, ndigah gig ndaej angqcoux.

Liuz Ginjyi bi 1999 duiyouh le, yungh dingzlai seizgan daeuj guh gij hong cauhguh conzdungj vwnzva Vahsengj caeuq biujyienj.“Bi 2006 hawfwen Vahsengj youq Namzningz Cauzyangz Gvangjcangz banh haenx, couhdwg dou gyoengqvunz maij eu fwen neix guh hwnjdaeuj lo, moix daengz ngoenzsinghgiz, baenz geijbak vunz cungj daeuj eu fwen.” Liuz Ginjyi naeuz, seizhaenx cijaeu dwg gij vunz maij eu fwen Vahsengj, cungj rox hawfwen Vahsengj Cauzyangz Gvangjcangz. Daengz bi 2012 Cauzyangz Gvangjcangz guh senj faex ndaem caeuq coih gvangjcangz, gyoengqde youh senj hawfwen baedaengz Namzningz Sinhsiu Gunghyenz, moix daengz ngoenz- singhgiz hai hawfwen, moix baez cungj miz geijbak vunz camgya.

Mbanjdungzloz Sinhcunh miz 1600 lai vunz, saimbwk geqoiq ca mbouj geijlai cungj dingq gvaq、eu gvaq fwen Vahsengj, vunzlai giekdaej fwen Vahsengj laegna. Liuz Ginjyi naeuz, gaenh geij bi neix, vunzmbanj doenggvaq riuzcienj diegnamh, ndwenngoenz bienqvaq gig hung, haujlai vunzmbanj genyi de daiqdaeuz cujciz aen duenz yisuz ndawbiengz ndeu. Youq ndaej vunzmbanj iugouz haenqrem, de gizlawz cungj buet, buet gaihdauban、minzcwng bumwnz、vwnzdij bumwnz ragouz bangcoh caeuq bwh’anq, aenduenz yisuz dauqdaej youq bi’gvaq byaibi cujciz laebbaenz lo.

2.Hwnj Daiz Couh Yienj Ndaej Vunzmbanj Bingzciengz Maengxmaij Cienz- ciengq Fwen Vahsengj

Bineix ndwen 2 ngoenz 25, Liuz Ginjyi cujciz aenduenz yisuz youq henzgyawj Gyanghnanz Gih Sahcingj Fuloz Siujgih banh le aen cienciengz yienjok “Gvancez Cibgouj Daih, Caezguh Aen Loqsiengj Cungguek”, gij neiyungz biujyienj miz habciengq fwen Vahsengj、saimbwk doiqciengq fwen Vahsengj、ciengq heiq goengsae、doeg fwen sei Vahsengj, caeuq ciengqgo diuqfoux daihneix dem, biujyienj lienzdaemh sam aen lai cungdaeuz, gij vunz daeuj ngonzyawj haenx yaek daengz cien vunz.

Aenduenz yisuz laebbaenz ngamq song ndwen lai couh banh ciengz biujyienj hung baenzneix lo, doiq neix, Liuz Ginjyi naeuz:“Gij cezmuz biujyienj cungj dwg vunzmbanj gag bien gag yienj, hoeng suijbingz hix mbouj yaez. Aenvih vunzmbanj bingzciengz cungj maij fwen Vahsengj, gij vunz aen duenz yisuz moix daengz ngoenzsinghgiz couh daeuj Sinhsiu Gunghyenz swnhyinx biujyienj, bingzseiz hix maij doxcomz youq giz ndeu doengzcaez ciengq, miz biujyienj goengdaej, hix miz haujlai cezmuz youq seizlawz cungj aeu okdaeuj biujyienj ndaej. Gyoengqde bingzseiz dwg vunzmbanj, hwnj daiz biujyienj couhdwg bouxyienj lo.”

Liuz Ginjyi yienznaeuz bi’ndwen yaek daengz 80 lo, hoeng ciuqyiengh miz gij sim caeuq ndangdaej bouxcoz.“Mwngz yawj gyoengq vunzmbanj dou, bingzseiz cungj maij eu fwen, cingsaenz yienghsiengq ndei, gvanhaeh huzndei, neix couhdwg gij gagsaenq vwnzva ndwenngoenz vwnzva daiqdaeuj haenx.” Bouxlaux neix miznaj dwk naeuz, gij mimiz de ndangdaej ndei couhdwg maij eu fwen.

3. Sam Daih Vunz Caemh Daiz Aeu Swnjcienz Ndei Gij Conzdungj Vwnzva Vahsengj

Liuz Ginjyi lwnh gicej, seizneix gij vunz cujyau aenduenz yisuz cungj dwg vunz bangeq. De maqmuengh doenggvaq aen duenz yisuz daiqdoengh caeuq yingjyangj, ndaej hawj mbangj bouxcoz ndiepgyaez gij conzdungj vwnzva Vahsengj, camgya haeuj ndaw hwnjguh vwnzva lajmbanj bae.

Seizneix, Liuz Ginjyi moix ngoenz banhaet 6 diemj hwnqdaeuj dingq gvangjbo, roxyiuj cwngcwz fapgvi caeuq seizsaeh cwngci guekgya,“Cauhguh fwen Vahsengj hix aeu gaenjriengz yamqdin seizdaih, cij ndaej engq yinx vunz.” Liuz Ginjyi naeuz, de yaek laebdaeb cauhguh, aenvih gij fwen de cauhguh haenx depgaenh gij saehhung guekgya caeuq gij vunz、saeh henz ndang, menhmenh, mizmbangj bouxcoz hix gyahaeuj ndawde bae lo.

Aen cienciengz biujyienj bineix ndwen 2 ngoenz 25, vunzmbanj Vangz Yenfwnh、Liuz Siyi gvanbaz ranz dog sam daih vunz cungj daeuj camgya. Liuz Siyi naeuz, de caeuq mehyah de cungj dwg vunz aenduenz yisuz, mehyah Vangz Yenfwnh dwg vunz ndaw aen doih diuqfoux minzcuz, de dwg vunz ndaw aen doih diuqfoux ciuhneix, doengzseiz hix eu fwen. Baez neix biujyienj, daeg lwg de youq baihlaeng aendaiz biujyienj guh hong houginz, lwgbawx dwg boux bauq cezmuz. De caeuq mehyah bonjfaenh biujyienj diuqfoux caeuq eu fwen, daeglan biujyienj doeg sei Vahsengj, yinx ndaej bouxyawj dopfwngz mbouj dingz, de roxnyinh miznaj dangqmaz. De maqmuengh bouxcoz cungj ndaej maij gij conzdungj vwnzva Vahsengj, hawj lajmbanj haihoengh gij va vwnzmingz.

Liuz Ginjyi naeuz, Vahsengj conzdungj youq dangdieg gig ndaej sim vunz, Gyanghnanz Gih bi 2013 ndaej bingz baenz Mbanjranz Vwnzva Vahsengj Cungguek le, vunzmbanj engq roxnyinh miznaj lo, hix engq maij fwen Vahsengj lo. Vunzmbanj gietdingh fatyiengz gya’gvangq vwnzva bonjdieg, fungfouq ndwenngoenz seizhoengq, hix hawj engq lai vunz gamjsouh daengz gij yinxdaeuz vwnzva Vahsengj.