Mehmbwk neix gumq daengj aek hung, byoem ndaem noh maeq, de caeuq dahniq liz bae le, Daegcan lij naemj yaep he, de roxnyinh daengx ndang ndatfwtfwt. De caen naemj caeuq bouxsai bien ndang gangjgangj vah, mbouj caiq naemj sam naemj seiq, bouxsai cungj dwg ngaemgyaeuj yawj saw, mbouj leixlangh de. Daeg- can roxnyinh engq mbwq lo, ndwn hwnjdaeuj dajsuenq youq ndaw ceh- can byaijbyaij.

Bouxsai naeuz:“Mwngz yiengh- neix youq mbouj onj mbouj an, miz maz saeh gaenj ha.”

Daegcan riuriu mbouj rox baenz- lawz hoiz vah, de couhdwg naemj vaiqdi maranz. Daegcan okrog daeuj dajgoeng gaenq bi he mbouj raen daeglwg, bi he mbouj raen mehyah, bi he mbouj raen bohmeh lo, de couhdwg naemj vaiqdi maranz. Mwngz naeuz dwg saeh gip, hix mbouj gip, mwngz naeuz mbouj dwg saeh gip, hix gip.

Fat ci seizgan daengz lo, Daegcan ganj bae dap ci, dahniq haxbaenh youq doiqnaj de laemx cingq cing gen daxmeh de byaij gvaqdaeuj, mehmbwk haenx gwnz mbaq song mbiengj cungj hoij miz daeh, gwnz fwngz hix riuj aen daeh he dem. Daegcan naemj, dap ci couh dap ci lo, mbouj rox gij vunz neix vihmaz baenzlai daeh hung daeh iq, baenzlawz miz baenzlai doxgaiq. Naemj dwg naemj, Daegcan lij byaij gaenh gvaqbae doiq mehmbwk naeuz:“Dahnuengx, gou bang mwngz dawz aen daeh he ba.”

Mehmbwk cim Daegcan da he, aiq dwg yawj rox de dwg bouxsai haxbaenh fuz dahniq ba, de ngengq mbaq coh Daegcan, eiqsei hawj de bang riuj aen daeh haenx.

Daegcan yawj rox gij eiqsei mehmbwk, dawz aen daeh haenx riuj gvaqdaeuj, mehmbwk naeuz “docih lo docih lo”.

Giz bakdou hwnj ci, vunz bae vunz dauq gveujfodfod, mehmbwk muengzfoedfoed fan daeh ra biuqci, caj de ra ndaej biuqci le ngiengx- gyaeuj yawjyawj seiqhenz, gaenq mbouj raen dahniq le, de cuengq sing heuh hwnjdaeuj:“Dahniq dah- niq——” Dahniq gvaq gizlawz bae mbouj raen lo, mehmbwk vueng lo, dawz gij doxgaiq gwnz mbaq gveng daengz gwnznamh, doq hemq doq youq ndaw cehcan con bae con dauq ra hwnjdaeuj.

Yaep dem vunz couh dawz gij daeh neix bae lo, yienghneix mbouj ndaej bw! Daegcan naemj daengz neix, aemq hwnj song aen daeh mehmbwk cuengq youq gwnznamh, fongfong fangfang buet gvaqbae gaen meh- mbwk, guhdoih bae ra dahniq.

Daegcan raen mehmbwk youq gyang vunzlai baenqlulu, yawj ndaej ok de gaenq mbouj miz saekdi banhfap. Daegcan rag dawz gen de, buet haeuj gingjvusiz bae, mehmbwk swenjyaya, gaenq gangj mbouj baenz vah, Daegcan doiq gingjcaz naeuz yienghneix yienghneix, gingjcaz dingq le hai genhgung luzsieng daeuj yawj, laxlawz dwg bouxsai daenj buh hau vaq ndaem he umj dahniq bae lo, seizneix boux sai haenx gaenq dawz dahniq ndonj hwnj aen ci ndaem he bae. Daegcan yawjraen gwnz hoz- ndoenj bouxsai haenx miz diemj mai ndaem he. Daegcan yawj daengz neix, couh rox boux sai haenx dwg haxbaenh naengh youq bien ndang de.

Mehmbwk raen daengz neix, daengx ndang unq daej laemx roengz lo.

Canghyw daeuj daengz gouq mehmbwk, Daegcan song mbaq aemq song aen daeh hung, song fwngz riuj song aen daeh iq, ndwn youq henz ndang mehmbwk. Ci seizlawz hai bae gyoengqde cungj mbouj rox, cij rox seizneix mbouj ndaej dauqbae lo, boux gingjcaz he heuh gyoengqde bae yietnaiq, lwnh hawj gyoengqde seiz- neix gaenq miz gingjcaz bae gyaep boux sai haenx, itdingh caenh banhfap sojmiz bae gouq dahniq.

Mbwn laep dingh lo, gyoengq gingjcaz daiq dahniq dauq lo, mehmbwk caeuq dahniq doxgot youq itheij daej mbouj dingz.

Dahniq ndaej gouq dauq lo, Daegcan seizneix cij roxnyinh gwnz mbaq lij hoij miz song aen daeh, de dawz gij daeh gwnz mbaq cuengq roengzdaeuj, doiq mehmbwk naeuz:“Gou bae ra ci dauqbae lo, sou mehlwg youq doeklaeng ba.” Meh- mbwk rag dawz Daegcan, naeuz:“Mwngz mbouj ndaej bae, caen mbouj ndaej bae.”

Daegcan baez dingq doeksaet lo, gag naemj: Gou dwg mbouj dwg gag rasaeh haeuj ndang ha, mehmbwk neix dwg mbouj dwg yaek laih saeh dwk gou ha?

Seizneix gingjcaz gvaqdaeuj lo, heuh Daegcan haeuj hongq rug he bae, cam neix cam haenx, cam it cam ngeih, caj gingjcaz cam sat, gaenq dwg gyanghaemh 9 diemj lai cung, haemhneix baenzlawz hix mbouj ndaej dauqbae lo.

Mehmbwk hix deng gingjcaz heuh haeuj hongq rug he bae, cam bae cam dauq, cam sam cam seiq, caj gingjcaz cam sat, gaenq dwg gyanghaemh 9 diemj lai cung. De mbouj rox yaek bae gizlawz, cij rox haemhneix de baenzlawz hix bae mbouj ndaej lo.

Daegcan caeuq mehmbwk byaij ok cehcan gingjvusiz, mbouj rox gvaq gizlawz bae, song boux doxcim ndwn le yaep ndeu, mehmbwk doiq Daegcan naeuz:“Hwnz lo, mwngz soengq dou mehlwg dauqbae ba, ranz gou youq Doenggai.”

Aen ranz mehmbwk sam caengz, it laeuz hai diemq guh gaicawx, gvan de bingh dai song bi lai lo, mehlwg gag gvaq saedceij. Ngoenzneix ngoenz- singhgiz, de yaek daiq dahniq bae ranz daiq youzyouz, byawx rox ok gij saeh neix.

Naemjnaemj gienh saeh ngoenz- neix, mehmbwk lij roxnyinh lau ndaej mbei yaek dek bae, de hix roxnyinh gig gamjdoengh, danghnaeuz mbouj miz Daegcan bangcoh, de boux mehmbwk ndeu bungz daengz gij saeh neix hix mbouj rox baenzlawz guh ndei. Seizneix Daegcan couh youq ndawranz, couh youq doiqnaj, aeu ndeindei docih de cij ndaej.

Mehmbwk cawj mienhdiuz guh siuyeh, ndaw mienh gya miz gyaeqgaeq caeuq nohmou. Mehmbwk daek vanj mienhdiuz he ndenq hawj Daegcan, naeuz:“Ngoenzneix mwngz sinhoj lo, seizneix gaenq hwnz, mbouj miz maz ndei gwn daeuj dakdaih mwngz, couh gwn di mienhdiuz demh dungx gonq ba.”

Daegcan cim coh mehmbwk neix, roxnyinh doiq lwgda de cinghrikrik, cingh ndaej lumj yaek yawjraen daengz ndaw dungxsaej vunz bae. Daegcan miz di gikdoengh, muengz naeuz:“Yienghneix couh ndei, yienghneix couh ndei.”

Dahniq gaenq ninz ndaek, mehmbwk neix heuh Daegcan youq ndawranz, mbouj aeu caiq dauq bae ranz lo. Doeklaeng songde gag boux swiq ndang ndei hix gak boux gag bae ninz lo.

Daegcan ninz mbouj ndaek, de naemj mehyah, mehyah de ndang hung sang, hix gyaeundei, geij ndwen gonq ngamq seng lwg iq. Caengz seng lwg seiz, songde youq aen singz neix guhdoih hwnjban, haet doxcaez bae, haemh guhdoih dauq, guhdoih caep gyaranz 3 bi lai, song boux caengz doxceng gvaq.

Daegcan youh naemj daengz mehmbwk neix, mehmbwk neix boux vunz ndeu youh guh seng’eiq youh ciengx lwg, yienznaeuz mbouj yungzheih, hoeng, gvaq saedceij aiq mbouj miz geijlai nanz. Miz vah naeuz “meuz lawz raen bya mbouj heuh, mbauq lawz raen sau mbouj lienh”, mehmbwk neix baenzneix saundei,ndwn daengz doiqnaj bouxsai lawz, de sim mbouj doengh suenq de bonjsaeh daih. Daegcan couh sim doengh gvaq.

Dung——dung——dung, miz sing roq dou, Daegcan doeksaek hwnjdaeuj cam:“Byawz?” Mehmbwk naeuz:“Dwg gou, mwngz hix ninz mbouj ndaek ha?” Fajdou riengz gij sing gangj mehmbwk hai lo, mehmbwk byaij daengz naj congz Daegcan, naeuz:“Mwngz cungj mbouj doiq gou doenghsim gvaq ha? Danghnaeuz mwngz naemj, gou couh hawj mwngz, seizneix couh hawj, gou mbouj dwg cungj mehmbwk seizbienh, hoeng hawj mwngz gou roxnyinh dij.”

Mehmbwk neix rauheiq fofo, Daegcan simdiuq bubbub, bungz daengz gij saeh neix, caen hawj de uk luenh sim diuq.

Yaep he, Daegcan cienq ndang mbouj yawj mehmbwk neix naeuz:“Dwg haeux dwg mak, gou ndaej faen faenh he hawj mwngz guhdoih gwn; dwg ngaenz dwg cienz, gou ndaej soengq dingz he hawj mwngz itheij yungh. Hoeng, gou miz yah miz lwg gvaq, raeuz yienghneix mbouj daiq ndei, bae ninz ba.”

Mehmbwk neix dauqbae lo, dingqnyi sing gven dou, Daegcan cij roengz ninz, hwnz neix, de hwnz he ninz mbouj ndaek.（sat）