Vangz Cunhnonj (boux lauxsae lwgnyez)：Mbouj- duenh daezsang ciennieb suijbingz, engq ndei bae son’gyauq gyoengq lwgnyez

Youq bineix Vahcuengh Saw- cuengh Suijbingz Gaujsi(cunggaep) ndawde, Vangz Cunhnonj boux lauxsae daj Nanzningz Si Vujmingz Gih Daibingz Cin Gingloz Siujyoz Fusuz Youwzyenz daeuj haenx gauj ndaej daih’it, mwh gicej cam daengz rox swhgeij gauj ndaej ceiq sang miz maz gamjsouh, de naeuz: “Mbouj miz maz gamjsouh ne, neix dwg gij gyaezmaij gou.”

Vangz Cunhnonj bi 1989 doek- seng, daj iq couh gig yinx gij vah caeuq vwnzva Bouxcuengh, mwh youq Daibingz Cin Gingloz Siujyoz doegsaw hainduj hag Sawcuengh. Mwh siujyoz, boux son Sawcuengh haenx dwg banhcujyin de, banhcujyin iugouz yiemzgek, banhaemh doegsaw seiz iugouz hagseng doeg sat govwnz le, aeu Vahcuengh biucinj gyaulouz, caiqlij itdingh aeu Vahcuengh biu- cinj doeg govwnz. De bang gyoengq hangseng gaij faenzcieng Sawcuengh, doiq doenghboux sij ndaej ndei haenx, lij bang gyoengqde geiq faenzcieng daengz《Gvangjsih Minzcuz Bau》(banj Sawcuengh) bae. Gij cozbinj Vangz Cunhnonj couhdwg baengh banhcujyin bangcoh le ndaej fatbiuj, de lij geiq ndaej, swhgeij baez daih’it ndaej cienzsijgauj sim’angq dangqmaz, neix hix giendingh le gij gietsim de aeu hag ndei Sawcuengh. Cocung seiz de youq Vujmingz Minzcuz Cunghyoz doegsaw, aen hagdangz hai miz goq Vahcuengh Sawcuengh, neix hawj de ndaej laebdaeb hag Vahcuengh Sawcuengh. Bi 2017, de gauj hwnj Gvangjsih Swhfan Yozyen hanzsou daconh Cuengh Gun song vah yozliz＋conhyez hanzsoubanh, youq gwnz roen hag Vahcuengh Sawcuengh caiq aeundaej cinbu.

Bineix dwg Vangz Cunhnonj baez daih’it camgya Vahcuengh Saw- cuengh Suijbingz Gaujsi, camgya gaujsi mboujdanh dwg aenvih daez- sang yozliz, engq dwg gij fuengsik ceiq ndei cwngmingz naengzlig swhgeij, de maqmuengh daj ndawde roxndaej engq lai, aeu cingzcik hoizbauq yozyau caeuq lauxsae.

Cinz Ginhvah (boux- dajgoeng)：Cienmonz daj Sinhcin dauq Nanzningz gaujsi, gaujsi gaxgonq moix ngoenz yawj saw caeuq bauqceij

8 nyied 15 hauh banringzgvaq, QQ hoenggan miz diuz baengzyoux dungdai ndeu yinx hwnj gicej haeujsim: “Cingzcik okdaeuj lo, caeuq gou guj haenx ca mbouj geijlai, 90 faen doxroengz. Aenvih cozvwnz bienliz cawjdaez mbouj habgek, 30 faen cozvwnz couh suen ndaej 15 faen, caiq gyahwnj gihcujfwnh 70 faen, ceiq lai hix ndaej 85 faen, hoeng gou gauj ndaej 84 faen.” Boux fatbiuj diuz dungdai neix coh de heuhguh Cinz Ginhvah, bi 1983 doekseng youq Gveigangj Si Cinzdangz Gih Mungz- gungh Yangh aen ranz Bouxcuengh ndeu, dangqnaj youq Gvangjdungh Sinhcin dajgoeng. Vihliux camgya Vahcuengh Sawcuengh Suijbingz Gaujsi bineix, de cienmonz daj Sinhcin dauq Nanzningz gaujsi, gauj le youh sikhaek bae Sinhcin hwnjban.

Cinz Ginhvah hwnj yozcenzbanh seiz couh hag Sawcuengh lo, youq gwnz goq Vahcuengh Sawcuengh aen hagdangz hai miz haenx, de hag rox singmeh、yinhmeh、singdiuh. Doeg siujyoz caeuq cocung seiz hagdangz cungj hai miz goq Vahcuengh Sawcuengh, de aenvih neix ndaej laebdaeb hag Vahcuengh Sawcuengh. Doeg cocung seiz, bien faenzcieng iq《Daegnuengx Iq Gou》de sij haenx youq 《Gvangjsih Minzcuz Bau》(banj Sawcuengh) fatbiuj gvaq, bien faenzcieng iq neix dwg bien cozbinj Sawcuengh daih’it de youq gwnz bauqceij fatbiuj.

Bi 2000，Cinz Ginhvah cocung bizyez le couh okrog dajgoeng, mbouj caiq hwnjdangz. Ngamq guhhong mbouj nanz, gijmaz cungj mbouj swnhleih, de ciengzseiz dauqngeix gij saedceij hangdangz gyaeundei, rox- nyinh gij saedceij dajgoeng mbwq lai, hoeng gij engq lai haenx dwg mbouj rox baenzlawz guh, youq ndaw hojnanz de dauqcungz gaem hwnj bit, aeu Sawcuengh sij faenzcieng, lij geiq faenzcieng daengz《Gvangjsih Minzcuz Bau》. Mbouj nanz, de sou ndaej fung saenq《Gvangjsih Minzcuz Bau》sij hawj ndeu, youq ndaw saenq gangj faenzcieng de ndaej fatbiuj lo, hoeng hawj de ceiq angq dwg fung saenq neix aeu Sawcuengh sij, lij dwg bouxbien ndeu caenfwngz sij ne. Neix dwg de baez daih’it sou ndaej saenq Sawcuengh, ndaw sim de gikdoengh dangqmaz. Hoeng doeklaeng aenvih gak cungj yienzaen, de mbouj ndaej laebdaeb sij faenzcieng Sawcuengh. Doeklaeng, de haq vunz、miz lwgnyez, gij aplig saedceij ngoenz naek gvaq ngoenz. De siengj ra di fuengfap daeuj hoizsoeng aplig, couh siengj daengz Sawcuengh. De lienzhaeh daengz bouxbien gaxgonq sij saenq hawj de haenx, naeuz siengj aeu geij faenh bauqceij Sawcuengh daeuj hag, gvaqlaeng de couh ciengzseiz sou ndaej《Gvangjsih Minzcuz Bau》(banj Sawcuengh).

Bi 2012 ngoenz ndeu, de youq gwnz bauqceij yawjraen aen siusik Gvangjsih haiguh Vahcuengh Saw- cuengh Suijbingz Gaujsi, angq dangq- maz, gig siengj camgya gaujsi, hoeng seizhaenx Vahcuengh Sawcuengh Suijbingz Gaujsi gaenq gietsat. De naeuz:“Camgya gaujsi mbouj vih gijmaz, couh aenvih gyaez Vahcuengh Sawcuengh.” Vihliux camgya gaujsi, de engqgya roengrengz bae hag Vahcuengh Sawcuengh, hoeng aenvih gak cungj yienzaen, itcig mbouj ndaej camgya gaujsi, cigdaengz bineix cij miz gihvei bauqmingz. Bauqmingz ndaej le, de gikdoengh dangqmaz, cawzliux gikdoengh de youh miz di simvueng, aenvih nanz lai mbouj camgya gaujsi. “Gou seizhaenx couh doiq swhgeij gangj, Vahcuengh dwg vahcoj gou, lau de gijmaz ne? cijaeu dwg gauj Sawcuengh couh mbouj yungh yousim.” Cinz Ginhvah naeuz. Yienghneix de nyinhcaen vih gaujsi guh cinjbi, moix haemh ninz gaxgonq cungj yawj di saw caeuq bauqceij.

Cijaeu haengj roengzrengz couh mbouj lau guh mbouj baenz, de youq baez gaujsi neix aeundaej cunggaep gyapdaengj gij cingzcik ndei neix. Gicej cam de ngoenzlaeng lij dajsuenq mbouj dajsuenq cungdongj gaugaep seiz, de naeuz: “Cijaeu miz seizgan, couh itdingh caiq camgya gaujsi.”