28 bi, lwgfwngz baez vad, baez yaepda couh gvaqbae lo, dauqngeix diuz roen ngutngeuj dwgrengz youq ndaw gocwngz fanhoiz cauhguh gij denyingj vah saw minzcuz byaij gvaq haenx, ndaw sim Cinz Hungzlinz gig mbouj caemdingh.

Riengz Banlaux Byaijhwnj Diuzroen Boiqyaem

Bi 1990, Cinz Hungzlinz bouxcoz Bouxcuengh youq diegbya lueglaeg Dava Yauzcuz Swciyen Yajlungz Yangh sengmaj neix, baengh bonj- faenh mboujduenh roengzrengz byaij- haeuj le Duh’anh Yauzcuz Swciyen Denyingj Gunghswh, dang bouxboiq- yaem denyingj. Ngoenz daih’it guh- hong, dingqnyi “boiqyaem” song cih saw neix, lwg ndaw bya neix roxnyinh bonjfaenh dwg Liuzlaujlauj haeuj Da’gvanhyenz, mbouj rox baenzlawz guh cij ndei. Boux lingjdauj faenguenj gij hong boiqyaem haenx aeu duenh neiyungz gwnz mbaw bauqceij ndeu gyau hawj de, heuh de yungh Vahcuengh bonjdieg gangj baez ndeu. Gangj sat le, lingjdauj hai aen luzyinhgih hawj de dingq gij loegyaem bonjfaenh, baedauq geij baez, baez ndei gvaq baez.

Youq laj banlaux naihsim sonyinx, Cinz Hungzlinz hainduj guh gij hong boiqyaem 《Aenruz Sawqmwh Mbouj Raen》 lo, neix dwg bouh denyingj de baez daih’it boiqyaem. Gujcangj faenboiq bouxgiek hawj de, de gig nyinhcaen bae guh, boih sug daizswz, hoeng baez hwnj aendaiz loegyaem de couh ok vwndiz lo. Mbouj dwg sing saenz gangjvah gazgwt, couhdwg yiengh bak mbouj deng, diuqgah dangqmaz, siengj mbouj guh, bae guh boux cuengq denyingj.

Cinz Hungzlinz nyinhcaen caeuq banlaux hag, youq ndaw gocwngz mboujduenh lienhguh, gaemdawz le gij yaulingj caeuq gi’gyauj boiqyaem, beijlumj: Yiengh bak aeu cinjdeng, gamjcingz aeu doed ok, sing aeu byot, aeu hag rox ndwnj、haiz、daej、 riu dem, yienghneix cij ndaej suenq dwg gihbwnj habgek.

Daj bi 1990 daengz bi 2000, 10 bi seizgan, Cinz Hungzlinz caeuqfaenh fanhoiz cauhguh le ca mbouj geijlai 100 bouh denyingj. Ndawde 《Dagez- can》(gwnz、laj) aeundaej aen “ciengj dwngzlungzbeih” guekgya, youq daengx yienh gak aen yanghcin cunz- dauq cuengqingj, bouxyawj miz daengz 30 lai fanh vunzbaez, ndaej gwnzbiengz gvangqlangh haenhndei;《Raemxda Lwggyax》 aeundaej aen “cinmaj ciengj” guekgya.

Daujyenj Loegyaem Boiqyaem Boux Dog Gag Rap

Bi 2001 le, aenvih densigih、luzyinhgih caeuq yingjdezgih doh- daengz lajmbanj, aen hawciengz denyingj deng cungdongj caemhcaiq doek doxroengz youqgaenj, gungh- swh mbouj miz cienz fat cienzhong, dingzlai cizgungh hainduj gag ra hong, geij boux doengzsaeh geq genhciz gij hong boiqyaem haenx caemh ndang nyieg bingh lai. Bi neix, gyoengq boux boiqyaem miz song boux doengzsaeh geq gvaqseiq, gij doengzsaeh bi’ndwen lij oiq haenx vihliux ndwenngoenz bae guh seng’eiq lo, gij vunz guh gij hong boiqyaem cawzbae Cinz Hungzlinz, cungj deuz liux lo, gij hong fanhoiz cauhguh da raen couh yaek goek goenq lo! Aenvih doiq gij hong boiqyaem denyingj Vahcuengh miz gamjcingz laegna youh gig ndiepgyaez, de laebsim dauqcungz guh, ciucomz vunzcaiz, aeu gij hong boiqyaem denyingj Vahcuengh Duh’anh mbaw geiz neix gwed hwnjdaeuj. Yiengh- neix, de ciucomz le 4 boux baengzyoux ceiqheiq doxdoengz swhsiengj dox- ngamj daeuj bang bonjfaenh guh gij hong fanhoiz cauhguh. Bihaenx 《Genjleh Dailix》 benqgojgaeq fanj nduknaeuh gyoengqde fanhoiz cauh- guh neix youq gak aen yanghcin cunzdauq cuengqingj, fanjyangj gig ndei, gij bouxyawj deng gyauyuz haenx miz daengz 40 lai fanh vunzbaez.

Bi 2002,《Baujgen Caeuq Youhswngh》 benqgohgyau aendoih Cinz Hungzlinz fanhoiz cauhguh neix aeundaej ciengjmaenhndei daengx guek.

Bi 2003,《Vunzak Sam Boux Byongh》《Ngeihcib Haj Boux Lwgnyez Boux Boh Ndeu》 song bouh denyingj neix baez daengz seiz cuengqingj, vunzlai gig haengjgyaez.

Dang Boux Duicangj Aendoih Cuengqingj Dauqcungz Laebguh Aendoih Fanhoiz Cauhguh

Bi 2007, Duh’anh Denyingj Gunghswh guh gaijceiq, sojmiz yenz- gungh gag guhcawj genjleh hong, Cinz Hungzlinz ndiepgyaez denyingj saeh- nieb doenggvaq doxdax ndaej cingj dauqma daengz aen denyingj gungh- swh dauqcungz laebbaenz neix, bienqbaenz boux duicangj aendoih cuengqingj ndaw gunghswh, fucwz youq daengx yienh 248 aen hingz- cwngcunh caeuq segih cunzdauq cuengqingj gij denyingj goeng’ik.

Moix baez nem ok haijbau, vunzlai humx hwnjdaeuj cam haemhneix dwg mbouj dwg cuengqingj denyingj Vahcuengh? Mwhneix, ndaw sim Cinz Hungzlinz nanzgvaq dangq- maz. Haeujdaengz 21 sigij le, denyingj gaenq suswva, gij denyingj gyauhben doenghbaez fanhoiz cauhguh haenx gaenq mbouj ndaej cuengqingj lo, najdoiq gij maqmuengh vunzlai, dangguh boux fanhoiz cauhguh denyingj gvaq ndeu, ndaw sim de gawq roxnyinh doiq mbouj hwnj youh baenqbeq, ginggvaq fanfoek ngeix- naemj, de laebsim dauqcungz laebguh aendoih fanhoiz cauhguh, raphwnj mbaqrap naek swnjcienz vahsaw minzcuz. Cinz Hungzlinz nyinhcaen ra le 5 boux vunz miz siengjmuengh caeuq gietsim guh gij hong fanhoiz cauhguh denyingj Vahcuengh haenx dauqcungz dap daiz caemhcaiq guh son’gyauq dem.

Aendoih miz lo, ngaenzcienz youh dwg aen vwndiz hung ndeu, ciuq cwngcwz gvidingh, moix fanhoiz cauhguh bouh benqgojgaeq caeuq benqgohgyau ndeu, cwngfuj faenbied bangbouj ngaenzcienz 10000 maenz caeuq 2000 maenz, yingjben doeng- gvaq guekgya niemhsou habgek le cij bued cienz roengzdaeuj, guhbaenz bouh denyingj ndeu ceiq noix aeu caj daengz byongh bi ngaenzcienz cij bued roengzma daengz. Cinz Hungz- linz cijnaengz doenggvaq haekfuk gij gunnanz gwndaenj bonjfaenh gag demh cienz gonq. Bued cienz roengz- daeuj mboujdan seizgan nanz, caemh- caiq biucinj hix daemq, yienznaeuz daj bi 2013 hainduj, gij ngaenzcienz bangbouj fanhoiz cauhguh benq- gojgaeq caeuq benqgohgyau ndeu faenbied daezsang daengz 15000 maenz caeuq 3000 maenz, hoeng caeuq rog gih fanhoiz cauhguh bouh denyingj vahsaw minzcuz vunznoix gizyawz ndeu ndaej cwngfuj bangbouj 7 fanh maenz ngaenz doxbeij, gij ngaenzcienz lij dwg nanz riengz ndaej hwnj, haeuj bouj mbouj ndaej ok.

Bienqbaenz Gij Yienghndei Ganbu Vah Saw Minz- cuz Hag Haenx

Najdoiq gunnanz, gij simnduj Cinz Hungzlinz mbouj bienq, vihliux hawj hangh saehnieb neix ndaej lienzdaemh roengzbae, de rag mehyah bonjfaenh haeuj aendoih gungz neix, ciengq hwnj le gvanbaz “song vunz baenq”. Vihliux ciengx ranz, de banhaemh daiqlingx aendoih cuengq- ingj youq daengx yienh gak giz diegcuengqingj cuengqingj denyingj, bi ndeu cuengqingj 2900 lai ciengz, seiz ndaejhoengq, cujciz aendoih fanhoiz cauhguh denyingj. Seizdoeng gvaq seizcin daeuj, de caeuq mehyah de bienqbaenz le gij rengz youqgaenj 5 aen doih, gij soemj van haemz manh ndawde, cij miz gyoengqde rox.

Daj bi 2010 daengz seizneix, aendoih Cinz Hungzlinz daiqlingx haenx gungh fanhoiz cauhguh 46 bouh benqgojgaeq、40 bouh benqgohgyau denyingj Vahcuengh, mboujdan hawj denyingj Vahcuengh Duh’anh miz le benqgoek cukgaeuq, hix vih gizyawz yienh ranghdieg Dahhoengz daezhawj le benqgoek. Dan bi 2017 gij soq dinghcawx denyingj bingzdaiz couh miz daengz 5000 lai ciengz, daiq gij gvansim aen dangj bae hawj gak cuz vunzlai gyaezmaij denyingj vahsaw minzcuz haenx, hix soengq bae le cihsiz caeuq angqyangz.

Mboujduenh roengzrengz, ndaej- daengz baihgwnz mizgven bumwnz haengjdingh. Bi 2016 《Loekdaibingz · Doiqhamq》 benqgojgaeq aendoih Cinz Hungzlinz fanhoiz cauhguh neix aeundaej Cungguek Denyingj Densi Gisuz Yozvei “Ciengj Cozbinj Maenhndei Cauhguh Sing’yaem” sam daengjciengj. Bi 2017 ndwen 11, Cinz Hungzlinz ndaej bouxvunz senhcin vah saw minzcuz vunznoix daengx gih Gozvuyen baecinj fatbouh《Fueng’anq Sawcuengh》 60 hopbi. Bi 2018 ndwen 6, wngq Swcigih Minzyijveij dangjcuj iucingj, Cinz Hungzlinz bae gizhaenx guh “mbouj lumz simnduj · geiq maenh sawjmingh” cawjdaez senh- gyangj baugau. Swcigih Minzyijveij fucujyin、gihgvanh dangjveij suhgi Veih Yungjhungz doiq Cinz Hungzlinz bingzgyaq gig sang, haenh gij cingsaenz fungyen de itcig mbouj bienq giensouj youq gwnz aen guhhong gangjvei fanhoiz boqcuengq denyingj vahsaw minzcuz vunznoix Guengjsae haenx, dwg gij yienghndei ganbu vah saw minzcuz daengx gih hagsib haenx.