Aen gunghswh Daegcan liz cehcan mbouj suenq gyae, bingzseiz naengh ci cib lai ngeihcib faen cung couh ndaej daengz.

Lij miz diemj lai cung cij daengz seiz haici, youq ranz mbouj miz saeh, Daegcan sousib ndei doxgaiq couh okbae coh cehcan dapci lo.

Doiqnaj gunghswh couh miz haujlai ci samloek rag hek. Daegcan gangj ndei gyaqcienz, yamq hwnj aen ci samloek he bae.

Ci samloek hai bae yaep he, fwt dingz roengzdaeuj, Daegcan cam mehmbwk haici bungz daengz maz saeh, mehmbwk naeuz aiq dwg youzloh ci mbouj doeng lo, yawjyawj couh ndaej. Daegcan naemj, seizgan lij miz, caj mehmbwk coih ndei caiq bae hix mbouj ceiz.

Mehmbwk ngauzngauz aen doengj cang youz, maeuq aen gyaeuj roengzbae, dawz diuz guenjyouz niuj okdaeuj, coh congh guenjyouz boq le song gaemz heiq, caiq niuj guenjyouz hwnjbae, guh sat gijneix, mehmbwk couh hwnj ci daeuj fatdoengh sawqsawq ndaej mbouj ndaej.

“Ngw——ngwngw——”Ci sam- loek maenj dwk couhdwg fatdoengh mbouj hwnj. Mehmbwk naeuz:“Youzloh ci mbouj miz saeh, aiq dwg hozswz mbouj baenz lo.” Gangj sat, de saet roengz ci bae, niuj aen hozswz roengzdaeuj, dawz aen hozswz moq he vuenh hwnjbae. Guh ndei gijneix, mehmbwk youh naengh hwnj ci daeuj fatdoengh, ci samloek maenjhwhw, lijdwg lumj haxbaenh nei, baenzlawz cungj fatdoengh mbouj hwnj. Caen dwg gip dai vunz o!

Daegcan naeuz:“Ci mwngz baenz mbouj baenz? Danghnaeuz mbouj baenz gou lingh bae dap aen ci wnq.” Mehmbwk haici naj baez nyaeuq naeuz:“Aen ci gou yaep seiz he coih mbouj ndaej, mwngz lingh bae dap aen ci wnq ba, gou hix mbouj aeu ngaenz mwngz lo.”

Daegcan dawz ok soujgih yawj- yawj seizgan, gaenq nguh bae 20 lai faen cung lo, de roengz ci samloek daeuj, ganjvaiq vad fwngz heuh aen dikci he gvaqdaeuj.

Byawz rox, dikci hai bae yaep he hix fwt dingz roengzdaeuj, Daegcan ngiengxgyaeuj bae yawj, doiqnaj dingz miz roix ci raezrangrang he.

Youq gwnz gai saek ci dwg saeh bingzciengz, cajcaj yaep he, loh couh doeng lo. Naemj daengz neix, Daegcan onjdingh roengzdaeuj laeb- daeb naengh dwk, gwnz ci sou ndaej aen dendaiz cingq cuengq souj go 《Caj Mwngz Caj Ndaej Baenzlai Nanz》, caen dwg dengseiz ya!

Seizgan gvaqbae cib lai faen cung, dikci caengz ndaej doengh saekdi. Daegcan naeuz:“Saefouh ha, gou yaek ganj bae dapci bw, seizgan mbouj miz geijlai lo, mwngz ndaej mbouj ndaej siengjsiengj banhfap, hawj ci coh naj hai bae di.” Saefouh fouznaih naeuz:“Mwngz gag yawjyawj ba, baihlaeng baihnaj cungj saek ci lo, lij miz maz banhfap dem, lau rox mbin cij ndaej lo. Danghnaeuz mwngz gip lai, mwngz couh lingh bae dap aen ci wnq ba, gou hix mbouj aeu ngaenz mwngz lo.”

Daegcan roengz ci daeuj, coh baihnaj byaij bae, doiqnaj mbouj geij gyae miz ci doxdaemj, dingqnaeuz miz vunz dai hix miz vunz sieng lo, gaenq daj 120 lo, cigiuhuceh cingq daeuj gouq vunz, gyauhgingj cingq daeuj banhsaeh, yawj hwnjdaeuj diuz roen neix yaep seiz he cungj mbouj ndaej doeng ci lo.

Seizgan mbouj miz lo, Daegcan ganjgip coh baihnaj byaij bae, doek- laeng menh buet hwnjdaeuj. De doq coh cehcan bae doq yawj seizgan, seizneix liz haici cij miz geij faen cung ndwi, ganj mbouj ndaej dangq ci neix couh deng lingh caj dangq ci baihlaeng lo.

Daegcan gvaq giz ci doxdaemj le, lingh dap aen ci wnq bae cehcan, seizgan baez faen baez faen gvaqbae, aen sim Daegcan couh lumj gij nae laj ndit nei baez conq baez conq cieg bae. De ganj daengz doiqnaj cehcan seiz, cingq dwg aen seiz haici, Daegcan baez roengz ci couh lumj roeg mbin nei coh cehcan “mbin” bae.

Ndaw ding caj ci, vunzhek ndaetfoedfoed, miz vunz naeuz, aen ci 4 diemjcung hai haenx gaenq mbouj miz diegnaengh lo. Daegcan baez dingq, ndaek vunz couh lumj aen loek ci deng cuengq heiq bae nei, daengx ndang unq liux, de cijndei cawx aen ci 5 diemjcung hai.

Cawx ndaej cibiuq, liz haici seizgan lij nanz, Daegcan youq ndaw cehcan byaijbyaij, neix yawjyawj haenx ngonzngonz, roxnyinh mbwq raixcaix.

Ndaw cehcan vunz bae vunz dauq, lwgnyez daej, bouxlaux hemq, cauzhumhum, nauhyied dangqmaz. Daegcan naemj ra aen daengq he naengh yaep he, baenq bae baenq dauq mbouj raen miz saek aen daengq hoengq, lij ndei, de couh aen daeh riuj ndeu, mbouj miz maz doxgaiq naek, naengh mbouj naengh couh suenq lo.

Daegcan doq byaij doq yawj coh gij vunz miz naengh、miz ndwn、miz byaij ndaw cehcan. Doiqnaj de miz bang vunz ndeu, miz bouxsai hix miz mehmbwk, gyoengqde daeh hung daeh iq gyonj guh doi he cuengq youq gwnznamh, bouxboux najnyaeuq byoem nyungq. Daegcan naemj: Gij vunz neix itdingh youq gizlawz dajgoeng ngamq dauqma, roxnaeuz cingq doxciuz bae gizlawz dajgoeng. Cungj dwg vihliux gwndaenj, gyoengqde mbouj ndaej mbouj youq ndaw vunzlai neix ganj bae ganj dauq, caen baeg vunz.

Daegcan byaij daengz gaenh bang vunz haenx, ndawde miz daegmbauq he ndwn hwnjdaeuj. Mbouj rox dwg faj din yamq mbouj onj, roxnaeuz vunz ndang fouz lai, de saemxsax baez ndeu, laemx daengz gwnz ndang Daegcan daeuj. Daegcan naeuz:“Ai, ai, ai, mwngz guh maz a?” Miz bouxsai ndeu doq ndwn hwnjdaeuj fuz dawz daegcoz haenx lienzmuengz doiq Daegcan naeuz:“Doiq mbouj hwnj, doiq mbouj hwnj, gyoengqdou gaenq song ngoenz mbouj miz doxgaiq gwn lo, seizneix bouxboux ndang unq da raiz. De mbouj dwg daegdaengq bungq mwngz.”

Daegcan dingq le gig doeksaet, hix mbouj rox gyoengqde gangj gij vah neix dwg mbouj dwg caen, de byaij ok cehcan baihrog bae, cawx daeh mienhbau he caeuq cibgeij bingz raemx soengq hawj bang vunz haenx.

Daegcan mbouj siengj bae cam gyoengqde vihmaz geij ngoenz mbouj miz doxgaiq gwn. De gag nyinhnaeuz, gofaex miz naeng, boux vunz miz naj, vunz dungx mbouj iek mbouj bae caem gwn, swhgeij sai bae 35 maenz ngaenz suenq maz, ngoenzlaeng mbaet gwn mbaet yungh di couh ndaej lo.

Daegcan doq naemj doq yawj seiqhenz miz mbouj miz daengq naengh, de raen doiqnaj miz ndaek bouxsai daenj vaq ndaem buh hau ndeu, song ga doxgeuh dwk naengh youq gwnz daengq raez fan saw yawj, gyang rungj de cuengq miz aen daehnaeng saek henj ndeu. Yawj gij siengq de, mbouj dwg lauxbanj couhdwg boux dangdaeuz. Daegcan naemj: Caen geizheih, seizneix miz geijlai boux lauxbanj roxnaeuz boux dangdaeuz mbouj miz ciiq hai, seizneix lij daeuj cehcan caeuq beksingq doxcaenx naengh banci.

Daegcan cingq naemj dwk, henz ndang bouxsai miz boux hek he ndwn hwnjdaeuj byaij deuz lo, Daegcan couh gvaqbae naengh roengzdaeuj. Daegcan cim ndaek sai neix da he, raen gwnz hozndoenj de miz diemj mai hung lumj aen gyaeq ndeu, aen mai neix gig yienh da vunz. Daegcan doiq bouxsai neix naeuz:“Seizneix vunz cungj caemz soujgih yawj dennauj lo, mwngz hix caem ndaej sim daeuj yawj saw, nanz ndaej nanz ndaej ha!” Bouxsai neix cim Daegcan da he riuriu, youh mbouj ok sing, laebdaeb yawj saw.

Seizneix miz dahniq seiq haj bi yienghneix ndeu buet gvaq doiqnaj Daegcan daeuj, de deng daeh doengh bouxhek cuengq youq gwnznamh laeuz ga dwk, laemx daengz byai din Daegcan. Mbouj rox dwg in lai roxnaeuz doeksaet, dahniq daihsing daej hwnjdaeuj. Daegcan ganjvaiq fuz de hwnjdaeuj, lienzsing naeuz:“Mbouj youqgaenj, mbouj youqgaenj, byaij- roen aeu haeujsim a!”

Daxmeh dahniq byaij youq baihnaj, ndaej nyi sing daej dahniq, baenq dauq laeng baez yawj, gaenq raen Daegcan fuz dahniq hwnjdaeuj, de lienzsing naeuz “docih lo, docih lo”.

（caengz sat）