“Boh mwngz mbouj hawj gou naeuz hawj sou rox.”

Dingq coenz vah neix le, gou nanzsouh dangqmaz. Gou byaij haeuj ranzdajcaemx bae, aeu ndaej bat raemx raeuj ndeu, dawz bae daengz dangqnaj daxboh, naeuz:“Boh, gou bang mwngz swiq din ba.” Gangj dwk gou couh maeuq roengzbae lo.

Daxboh geizheih dwk yawj gou, lijdwg mbouj oksing, lijdwg mbouj dawz gij vah gou haeuj rwz, ronghda de gig vaiq youh senj daengz gwnz bauqceij gyangfwngz de bae.

Gou mboujguenj baenzlai, caj yo din de yaek duet hai de. Seizneix de gip lo, sing sang hemq naeuz:“Mbouj cinj ning haiz gou!” Fwngz gou lumj bungq deng dienh nei sikhaek sup dauq, daengx youq gyangmbwn.

“Duz nouguk daeuj hawj duzgaeq baiqcieng!” Daxboh naeuz.

“Boh, mwngz siengj gvaq wnq bae lo, gou mboujgvaq dwg siengj bang mwngz swiqswiq din ndwi.” Gij fanjying daxboh gou caeux couh liuh daengz lo, ndigah gou mbouj hozndat.

“Hw! Hw! Mwngz cawz le daeuj aeu ngaenz, lij rox daeuj guhmaz dem? ” Daxboh fokfofo dwk naeuz.

“Boh, haenx dwg mwhgonq, mwhgonq gou mbouj roxsoq, doiq mbouj hwnj.”

“Dai gaj mwngz! Miz baez dauqdaeuj dub hwet meh mwngz, mwngz aeu bae 500 maenz. Lingh baez dauqdaeuj dub mbaq gou, mwngz aeu bae 1000 maenz. Lij miz baez ndeu…… Baezneix dauqfanj mbouj doenghfwngz, naeuz, siengj aeu geijlai?” Daxboh mbwnjbak dwk naeuz. Gij vah daxboh saek dwk gou mbouj rox gangj maz.

“Baeuq ha, vah mbouj ndaej baenzneix gangj, yakdingq lai lo.” Daxmeh naeuz. Mbouj rox de seizlawz ndwn youq baihlaeng gou.

“Boh, gou caen mbouj miz gij eiqsei neix.” Gangj sat, gou caiq baez ndeu yiet fwngz, yaek duet ga haiz daxboh, hoeng fwngz gou caengz bungq daengz haiz de, couh deng din de dit dauq, fwngz gou caiq baez ndeu daengx youq gizhaenx.

Gou gag naeuz: “Mbouj dwg swiq din ma? Mwngz cungj siengj haeuj gaiq vaih bae! Mwngz cungj mbouj saenq gou, gou guh hawj mwngz yawj!” Baenzneix naemj le, gou couh din fwngz riengjret dwk caiq duet ga haiz de. Haiz de dwg haizbaengz gaeuq, unqmienmien, gou mbouj yungh maz rengz couh duet ndaej lo. Daxboh ganj mbouj gib doi.

Gahaiz baez duet, gou gyaengjanj liux: Geij mbaw bak maenz ngaenz daj ndaw haiz de doek okdaeuj, sanq youq gwnz gadieb loekeij, gou mbouj rox baenzlawz guh, nyengh dwk yawj daxboh……

Haidaeuz daxboh miz di naj- mong, ciepdwk youh hozgaek deng- deng, doeklaeng fouznaih dwk vix lingh gahaiz ndeu naeuz:“Ga neix lij miz geij bak maenz dem, dawz bae caez ba! Deuz! Vaiq di deuz!” Gangj sat, daxboh gingqyienz aeu din daeuj cengj mbaq gou. Gou liuh mbouj daengz de rox cengj gou, mbouj ndaej fuengz, deng de cengj laemx naengh youq gwnznamh.

Daxmeh raen yienghneix le, hat de naeuz:“Baeuq neix! Mwngz guh maz?”

Youq gwnz loh daeuj seiz, gou gig saenq ndaej gvaq gij damzdingz swhgeij, hoeng, seizneix daxboh baenzneix euq, baenzneix caenx gou deuz, gou ca di boedbaih lo, gou nyaenx mbouj ndaej sing sang coh de hemq:“Ngoenzneix dwg cietdaxboh, gou mboujgvaq dwg siengj bang mwngz swiqswiq din, gyo’mbaiq mwngz ciengx gou, cij dwg yienghneix ndwi. Mwngz mbouj swiq dangviz!” Gou gangj sat couh ndwn hwnj, yaek byaij deuz lo.

Hoeng daxmeh nik mbaq gou, gou youh deng maeuq roengz, yoengyoq youq dangqnaj daxboh, gou mbouj nyienh rah de, couh rah gvaq wnq bae.

Daxmeh byaij gvaqbae gip gij ngaenz, doq gip doq naeuz:“Baeuq hab dai neix! Gou baenzngoenz fugsaeh mwngz, mwngz lij yienghneix fuengz gou? Caen dwg simndei mbouj baenz saeh ha!” Daxmeh duet lingh gahaiz daxboh sou gij ngaenz ndaw haiz seiz, de yaep da “heuh” gou swiq din hawj daxboh.

Seizneix daxboh lij nyengh dwk, mbajmwdmwd. Gou laihnaeuz de hix lumj gou nei geiq mbouj ndaej cietdaxboh, roxnaeuz gaenbonj mbouj rox miz aen ciet neix.

Gou bik swhgeij hozroengz, dawz song faj din reuq daxboh ceh roengz ndaw raemxraeuj bae. Seizneix song faj din reuq neix caen gvai, mbouj miz saekdi doi, hix mbouj miz saekdi fanjgang, youzcaih gou caed, youzcaih gou nod. Gou mbouj gamj yawj daxboh, gou cij dwg ngaemgyaeuj nyinhcaen dwk caed din de.

Gou caed ha, nod ha…… Sawq- mwh “ngu ngu” sing daej yiengj hwnjdaeuj. Gou doeksaetyat, ngiengx- gyaeuj yawj daxboh, seizneix gwnz naj de hoij rim raemxda, de lumj boux nyez souh vei nei “ngu ngu” daej dwk, daej ndaej mug lae myaiz rih.

“Boh, gaxgonq dwg gou loeng lo, gou mbouj hauq, doiq mbouj gvaq!” Sing daej daxboh hawj gou nanzsouh dangqmaz, gou cijndei mboujduenh dwk nyinhloek.

“Ngoenzneix, goengbaeuq fatbag luba?” Daxmeh naeuz.

Gvaq yaep ndeu, daxboh dauq- daej nyaenx ndaej gij sing daej de lo, hoeng de lij daej genxhoz.

“Boh, gou hai aen diemq coih gyahden ndeu, seng’eiq haemq ndei, seizneix yienznaeuz mbouj miz maz cienzrom, hoeng saedceij lij gvaq ndaej bae, sou mbouj yungh vih dou causim lo.”

“Ndaek vunz naeuh…… naeuh mwngz! Mwngz laihnaeuz gou dawz di…… cienz mwngz daeuj aeu haeuj- rwz ha? Mwngz gag naeuz, daxboh daxmeh mwngz gyaeujdot daraiz…… mwngz cam gvaq lwi? Daxboh daxmeh mwngz lix roxnaeuz dai mwngz…… gvansim gvaq lwi?” Daxboh aenvih lij daej genxhoz, ndigah de vah mbouj baenz coenz dwk coeg naeuz gou.

Dingq gij vah daxboh gou najgaek liux, danghnaeuz seizneix miz gehnamh hawj gou ndonj couh ndei lo.

“Daeglwg mbouj dwg nyaengq ma? Vih gij gwndaenj ngoenznaengz nyaengq gwnz nyaengq laj, mbouj yungzheih ha!” Daxmeh gejnaeuz.

Gou ciq swiq din, ngaemgyaeuj mbouj gamj yawj daxboh.

Gvaq yaep ndeu, daxboh haemq dingh le naeuz:“Yahgeq ha, gij ngaenz haxbaenh hawj de ba! Gou dwg rom hawj gyoengqde ne.”

Daxmeh baez dingq sikhaek mbon daeh yaek aeu ngaenz hawj gou, hoeng deng gou lanz lo, gou naeuz:“Meh, seizneix gou goq ndaej ranz iq gou lo, mbouj aeu gij sou.”

“Aen diemq mwngz baenzlawz aeu ndaej roengzdaeuj ne?” Daxmeh cam.

Gou lawq yaep ndeu cij naeuz:“Daigvanj 30000 maenz cij aeu ndaej roengzdaeuj.”

Daxmeh dingq le caiq baez ndeu mbon daeh yaek aeu ngaenz hawj gou, hoeng youh deng gou lanz lo.

“Guh seng’eiq mbouj ndaej ‘gwn hek’ nw.” Daxboh gangj coenz vah neix seiz, naj de gig yenzsuz, yenzsuz ndawde lij miz gij hozndat gij vei haxbaenh, seizneix biujcingz de haemq labcab, hoeng yawj ndaej ok de gig yousim saeh gou.

Gou ngaekngaek gyaeuj, naeuz:“‘gwn hek’ dwg daet gij caizloh swhgeij, gou rox ne.”

“Dung dung dung” miz vunz roqdou, daxmeh bae hai dou.

Yienzlaiz dwg mehyah caeuq daeglwg gou daeuj lo. Songde baez raen daxboh naengh loekeij hix doeksaet liux.

Daeglwg cam:“Goeng, mwngz baenzlawz naengh loekeij ne?”

Daxboh naeuz:“Mboengqgonq goeng laemx mbat ndeu, hwet gvat lo, hoeng mbouj youqgaenj, gvaq geij ngoenz couh ndaej ndwn ndaej byaij lumj gyouh lo.”

“Goeng, gou hix bang mwngz swiq din.” Daeglwg naeuz.

“Lwg ha, mwngz caiq bae aeu bat raemxraeuj daeuj, mwngz bang daxbuz swiq.” Gou naeuz.

Daeglwg naeuz:“Ndei!” Sikhaek cienqndang yaek bae aeu raemx. Hoeng, daxmeh de nengh de dauq, naeuz:“Mwngz bae aeu daengq sang daeuj hawj daxbuz naengh, meh bae daek raemx.”

Daeglwg buen aen daengq sang ndeu daeuj an youq henz daxboh hawj daxmeh naengh. Song bouxlaux bingzbaiz naengh, gou bang daxboh swiq, daeglwg bang daxbuz de swiq.

Haxbaenh aen naj daxboh lijdwg byajraez fwn doek, seizneix gaenq dwg ndit ronghsagsag lo. Daxmeh naj riunyumnyum, ndaw da cix gamz raemx.

Yaek dauqbae seiz, gou laeglemx oet 500 maenz haeuj fwngz daxmeh bae, daengq de naeuz:“Daxmeh, gaiq gwn couh gwn, gaiq sai couh sai, gaej mbaet nw.”

Daxmeh gikdoengh dwk ngaek- ngaek gyaeuj.

（sat）