Gienh saeh neix fatseng youq gou bae diegbya Yungzbenh Siujyoz cihgyau. Baezbaez siengj hwnjdaeuj, gou roxnyinh gamjdoengh dangqmaz.

Miz ngoenz ndeu, banringzgvaq ciet goq doegsaw baihlaeng, gyoengq lwgnyez yozcenzbanh caeuq lwghag it nienzgaep humx youq henz ndang gou, boih saw hawj gou dingq. Gyoengqde boih ndaej gig nyinhcaen, gou hix gig angq yawjraen gyoengqde baenzneix haenrengz.

“Ling ling ling……” Gij sing lingz cuengqhag baez yiengj, gyoengq lwgnyez neix lumj duzrwi mbin okrog nei, sikhaek sanq hai, gaem daehsaw buet ok gyausiz. Aenvih bang lwgnyez neix, aen ranz cienzbouh youq ndaw rungh, daj ranz daengz hagdangz gyae dangqmaz. Gyoengqde daj gyanghaet daeuj hagdangz, banringz mbouj ndaej maranz, ndigah baez daengz dangz satlaeng, sim gyoengqde caeux mbin maranz lo. Yienznaeuz gip dauqranz, hoeng, bang lwgnyez neix, cungj mbouj lumz doiq gou gangj “lauxsae, mwngz sinhhoj lo”、“lauxsae ngoenz- cog raen”、“docih lauxsae” daengj vah ndei. Gou hix simhoengz caeuq gyoengq lwgnyez neix doxbiek. Seiz- haenx, gou roxnyinh gij vah gyoengqde lumj rumzcin nei ci dwk ndaw sim gou raeujfwtfwt, hawj gou vuenyungz raixcaix.

Doeklaeng, ndaw gyausiz cij lw boux hagseng ndeu. De heuhguh Cin Yingj, doeg yozcenzbanh. De dwg boux lwgnyez hojlienz youh dwggyaez, ndang iq youh saeq, ngamq ndaej 5 bi. Dingqgangj, seiziq daxboh de cup duzbinj deng gaemh bae gaiduzsoj, daxmeh de deuz lo, mbouj caiq dauqma. De caeuq dahnuengx de cij ndaej caeuq goeng buz caez youq. Cin Yingj byom iq, couh lumj go’nywj nei goenqcaej majhung. Gou ciengzseiz yawjraen de, gag roi byoem、swiq naj、daenj buh. Yienznaeuz de ciengzseiz byoem nyungq naj miz di uq, hoeng lwgda de lumj raemx saw nei seuq- cingh, gou roxnyinh de dwg boux lingz he. Mbouj loek, de coengmingz gaenx hag, ceiq maij boih saw. Baez daengz dangz goq boih saw, hagseng it nienzgaep boih saw, hagseng yoz- cenzbanh cungj bae guhcaemz. Cij miz de naengh youq henz ndang gou, caeuq hagseng it nienzgaep caez boih saw. Baezbaez seizneix, gou couh got de, son de doeg saw, bang de cingq yaem. De byaengq da ronghsag yawj gou, riengz gou doeg saw, hag ndaej baenzneix nyinhcaen, baenzneix haenqrengz. Mizseiz, gou roxnyinh Cin Yingj couhdwg lwg gou. Aenvih de gyaez hag lai, de boih ndaej haujlai saw, sij cih caezcingj, vanzlij rox veh dozveh. Moix baez gou haenh de guh ndaej ndei, de cungj riunyumnyum dwk gangj:“Docih lauxsae.” Gij riu de lumj seizcin va hailangh, fouz hom vunz hix maez.

Cin Yingj coengmingz lingzleih, baez son couh rox, youh roxsoq , moix baez cuengqhag baema, de cungj rox gangj “lauxsae, ngoenzcog raen”、“lauxsae itloh bingzan” daengj vah hawj vunz sim raeujrub neix. Mizseiz de cienmonz youq bakdou ranz de caj gou daengq naeuz:“Lauxsae, mwngz gwih ci menh di.” De baenzneix saeqsim, lumj vunzcaen gou nei haeujsim gou.

Ngoenzneix banringzgvaq cuengqhag, Cin Yingj youh byaij doeklaeng. De yaep da ronghsag doiq gou gangj:“Lauxsae, ngoenzcog raen naj. Laux- sae hoh mwngz vuenyungz.”Gou dingqnyi gij vah neix, yaepyet roxnyinh cin raeuj va hai. Ndaw uk doq nyoenx ok aen cih “bak biq va- ngaeux”. Gou sikhaek ngeix daengz vahsug gangj “vunz ndujdaeuz, singq bonj sienh”. Gij coenz Cin Yingj caemhcaiq gij guh de, hawj vunz rox de dwg boux simndei simsienh. Gou yawj gij lwgda ronghliklik de, sawqmwh roxnyinh de couhdwg dahsien gwnzmbwn baij roengzdaeuj. Gou byaij gvaqbae, gotumj de, sing unq naeuz:“Docih mwngz Cin Yingj.” Gangj sat, ndaej geiq ndaw daeh lij miz song aen dangz, mbon ok cuengq haeuj lwgfwngz de, naeuz:“Soengq hawj mwngz, lauxsae gyaez mwngz.” “Docih lauxsae.” Cin Yingj ciep gvaq dangz, ok gyausiz bae lo. Ndaw sim de itdingh caeuq gou doxdoengz, saekrim vuenyungz.