Gou bae haw dauqma,

Daengz henz dah,

Raen byagaq ciuz raengz,

Muengx vanq hix mbouj daengz,

Caen heiqraeng,

Saeng yaemz hix mbouj haeuj.

Beix raen duz byaleix,

Gij ngoenz neix,

Langh geiz youq gyang raengz,

Dangh beix goj simmaengx,

Naihsim daengj,

Dwk ma daemz raeuz ciengx.

Fwngz gaem muengx caeuq saeng,

Ngoenz riengz haemh,

Siengj bae yaemz byaleix,

Vih fukheiq mbouj ndei,

Caen fatheiq,

Deng de biq ok fwngz.

Byaleix youq gyang raengz,

Mwngz bae daengz,

Ngonz raen fwngz couh coemj,

Ndaej dawz mbouj cuengqsoeng,

Ra ndei ngoenz,

Dawz ma daemz raeuz ciengx.

Nuengx baenz duz byavanx,

Caen ndeiyiengh,

Goj youz youq ndaw raengz,

Gou ngamq byaij bae daengz,

Duz ngonz raen,

Ndonj haeuj laeg bae ndoj.

Bya youq ndaw raemxsaw,

Cwxcaih youz,

Mwngz vihmaz mbouj coemj?

Caiq gvaq song sam ngoenz,

Raemx bienq doengq,

Mwngz cij hoengh biet gen.

Sam nyied raemxfwn doek,

Duz bya’ndoek,

Youq raemxgoek ciuz daemz,

Gou lumj duz hanqmbwn,

Ngoenz doek ngoenz,

Youq baihgwnz ngonz byouq.

Sam nyied raemxfwn roengz,

Bya baenzgyoengq,

Roengz doengh bae gwn faeuz,

Beix mwngz goj siengj aeu,

Ok geiqmaeuz,

Daeuj laj dah bae cang.

Raen gyoengq bya guh haw,

Dauqcawq youz,

Hoz bouxlawz mbouj siengj,

Fwngz gaem saeng caeuq muengx,

Nyinhcaen muengh,

De cix cuenh haeuj laeg.

Ndwen caet bya miz lai,

Youq laj fai,

Dangh mwngz gvai couh dwk,

Daengz seiz raemxdah mboek,

Bya haeuj laeg,

Mwngz siengj dwk mbouj ndaej.

Gou raen duz byavanx,

Youq lajdan,

Gou couh cang song mbiengj,

Naih dawz song sam ndwen,

Ngamq sou muengx,

Duz cix bienq ngwzheu.

Cib nyied raemx doiq heih,

Bya langh geiz,

Beix miz sim couh cang,

Daengz duz ndonj haeuj gamj,

Mbouj okndang,

Mwngz couh beg dawzcaj.

Raen byaleix guh haw,

Dauqcawq youz,

Hoz bouxlawz mbouj muengh,

Vunzvunz cang saeng muengx,

Dawz baenz ndwen,

Rox duz hwnj mbiengj lawz?

Gominz cib caengz byak,

Naihsim bok,

Daengz seiz gag daengz ndaw,

Caj raemx doengq dauq saw,

Mwngz daeuj yawj,

Bya lix dawzcaj beix.

Bya riengz raemx bae gyae,

Ndaej langh geiz,

Vit lwgsae gwnz hawz,

Mbouj miz vunz daeuj cawx,

Gou gag dawz,

Dai gwnz hawq dangxgaemz.

Byaleix youq bakmboq,

Cingq dawz go,

Dangh mwngz rox couh cang,

Hawj duz diuq roengz dan,

Ndonj haeuj gamj,

Mwngz couh beg gam de.

Gou hix siengj bae dwk,

Saed lwnh mwngz,

Mbouj miz daemz daeuj ciengx,

Ndawsim gou hix siengj,

Lwnh mwngz nuengx,

Ra yienghyiengh mbouj miz.

Beix raen duz bya neix,

Bya bonjdeih,

Leix dwg leixhoengzgeiz,

Dangh beix hoz caen ei,

Lwnh mwngz beix,

Mbouj feiq geijlai ngaenz.

Daengngoenz hwnj baihdoeng,

Youq gwnzmbwn,

De hoengz baenz gyaeq maeq,

Naih souj song ngoenz neix,

Daengz seiz ndei,

Ndaej byaleix maranz.

Dwkbya aeu naihsim,

Gou nyinhcaen,

Dawz cib ngoenz cib haemh,

Ndaej bya maranz gwn,

Sim ceiq maengx,

Lumj gwnz faengx caemj dangz.