Yangz Yenlinz (boux- bien Sawcuengh)：Aeu daih- it mbouj dwg moegbiu,lijaeu laebdaeb gauj

Youq mbaw dan cingzcik baiz gonqlaeng bi 2018 Vahcuengh Saw- cuengh Suijbingz Gaujsi(gaugaep) gwnzde，Yangz Yenlinz boux ndaej 24 bi haenx gauj ndaej 81 faen cingzcik baizmingz daih’it. Bi 2016 gauj ndaej cunggaep gyapdaengj, bi 2017 gauj ndaej gaugaep ietdaengj, bineix gauj ndaej gaugaep gyapdaengj——Youq bouxwnq yawj daeuj de gaenq dwg bouxakhag ndeu, hoeng youq ndawsim de, aeu daih’it mbouj dwg moegbiu, mboujduenh daezsang Vah- cuengh Sawcuengh suijbingz cij dwg gij gyaepgouz de. 8 nyied 20 hauh caz ndaej cingzcik baez gaujsi neix le, de doiq gicej naeuz “mbouj habhoz geijlai”, lij naeuz yaek caiq bae camgya gaujsi, “roengzrengz aeu mauhgvaq 90 faen”.

Neix gaenq dwg Yangz Yenlinz baez daihseiq camgya Vahcuengh Sawcuengh Suijbingz Gaujsi lo. De lij geiq ndaej, bi 2013 mwh swhgeij baez daih’it camgya gaujsi lij dwg boux hagseng dayoz it nienzgaep ngamq hag Sawcuengh. Dangguh boux hagseng Gvangjsih Minzcuz Dayoz Cungguek siujsoq minzcuz yijyenz vwnzyoz ciennieb, de riengz gij iuheuh lauxsae bae camgya cogaep gaujsi, de gauj mbouj gvaq seizhaenx mbouj siengj daengz, daengzcog swhgeij aiq guh gij hong biensij haeddoiq Sawcuengh, ngoenzngoenz ndaej bae caeuq Saw- cuengh doxgyau, caemhcaiq sim’angq dangqmaz.

“Ndaej aeu gij saeh gou gyaez guh ciknieb, simvan lai.” Yangz Yenlinz naeuz, swhgeij daj iq couh youq ranzdaiq Rindaengj Yienh gvaq saedceij, aeu Vahcuengh caeuq vunz ndawranz、doengzhag gyaulouz, daengz ndaw singz hwnj cocung le, Vah- cuengh couh gangj ndaej noix, mwh gauhgauj dienz ciyen dwg aenvih siengjniemh caeuq vunz gangj Vah- cuengh lai cij genj aen ciennieb neix, doiq baezlaeng dwg mbouj dwg aeu neix guh ciknieb mbouj bae siengj geijlai, mwh doegsaw hix cij dwg boux hagseng mbouj guhsing bae roengz- rengz、mbouj hawj vunz haeujsim geijlai.

Mwh hwnj dayoz gij cingzcik ciennieb bonjfaenh mbouj dwg ceiq yienhda, aen sim maqmuengh rox ndaej engq lai haenx cix hawj de youq diuzroen aen ciennieb Vahcuengh Sawcuengh byaij ndaej engq gyae. Yangz Yenlinz geiq ndaej, bi 2016 sujgyaj geizgan, daengx gih Vah- cuengh Sawcuengh beizyinbanh youq Gvangjsih Minzcuz Dayoz gawjhengz, de moix ngoenz cungj bae youq henz dingq, ndwen lai seizgan, moix ngoenz hwnjdangz haeujsim dingq, guh ndei bitgeiq, guh daez, roengzdangz couh yawj saw, “Mwh yawj saw baez bungzdaengz aen sawloih mbouj rox couh sikhaek caz saw sawloih, iugouz swhgeij itdingh aeu roxyiuj moix aen sawloih, doeklaeng caiq yungh doenghgij sawloih neix bae lienh sij faenzcieng dinj, cungj simcingz moix ngoenz maqmuengh hag haenx daengz seizneix lij geiq ndaej laeg dangqmaz.”

Doiq vahcoj miz gamjcingz laegna、caensim gyaezmaij Vahcuengh Sawcuengh、lauxsaed nyinhcaen bae hag, neix hawj de daj boux mbouj caixhangz Vahcuengh Sawcuengh saekdi, baenz boux maenh’ak youq ndaw hangznied Vahcuengh Saw- cuengh. Haeuj Gvangjsih Minzcuz Cuzbanjse guhhong, ndaej doigawj hawj Swcigih Minzyiveij dangguh vunzcaiz boqyaem Vahcuengh, youq Vahcuengh Sawcuengh Suijbingz Gaujsi gauj ndaej daih’it, doenghgij neix cungj swyenz baenz lo.

Gicej cam de baenzlawz cij gauj ndaej faen sang seiz, de baez riuriu naeuz: “Gizsaed couh dwg bingzseiz lai yawj di lai doeg di.” Mwh hwnj dayoz cawzliux hagsib goq ciennieb, de lij doeg di saw Sawcuengh, seiz mbouj seiz yungh Sawcuengh fat veihsin、sij geij coenz gamjsiengj, geiq saeh. Mbouj gvaq duenh hawj de miz gamjsouh, lij dwg bi 2017 bizyez gaxgonq daengz Gvangjsih Minzcuz Cuzbanjse lienhguh 3 ndwen seizgan haenx. Lienhguh geizgan moix ngoenz aeu lai yawj faenzcieng Sawcuengh, moix cih moix coenz bae haeddoiq, neix hawj gij Vahcuengh Sawcuengh suijbingz de cinbu gig hung, “Seizde couh roxnyinh ‘w, couhdwg yiengh- neix lo’”, Yangz Yenlinz naeuz, “Lienhguh sat le gou bwh 3 ngoenz seizgan, bae camgya gaugaep gaujsi couh doenggvaq lo.”

Vahcuengh Sawcuengh Suijbingz Gaujsi gaugaep gyapdaengj, aen cingzcik neix doiq gunghcoz daeuj gangj gaenq gaeuq lai lo, hoeng de lij mbouj hozrim, “Gaujsi ndaej caz- niemh gij hagsib yaugoj gou duenh seizgan ndeu.” Yangz Yenlinz naeuz, maqmuengh doenggvaq gij ginglig swhgeij yingjyangj vunz henz ndang, daiqdoengh engq lai vunz bae hag Vahcuengh Sawcuengh.