Gou miz boux cejbiuj gyaeundei simndei ndeu, de louz byoemdinj bingz daengz rwz, ndaemndwdndwd, aenndaeng miz di ndiengq doxhwnj, loh’ok fouq siengq cabheiq ndeu. Baihlaj bwnda nanwdnwd haenx naep miz fouq lwgda hung ronghrikrik ndeu.

Geiq ndaej gou seiz haj bi, gou ciengzseiz bae ranz dahcej youq, moix baez gwn haeux seiz, gou lau nguh yawj densi, couh naeuz mbouj iek mbouj siengj gwn haeux. Yienghneix, dahcej couh ndawsim roxyiuj bwnq gou gwn haeux, gou cix gag soengsedsed yiengjsouh gijneix.

Geiq ndaej baezhaenx goengda daiq gou caeuq dahcej bae caemxraemx, goengda bae diengzhaex seiz, gou couh rag dahcej daengz gokciengz bae guhcaemz, aen cung ndeu le gyoengq vunzhung ra raen dou, cij rox dwg goengda heuh gyoengq vunzranz dauqcawq ra dou. Goengda deng hwk lau liux, dingq naeuz ra raen dou lo, goengda couh gyad naengh gwnz namh doek raemxda. Dahcej hix deng mehnax ndaq mbat ndeu, lij deng fad gvih roengzbae, dahcej caegcaeg lwnh gou nyi: “Dahnuengx, baezneix caen dwg raeuz loek lo, yienghneix gag caegcaeg bae guhcaemz, yungyiemj lai, gyoengq vunzhung hix yousim lauheiq.” Gou najmong raemxda loenqbyoegbyoeg, dahcej ngamq beij gou hung bi ndeu, vih maz gou baenzlai manz, dawz gij gyaez dahcej dangguh aenliengj ganghoh gou, hawj dahcej vih gou deng ndaq. Gou itdingh yaek bienq ndaej roxsoq cij ndaej, yaek lumj dahcej gyaez gou yienghaenx bae gyaez dahcej.

（Se Yizfeih raiz; Goenggen hoiz）