Youq Namzningz Si Sanglinz Yen Cinhih Yauzcuz Yangh, aen gyaranz Lanz Lenzcingh gyawjgyae cungj okmingz, daengx ranz haj daih caemh youq, daxbuz bi’ndwen ceiq geq haenx gaenq ndaej 102 bi lo. Ranz gyoengqde gyahfungh seuqcingh laux- saed, vunz ndaw ranz doxgingq doxgyaez、haengj bang bouxwnq、fatyiengz binjdwz ndei, gizlawz cungj miz vunz haenh vunz ranz gyoengqde. Lanz Lenzcingh daengx ranz cauhlaeb le Aen Duenzyisuz Fwen Yauzcuz, gvan Lanz Lenzcingh Luz Cwngz guh donzcangj, gyoengqde baengh gij rengz duenzyisuz eu fwen Yauzcuz eu baedaengz Yanghgangj. Bi 2017 ndwen 9, aen gyaranz Lanz Lenz- cingh aeundaej aen cwngheuh aen “gyaranz ceiq gyaeundei” Guengjsae. Bi 2018 ndwen 5, gij mingzdaeuz aen gyaranz Lanz Lenzcingh hwnjgaep, ndaej senj haeuj “gyaranz ceiq gyaeundei” 2018 nienzdoh .

Gyaranz Fwen Yauzcuz Swnjcienz Vwnzva

Youq Cinhih Yauzcuz Yangh, miz aen yisuz donzdij mingz goksa ndeu heuhguh Aen Duenzyisuz Fwen Yauzcuz. Gij vunz cauhlaeb Aen Duenzyisuz Fwen Yauzcuz haenx dwg Lanz Lenzcingh daengx ranz vunz, gvan de Luz Cwngz dwg donzcangj duenzyisuz. Aen duenzyisuz neix aeu vwnzva Yauzcuz guh cawjdaej biujyienj, gij fwen、diuqfoux Yauzcuz gig miz minzcuz daegsaek naekna gyoengqde cauhguh haenx, lij ndaej byaij hwnj daizheiq Yanghgangj gvaq. Fwen Yauzcuz seizneix gaenq bienqbaenz gaiq ciubaiz cihsaw gim Cinhih Yauzcuz Yangh ndeu.

Luz Cwngz naeuz, Yauzcuz itcig cungj miz gij fungsug eu fwen, daihboh de doxhwnj ciengzseiz haiguh gij hozdung daeuq fwen, mbiengj okdaez hawj mbiengj, yungh fwen daeuj doxciengj hoizdap, mbouj faen sawhingz couh mbouj sat. Bouxsai mehmbwk coz seiz gangjyoux, caemh yungh fwen daeuj cienz cingz, bohmeh Luz Cwngz couhdwg doenggvaq doiq fwen doxrox doxgyaez. Deng cungj vwnzva fwen neix yingjyangj, Lanz Lenzcingh gvanbaz hix dwg gij vunz ak eu fwen. Luz Cwngz youq seiz ndaejhoengq, roengzrengz soucomz gij gohswz gizbuj、gojgaeq ndawbiengz sanqdoek youq ndawbiengz haenx, ngeixnaemj guhlawz cijndaej fatyiengz caemhcaiq hawj vwnzva Yauzcuz hoenghvuengh. Cijaeu gietsim itdingh guh baenz, ginggvaq nyinhcaen couzbwh, aen Duenzyisuz Fwen Yauzcuz aeu vunz ndaw ranz Lanz Lenzcingh guh vunz cujyau neix laebbaenz lo.

Aen duenzyisuz ngamq laebbaenz gak fuengmienh cungj mbouj doh ndei, dingzlai seizgan cungj dwg gag guh gag angq, lengqseiz youq seizciet ndwencieng ndaej iu bae mbanj biujyienj. Riengz mboujduenh hwnj- guh ndei bonjndang, gij cezmuz biujyienj minzcuz daegsaek sienmingz haenx ndaej vunzbiengz haenhndei caeuq angqcoux, gij mingzdaeuz duenzyisuz menhmenh goksa. Baengh gaenh geij bi neix daeuj gij hozdung angqhoh ngoenzciet hoenghhwdhwd, gak cungj hozdung angqhoh ngoenz- ciet ndaw yienh couhlienz Guengjsae daengx gih doxcaez iucingj Aen Duenzyisuz Fwen Yauzcuz bae biuj- yienj nyauznyauz.

Doenghbaez, gij neiyungz caeuq diuhsing gij gohswz doenghgij fwen Yauzcuz sanqdoek youq ndawbiengz haenx haemq dandog, duenzyisuz laebbaenz le, Luz Cwngz caeuq vunz duenzyisuz caenh’itbouh daezswng le gij diuh fwen Yauzcuz, hawj gij diuhsing de engq fungfouq, gij rengz biujyienh engq ak, caiqlij gyoengqde gaengawq gij daegdiemj Cinhih Yaucuz Yangh Yauzcuz、Bouxcuengh comzyouq, yungh Vahcuengh dang- dieg aeu gij neiyungz gij cingsaenz Cibbet Daih、hwnjguh lajmbanj moq、gij cwngcwz leihminz aendangj daengj bien baenz gohswz cienzciengq, lumjbaenz “Gungcanjdangj lingjdauj, bang raeuz cauh gyaeundei. Gwn daenj lohloh miz, vih yinzminz cauh fuk……” “Cibbet Daih cingsaenz, cienz ma daengz lajmbanj. Hingzseiq bienq ndei lai, raeuz sim’angq raixcaix……” Doenghgij swz neix coenzcoenz caezcub、gig miz yinhlwd, swnh bak dangqmaz, doengsug ngaih rox, yungz cihsizsing、yinxdaeuzsingq baenz aen cingjdaej ndeu, caiq boiq hwnj gij diuqfoux、heiq rengz biujyienh ak haenx daengj hingzsik, miz rengz ganjyenj gig ak, gig ndaej vunzlai angqcoux. Gij biujyienj Aen Duenzyisuz Fwen Yauzcuz, hawj yied daeuj yied lai vunz rox Cinhih Yauzcuz Yangh, rox vwnzva Yauzcuz.

Doxgingq Doxgyaez Hauq- swnh Bouxlaux In’gyaez Beix- nuengx

Ranz Lanz Lenzcingh youq gwnz gai Cinhih Sanglinz Yen. Daxbuz Lanz Lenzcingh gaenq ndaej 102 bi lo, hoeng de rwz mbouj nuk、da mbouj va, dinfwngz lij gig riengj, lengqseiz lij bae ndaw suenbyaek mbaet byaek. Daxbuz naeuz:“Ndangdaej ndei, dwg baengh gyoengq lwglan goq ndaej ndei.” Daxbuz ndangdaej ndei caeuq gyoengq lwglan haeujsim ciuqgoq baen mbouj hai. Moix ngoenz banhaet, Lanz Lenzcingh cungj dwg haeuj ndaw rug daxbuz geq bae gonq, bang de hwnq congz daenj buhvaq、roi gyaeuj swiq naj, ciuqgoq de gwn doxgaiq, banhaemh seiz yaek ninz bae gyaeujninz de damqyawj, saedbauj de ninzonj le cij cuengqsim. Miz mboengq seizgan ndeu, aen ga daxbuz mbouj fuengbienh, Lanz Lenzcingh moix ngoenz rex de haeujok aenrug, saeqsim ciuqgoq de. Seiz Lanz Lenz- cingh youq rog nyaengqfoed mbouj ndaej ciuqseiz dauqma ranz, gij saeh ciuqgoq daxbuz couh youz gizyawz vunz ndaw ranz dingjlawh. Cawzbae saeqsim ciuqgoq daxbuz, daengx ranz vunz bingzciengz hix dwg doxbang doxrex, doxgingq doxgyaez, caencingz raeujrub. De couh lumj baenz diuz baenz diuz dahraeuj raezrangh, youq ndaw diuz dahraez seizgan baez di baez di menhmenh nyinh daih dem daih aen gyogranz Lanz Lenzcingh.

Caeuq Ranznden Doxhuz Naeksim Bang Bouxwnq

Miz vunz gangj, gyaez dangh- naeuz dan dingzlouz youq ndaw ranz, yienghhaenx cungj gyaez neix dwg gyaeziq, hoeng ietraez cungj gyaez neix、faenh cingz neix bae daengz gwnz ndang gyoengq baengzyoux、ranznden, gij de cauhbaenz haenx couhdwg cungj gyaezhung ndeu. Aen gyaranz Lanz Lenzcingh itcig gaemmiz gij leixniemh “gij gvanhaeh ranznden ndei lumj beixnuengx”, caeuq ranznden doxhuz caemh youq, caiqlij yungh gij rengz bonjfaenh ok ndaej haenx bae bang gij vunz miz hoj haenx.

Miz gienh saeh ndeu, itcig daengz seizneix vanzlij youq dangdieg cienz baenz gij gojndei. Gwnz gai miz boux daxbuz singq Liengz ndeu, gvan de dai caeux, mbouj miz vunz baengh ndaej. Lanz Lenzcingh cawjdoengh soulouz daxbuz haenx, aeu de dang baenz vunz ndaw ranz bonjfaenh, ciuqgoq gij gwndaenj de. Daxbuz haenx buen bae gizwnq youq le, vanzlij ciengzseiz hwnjdou bae bang de guh hong ndaw ranz, soengq gij doxgaiq ndwenngoenz yungh dem, cigdaengz daxbuz haenx gvaqseiq.

Gvan Lanz Lenzcingh caemh dwg boux vunz simndei ndeu. Geij bi gonq, haemh laepngau ndeu, Luz Cwngz cingq loqfangzhwnz deng gij sing denva sawqmwh yiengj hwnjdaeuj haenx cauz ndiu lo.“Dwg beixnuengx ranznden youq Namzningz guhhong haenx dwk daeuj, hawj gou soengq daxmeh de bae yihyen yawj bingh.” Laxlawz, daxmeh boux beixnuengx neix gag boux dog youq ranz, gyang- hwnz sawqmwh raen youq mbouj baenz, gaenj aeu bae yw, hoeng ndaw ranz mbouj miz vunz, yihyen youh gyae, gyanghwnz ra bouxlawz bang ndaej ne? Boux beixnuengx neix sikhaek couh siengj daengz Luz Cwngz gonq. Luz Cwngz maz cungj mbouj gangj, sikhaek hai aen cimenbauh ranz bonjfaenh hwnjdou bae coux daxmeh boux beixnuengx neix soengq bae daengz veiswnghyen ndaw cin, lij souj le haemh ndeu.

Vuenyungz dwg gijmaz? Daengx ranz Lanz Lenzcingh mbouj miz maz saehsaed gingdoengh diendeih, hoeng gyoengqde yungh gij doxgingq lumj daih bouxhek, aen sim hauqswnh bouxlaux ndeu, gij yiedcingz bang vunz, cungj cingsaenz swnjcienz fwen Yauzcuz vwnzva minzcuz ndeu, yienjok le gij vuenyungz raeujrub homfwd haj daih vunz caemh youq haenx, gyoengqde youq ndaw ndwen- ngoenz bingzciengz yungh gij fuengsik fwen Yauzcuz ciengq gij ndwenngoenz gyaeundei, yungh gij saedsaeh hengz- doengh fatyiengz caeuq hengzguh sevei cujyi haedsim gyacizgvanh, cungfaen baijok le gij yienghsiengq ndei gyadingz Cungguek seizdaih moq, dwg gij yienghndei gyoengq gyaranz wnggai hagsib.

Ciuq gaisau, bi 2018, Guengjsae gungh miz 30 aen gyaranz ndaej senj haeuj “gyaranz ceiq gyaeundei” daengx guek 2018 nienzdoh. Doengh- gij gyaranz neix mbouj dwg gvanbaz doxhuz, couhdwg gingq laux gyaez nomj, mbouj dwg gohyoz son lwg, couhdwg ranznden doxbang, gyoengq- de yawjnaek gyaranz、 gya’gyauq caeuq gyahfungh, doenggvaq cauhguh aen gyaranz iq huzndei, doengzcaez doidoengh cauxbaenz gij funghsang moq sevei cujyi vwnzmingz gyaez guek gyaez ranz、doxndiep doxgyaez、gaenxmaenx doxhwnj、caez guh caez yiengj.