“Ranz mwngz ndaem miz oij lwi?” Goeng Vangz duicangj guh daeuz daiq doih haeuj ranz bae duenhdingh bouxlawz dwg hojndoq cam.

“Mbouj ndaem, bi’gvaq bi’gyai ndaem ndaej geij dun dawz bae hawj doenghboux comz oij, rag hwnj rag roengz cungj mbouj vunz aeu, hozgaek le bineix mbouj ngah ndaem.” Daegnyaet han.

“Ndaem miz faex roxnaeuz maz lwi?” Vangz duicangj youh cam.

“Mbouj ndaem saek yiengh, dandan ndaem song moux naz.” Daegnyaet youh naeuz.

“Ciengx miz maz doihduz lwi?” Vangz duicangj youq gwnz mbawbiuj he sijsij vehveh le youh cam.

Daegnyaet naeuz:“Mbouj ciengx saek yiengh, caenh ciengx sam laeq lwgnyez.” Gangj le couh iet hoz bae yawj mbawbiuj Vangz duicangj, lumj boux lwghag gyau cozyez le yaek yawj lauxsae hawj geijlai faen nei.

Geij boux baihgwnz roengzdaeuj duenhdingh byawz hojndoq lij doeng cam sae cam, youh cunz haeuj cunz ok ndawrug gyangding, laeng ranz naj ranz, dawz aen’ingjsiengq gwq ingj gwq ingj, yaep he couh dawz mbawbiuj daeuj ndenq hawj Daegnyaet, naeuz:“Ciuq baihgwnz aen fap neix suenq, ranz mwngz ndaej 52 faen, mwngz youq gizneix ciemcoh ba.”

Daegnyaet fwngz saenzdwddwd gaem bit ciemcoh, ciem le cam:“Lingjdauj dungzci, ndaej geijlai faen cij suenq ranz hojndoq?” Ciepdwk youh dwg caem caz, youh dwg ndenq ien.

Vangz duicangj mbouj leixlangh Daegnyaet, doq mbon soujgih yawj seizgan doq seizbienh han:“Gou hix caengz rox, gijneix cungj youz baihgwnz daeuj dingh.” Gwnz naj de mbouj miz saekdi biujcingz. Daeg- nyaet lumj ndaek gyaenghguenh nei ndwnsoengsoeng mbouj rox baenz- lawz guh cij ndei.

Daegnyaet boux vunz miz di mwnh, gaenx gwn gik guh, bi daengz byai souhaeuj gig noix. Yah de hix mbouj daih rox guh, ciengx song daeg dah ndeu sam lwgnyez, seizneix cungj haeujhag doegsaw lo, ndawranz gwndaenj haemq hoj. De aenvih ndawranz hoj, lai baez bae saencingj ngaeq aeu “gij baujcang ceiq daemq swnghhoz lajmbanj”, hoeng gyoengq bouxdaeuz cungj naeuz minzcwng bang hoj mbouj bang gik, lij naeuz de ranz hoj dwg gik guh caux baenz, caiq gangj de mauh lai seng lwgnyez veizfanj gij diuzlaeh giva senglwg, mbouj ndaej yiengjsouh “dihbauj”. Bi’gvaq mwh haihag, Daegnyaet caiq baez bae saencingj minzcwng bumwn hawj saekdi ngaenz banggouq laemzseiz hawj geij boux lwg de gyau yozfei. Hoeng baihgwnz cix laengz naeuz ranz de caengz gyau gij ngaenz “sevei fujyangjfei”, ciuq gvidingh mbouj ndaej yiengjsouh gak cungj boujdiep.

Gvaq geij ngoenz, cunhveijvei dawz goenggauq roengz mbanj daeuj nem, daengx cunh cibgeij aen mbanj itheij miz geijcib ranz ndaej dingh baenz ranzhojndoq, yaek youz cwngfuj daeuj cinjdeng bangfuz. Daegnyaet hix dwg ranzhojndoq, vih neix, mbanj gwnz mbanj laj gyoengqvunz lwnh- faenfaen, miz di bi’gyaeuj laglag naeuz:

“Bouxgik miz fukheiq,

Ndaej baihgwnz daeuj bang,

Rox gwn diemz gwn rang,

Angqyangz gvaq saedceij.”

Daegnyaet couh angq dwk geij haemh ninz mbouj ndaek, cungj nyinhnaeuz bineix lwnz daengz de seizheiq ndei lo.

Roengz lingq le hwnj lingq,

Dangq vuenh lingh aen mbwn,

Mbouj lau mbouj miz gwn,

Gag miz vunz soengq daeuj.

Gvaqlaeng, baihgwnz boux lienz- haeh bangfuz ndwenndwen cungj miz vunz roengz mbanj haeuj ranz daeuj. Henzdou najranz Daegnyaet ndaej dinghoij miz song gep baiz iq yienhda, gep he dwg “Mbawgaj Mingzbeg Ranz Hojndoq Ndaej Ndeicawq”, lingh gep dwg “Mbawgaj Cinjdeng Bangfuz Duet Gungz Gunggeng”. Boux lienzhaeh bangfuz roengzdaeuj, lumj beixnuengx daeuj dajcunz, doxcaeuq gangjgoj, itheij doxyaeng baenzlawz ra ngaenz, guhdoih naemj duet “mauhgungz”.

Bi daihngeih haicin, boux lienz- haeh bangfuz youh daeuj lo, dawz mbawbiuj he hawj Daegnyaet dienz bi moq neix yaek guh maz dajndaem dajciengx, naeuz bauq hwnjbae le baihgwnz miz boujdiep roengzdaeuj. Baez nyi naeuz miz ngaenz, Daegnyaet sim doengh lo, couh dienz ndaem song moux oij song moux haeuxyangz、ciengx duz moumeh he. Gvaq geij ngoenz, cunhveij ganbu nem boux lienzhaeh bangfuz youh dwk dienhvah coi de cae reih ndaem oij ndaem haeuxyangz caeuq guh rienghmou bwh ciengx moumeh lo, naeuz baihgwnz yaek roengzdaeuj niemhsou gvaqgvan le cij fat boujdiep.

Mbatneix, Daegnyaet mbouj aeu saek boux coi couh gag gaenx bae naz bae reih lo, haetromh caengz caj yah de cawj ngaiz cug couh coh vunz ciq vaiz bae dawz reih gonq. Gwn ngaiz gvaq le, song gvanbaz sikhaek bae coihcingj rienghmou. Ciq ngaenz dai- gvanj ma cawx faen’oij、 ceh haeux- yangz nem vafeiz, lij cawx ndaej duz moucoh iq he daeuj ciengx, yaek louz guh moumeh.

Baihgwnz baij vunz daeuj niemhsou gvaqgvan le, buek ngaenz boujdiep daih’it daj haeuj ciengqhauh Daetnyaet lo, dingqnyi boux lienzhaeh bangfuz naeuz, baezlaeng lij miz buek daihngeih buek daihsam. De ngoenz- ngoenz angqfwngqfwng, gwih aen danci vaihvadvad haw gwnz ganj haw laj, haeuj aen bouqgwnhaeux bae luh laeuj gaeuq le caiq cawx saek song gaen ndokmou song gaen bya dauqma hawj yah. Yah de gienq naeuz:

“Gwnlaux bya rox lak,

Gwngak seizseiz gungz,

Ngoenzngoenz nyaenx gwnhung,

Cog mwngz ienq mbouj dauq.”

Daegnyaet ding le mbouj angq lo, eu naeuz:

“Miz gwn mwngz couh gwn,

Baihgwnz soengq ngaenz daeuj,

Ngoenz miz sam donq laeuj,

Angq gvaq baeuq saenzsien.”

Naeuz de mbouj dingq, yah de gag utheiq ndawdungx, mbouj guhsing lo.

Seizgan ndwen doek ndwen gvaqbae, boux lienzhaeh bangfuz lij- dwg ndwenndwen ciuqseiz daeuj ranz Daegnyaet, nem de gangjgoj, cam gij dajciengx de guh ndaej baenzlawz. Boux lienzhaeh bangfuz doq yawjraen gwnz cauq faengqfeiz Daegnyaet hoij miz saux noh he, ngeiz lo, ndaek neix mwh gvaqcieng cungj mbouj guh baenzlai nohlab gvaq, seizneix baenz- lawz sawqmwh cawx baenzlai noh hoij? De cam:“Seizneix mbouj dwg ngoenzciet, mwngz vihmaz cawx baenzlai noh?”

Daegnyaet mbajswddwd han:“Duzmou haenx dai lo.”

“A, vihmaz dai?”

“De mbouj gwn mok song ngoenz le couh gag dai lo.”

“Mwngz ciengx mou mbouj heuh souyihcan daeuj bang dajcim?”

“Gou mbouj roxnaj souyihcan saek boux vunz.”

“Mwngz……”Boux lienzhaeh bangfuz hozgaek dwk gangj mbouj ok vah.

Ciep roengzdaeuj, boux lienzhaeh bangfuz youh heuh Daegnyaet daiq de bae ndawreih yawj gooij gohaeux- yangz. Daegnyaet yiyi ywtywt mbouj siengj bae cix doi mbouj gvaq, cijndei daiq bae lo. Bae daengz henz reih, cij raen ndaw reih fwzyat, rumnywj sang gvaq go loegcak, daj baihrog cungj yawj mbouj raen saek go oij caeuq haeuxyangz.

Boux lienzhaeh bangfuz heiq dwk bwt yaek fonj, fok cam Daegnyaet:“Mwngz vihmaz mbouj daeuj ndairum cawx feizliuh daeuj dwk?”

“Mbouj miz ngaenz guh baenz- lai.”

“Gij ngaenz boujdiep baihgwnz hawj ni?”

“Aenvih ndawranz mbouj miz cienz, cungj dawz bae cawx gij gwn gij daenj lo.”

Boux lienzhaeh bangfuz ceng di ngunh gvaqbae, de rox lo, ndaek Daegnyaet neix mbouj miz yw gouq lo, de youh haemz youh ienq, haemz Daegnyaet mbouj cengheiq mbouj siengj guh gwn, ienq bonjfaenh bungz deng Daegnyaet yiengh vunz neix. De sikhaek dwk dienhvah heuh goeng- daeuz ndaw cunhveij daengz ranz Daegnyaet, lwnh gij cingzgvang hawj de nyi.

Gvaq le haujlai nanz, goengdaeuz cunhveij hai sing eu naeuz:

“Seizcin haengj doek fwn,

Doenghgo mwncupcup,

Henz dah go faexcuk,

Maj baenz yup gorangz.

Mbouj dwg dou bak lai,

Mwngz gvai di ndaej mbouj,

Baengh cwngfuj bangbouj,

Naemj baenz fouq baenz miz.

Vunz goq ranz goq lwg,

Mwngz cix huk baenz cwz,

Aen maenz mbouj miz dwz (gaeu),

Lw ndaek dog ndoqndat.”

Daegnyaet ngaemgyaeuj mbouj ok sing, naj ndingfifi, caen siengj deuzdak ndonj roengz conghnamh bae.

Doeklaeng, geij bouxdaeuz cunh- veij caeuq boux lienzhaeh bangfuz ciengz guhdoih daeuj ranz Daegnyaet, anbaiz de ciengx bit ciengx gaeq, ndaem naz ndaem reih, saek seiz lij caeuq de song gvanbaz caez guhhong dem. Bihaenx daengz byai, ranz Daeg- nyaet dauqdaej ndaej duetgungz lo.