Daj iq daengz hung, bae doegsaw、bae haw gyae、bae mbanj gyae, gaxgonq couhdwg gwih danci bae, bae gyae lailai couh dap banci. Banci dwg fuengbienh vunz raeuz bae gizgyae, hoeng doenghbaez ci noix, diuz roen cungj dwg roen namh lai, gumzgumz gemxgemx. Dap baez banci aeu caj haujlai nanz cij miz gyaq ci ndeu daeuj. Naengh youq gwnz ci, daenh bae daenh dauq, daenh daengz bwt fan mbei boek, gyaeuj ngunh rueg sag, lij miz vunz dingj cungj muenh bae. Dap baez ci ndeu, baez daengz camh roengz ci lo, ga unq ndang fouz cungj mbouj miz rengz byaij loh bae, lij dwgrengz gvaq dajrauq dajcae.

Daengz doeklaeng mbouj doeg- saw le, bae Gvangjdungh dajgoeng, gyae lailai, dap banci baenzhwnz bae cij daengz. Diuz roen gyae, gyaq ci hung ndeu dap ndaej geijcib vunz, baenzlai vunz youq gwnz ci, bouxboux cungj duet haiz, ndaw ci miz heiq haeufumfum, siengj rueg bae, nyouq gij heiq haeu baenzhwnz raezrangrang, sinhoj dangqmaz! Daengz byonghhwnz 11、12 diemjcung yienghneix, boux- haici bae gwn caeuzhwnz, gyaep vunz roengz ci seuq gvendou. Mizseiz saedcaih dwg dungx iek hix bae ra huq gwn, byawz rox aen diemq cix dwg diemq cienmonz yaeuh vunz. Mwngz gwn bae 10 maenz, hawj de bak maenz. De ra hawj mwngz 90 maenz, mbawmbaw cungj dwg 10 maenz. Caenda yawj de geq miz 9 mbaw 10 maenz, dawz gvaq gij ngaenz, mbouj nyinhcaen geq couh cuengq roengz ndaw daeh bae. Hoeng, doeklaeng caiq mbon okdaeuj geq. Ha, baenzlawz cij miz song mbaw ndwi lo?

Hwnz ndeu raezrangrang, youq gwnz ci baenzlawz mbouj raninz ne? Hoeng, gwnz ci baenzlai vunz, byonghhwnz baez ndaep daeng, gwnz ci laepngaungau, maz cungj yawj mbouj raen, aeu re miz gaijdiuq caeg gij ngaenz ndaw daeh bonjfaenh roxnaeuz soujgih, baenzlawz cungj dwg aen sim ndenriri, lau deng saeh rwix. Gou doek gvaq ngaenz, doek gvaq soujgih, ceiq lau couhdwg bungz daengz vunzrwix haenx, ciengj aeu ngaenz, mbouj hawj couh moeb vunz caemhcaiq aeu mid daeuj camz vunz, mbouj lau dai cij dwg gyaj.

Mboujgvaq, gijneix cungj dwg gij laeh haujlai bi gaxgonq lo. Seizneix okdou mbouj doengz doenghbaez, haujlai vunz bae gizgyae cungj maij dap gauhdez、dungceh lo. Youq cwngfuj raeuz roengzrengz baihlaj, guek raeuz seizneix haujlai haw singz cungj doeng gauhdez、dungceh lo, hwnj vangj cawx biuq, cinjseiz fat ci, gyaqcienz caeuq dap banci mbouj ca geijlai, doenghbaez dap banci aeu ngoenz ndeu, seizneix dap dungceh buenq ngoenz couh ndaej lo, youh vaiq youh onj youh ancienz, youh miz gijgwn gai dem, fuengbienh lai lo.

Gou maij gij swnghhoz seizneix, engq maij Cungguek raeuz!