8 nyied 13 hauh, bi 2018 Vah- cuengh Sawcuengh Suijbingz Gaujsi cingzcik ndaej goengbouh okdaeuj.Gicej daj Swcigih Minzyijveij rox siusik, Vahcuengh Sawcuengh Suij- bingz Gaujsi baen miz cogaep、cunggaep、gaugaep sam aen daengj- gaep, gij cingzcik gak daengjgaep youh baen baenz gyap、iet song aen daengjgaep, ndawde, 80 faen caeuq 80 faen doxhwnj dwg gyap daengj, 60-79 faen dwg iet daengj. Baez gaujsi neix gungh miz 371 vunz camgya, gyoengqde daj Nanzningz、Liujcouh、Fangzcwngzgangj、Ginhcouh、Gvei- gangj、Bwzswz、Hozciz、Laizbinh、Cungzcoj daengj 9 aen singz neix daeuj, ndawde miz 113 vunz camgya cogaep gaujsi, habgeklwd dwg 57.5%, 80 faen doxhwnj miz 30 vunz; 171 vunz camgya cunggaep gaujsi, habgeklwd dwg 40.9%, 80 faen dox hwnj miz 15 vunz; 87 vunz camgya gaugaep gaujsi, habgeklwd dwg 19.5%, 80 faen doxhwnj miz 2 vunz.

Gicej youq mwh caijfangj rox siusik, youq ndaw gaujseng mbouj- danh miz boux lauxsae Cuengh Gun song saw vah、bouxbien Sawcuengh daengj guh hong Vahcuengh Saw- cuengh ciennieb, lij miz gunghvuyenz、bouxfucwz meizdij、godij sanghhu、hagseng da cunghconh yenyau、gunghswh cizyenz、cwngzyangh gih- minz、duiyouh ganbu daengj boux gyaezmaij Vahcuengh Sawcuengh daj ndawbiengz gak hangznieb daeuj haenx. Caeuq gij faensoq yiemzgek cinjdeng doxbeij, gij goj gyoengqde bae camgya gaujsi engqgya miz eiqsei, geij ngoenz neix gicej caijfangj le 4 boux gaujseng, seizneix couh faenyiengj gij ginglig、 daejniemh roxnaeuz naemjngeix gyoengqde miz- gven Vahcuengh Sawcuengh Suij- bingz Gaujsi haenx.

Vangz Leiz(bouxfucwz meizdij)：Gij doenghlig gaujsi, daj aen sim langh- baij vwnzva Vahcuengh Sawcuengh daeuj

“Gauj ndaej baenzlawz la?” “50 faen, caeuq baez daih’it doxdoengz.” Vangz Leiz naeuz, ciep roengzdaeuj, dienhvah baihhaenx couh cienz daeuj sing riu angqyangz ndeu. “Baezlaeng lij bae gauj lwi?” “Wnggai caiq bae ba.” Mwh gangj ok dapanq de mbouj ngeizlaengx saekdi. Bi 2016 bae gauj gaugaep gauj mbouj gvaq, bi 2017 bae gauj cunggaep gauj gvaq lo, bineix caiq bae deuqnyex “gaugaep”, neix gaenq dwg Vangz Leiz baez daihsam camgya Vahcuengh Sawcuengh Suij- bingz Gaujsi. 8 nyied 20 hauh, mwh ciepsouh gicej caijfangj, de cazyawj le gaujsi cingzcik, yienznaeuz gauj mbouj gvaq, hoeng neix dauq mbouj yingjyangj gij ndatcingz de hag Sawcuengh.

Vangz Leiz bineix ndaej 41 bi lo, de doekseng youq Hozciz Si Fungsanh Yen Sanhmwnzhaij Cin aen mbanj iq ndeu, Vahcuengh dwg vahcoj de, hix dwg cungj vah de nyinhnaeuz daengx seiqgyaiq ceiq gyaeundei ndeu. Yienghhaenx Sawcuengh ne? De ndaej 10 bi bihaenx, mwh siujyoz hwnj aen haggeiz goq Sawcuengh、camgya gunghcoz le ndaej vunz soengq hawj cek《SAWLOIH CUENGH GUN》ndeu、gaiqbaiz caeuq goengcieng Sawcuengh bingzseiz yawjraen haenx, lij miz doenghgij daez Vahcuengh Sawcuengh Suijbingz Gaujsi hwnj muengx caz ndaej daengz haenx, doenghgij neix cungj hawj de roxyiuj le Sawcuengh. Sawcuengh doiq de daeuj miz gijmaz yunghcawq ne? Mboujlwnh dwg gaxgonq dang gvaq Hozciz Si Douzswh Coicaenh Giz gizcangj, roxnaeuz seizneix dang boux secangj Hozciz Si Yizbau Se, doeng- gvaq Vahcuengh Sawcuengh Suijbingz Gaujsi mbouj dwg aenvih gunghcoz aeuyungh, lai baez bae camgya gaujsi, gij doenghlig de youh daj gizlawz daeuj ne?

“Gizsaed dwg miz di siengjfap he.” Doiq gij vwndiz gicej cam haenx, Vangz Leiz cungj nyinhcaen lauxsaed bae gangj. De roxnyinh, vwnzva Boux- cuengh goekdaej laegna, doenghgij sawloih raeuz ngoenznaengz yungh haenx caeuq fwen raeuz cungj ndei raixcaix, hoeng aiq dwg rengzvunz mbouj gaeuq roxnaeuz gizdieg sou- comz mbouj doengz daengj yinhsu, seizneix aen cang rom sawloih Sawcuengh caengz ndaej souhaeuj, roxnaeuz fanhoiz mbouj ndei geijlai. “Gij Vahcuengh gou nyi haenx lai dangqmaz, hoeng mbouj ndaej haemq ndei bae baij okdaeuj, beijlumj ‘hujdengdeng’ aen sawloih neix yungh vahdoj raeuz gangj okdaeuj sengdoengh dangqmaz, hoeng yungh Sawcuengh sij okdaeuj couh bienq- yiengh lo.” Vangz Leiz naeuz, “daeg- bied dwg gij soujfap fouq beij hingq ndaw fwen, lij miz “vahbyonj” raeuz, it、sam、haj cih baez byonj, de cij gangj gij singmeh cih daih’it、daih- sam、daihhaj, couh bienq baenz coenz ndeu roxnaeuz song coenz vahbyonj lo, neix ak raixcaix, neix ndaej gangj dwg cungj vah’amq ndeu, hix dwg cungj vwnzva ndeu, hoeng dangqnaj lij caengz raen miz vunz daj gij gakdoh Sawcuengh bae yenzgiu gijneix.”Danghnaeuz bonjfaenh rox yungh Sawcuengh, couh ndaej bae dienzbouj aen hoengq neix lo, yiengq gyoengq beixnuengx dauqcungz langhbaij gij vwnzva maenhndei Bouxcuengh.

Hag Sawcuengh lij miz aen yienzaen daegbied ndeu, couhdwg siengj yungh Sawcuengh daeuj geiq gij fwen daxmeh guh haenx. Daxmeh Vangz Leiz dwg boux canghfwen ndawbiengz ndeu, baez aj bak couh guh baenz fwen, caiqlij eu ndaej sengdoengh mizyinx lai, “Vihmaz mbouj geiq de roengzdaeuj ne?” Vangz Leiz naeuz, “beijlumj miz bouxhek daeuj daengz, (aeu fwen)heuh lwgnyez ndaw ranz baet deih、ndenq raemx、hai dou, couh lumj《SEI MOEGLAMZ》 ‘hai dou rug baih- doeng, naengh aen mbonq gok sae, naengh henz cueng daj roi, ciuq gingq nem vahenj’, caen dwg seng- doengh lai, hoeng mbouj miz vunz bae haivat gij doxgaiq neix, gou nyinh- naeuz hojsik lai, ndigah siengj nyinhcaen bae hag ndei Sawcuengh, baezlaeng miz gihvei le cingjleix doenghgij fwen neix okdaeuj.”

Camgya Vahcuengh Sawcuengh Suijbingz Gaujsi, dwg gij fuengsik Vangz Leiz hagsib Sawcuengh ndawde cungj ndeu, “Gaujsi ndaej genjcaz gij yienghceij caeuq naengzlig bonjfaenh, hix dwg cungj dauqhag caeuq hagsib ndeu.”