Aenfoux gyongnaezhenj dwg cungj foux denjhingz minzcuz ndaw- biengz ndeu, cujyau liuzhingz youq Gvangjsih Bouxcuengh Swcigih Ginhsiu Yauzcuz Swciyen, daengz seizneix gaenq miz cien bi lizsij. Bi 2011 ndaej Gozvuyen goengbouh guh feihvuzciz vwnzva yizcanj.

gyongnaezhenj cujyau youq Yauzcuz conzdungj hozdung saxcaeq Banzvangz seiz biujyienj, biujdap doiq goengcoj Banzvangz gij ciengz- eiq gingqeiq、siengjniemh caeuq saxcaeq de, baijok lwgminz Yauzcuz gij cingsaenz gaenxguh caeuq daihdamj.

Ndawbiengz Yauzcuz riuzcienz gij gojgeq gyongnaezhenj: Youq ciuhgonq lailai, mbanj Yauzcuz miz bouxlaux ndeu, de ciengzseiz daiq daeglwg hwnj bya bae dwkdaeu. Miz mbat ndeu, bouxlaux youq bangxdat deng duzyiengz caenx roengz dat bae dai lo. Vih diuqniemh bouxlaux neix, daeglwg de couh bok roengz naeng duzyiengz goemq youq diuz faexroz cungqgyang hoengq ndeu roq. Gvaq- laeng, Mbanjyauz danhfanz bungz- daengz sangsaeh, cungj aeu roq cungj gyong neix biujsiq diuqniemh. Cungj diuqniemh fuengsik neix menhmenh yenjva, daengz seizneix, danhfanz daengz ciet、goengsae guhfap、angqhoh fungsou、saxcaeq gouzfuk roxnaeuz guhsang daengj ciengzhab, lwgminz Yauzcuz cungj aeu biujyienj gyongnaezhenj.

Gyongnaezhenj dwg cungj yozgi ndawbiengz Yauzcuz lwgminz ciengzyouq byalaux haenx maijgyaez ndeu. Gyongnaezhenj dwg yungh gij faexbaudungz unq nyangq youh fuengbienh haenx, vat hoengq song gyaeuj guhbaenz. Miz gyongmeh、gyongboux song cungj. Gyongboux hwet raez, gyongmeh hwet dinj, song gyaeujgyong yiengh lumj loxlez. Cungj gyong neix ceiq miz daegsaek haenx dwg: Aeu yungh gij naez- namhhenj byalaux dieg Yauz daegmiz haenx, daeuj boiq youq gwnz najgyong cij dingh ndaej cinj sing. Ndigah vunzlai couh heuh de guh gyongnaezhenj. Gij najgyong yungh naeznamhhenj boiq gvaq le, sing hungseuq youh ndeidingq, cienz geij leix gyae.

Aenfoux gyongnaezhenj youq ndaw foux minzcuz gig daegbied, itbuen aen gyongmeh doxboiq seiq aen gyongboux gyoebbaenz gyoengq- foux. Gyongmeh venj mbat youq gwnzaek, yungh song fwngz roq, gyongboux cix dwg dawz daengj youq gyangfwngz, yungh fwngzswix roq, dungcoz riengz yinhyoz bienqvaq, yiengh foux maenh’ak cwxcaih.

Gyongnaezhenj roq yiengj liux le, geij boux dahsau dajcang ndaej gyaeundei haenx, fwngz dawz suj- baqva, caij haeuj giz gyong bae concap youq ndawde, doq go doq foux, seiz gauhcauz, bouxyawj mbouj rox mbouj nyinh gyahaeuj ndaw gofoux bae. Gyongboux caeuq godoih humx gyongmeh youq cungqgyang, couhlumj ndaundeiq humx rongh- ndwen ne, gyongmeh youh seiz mbouj seiz caeuq gyongboux doxdoiq roq, hawj gij ciengzmienh angqyangz raixcaix.

Diuq aenfoux gyongnaezhenj ciengzmienh ceiq nauhyied dwg “ciet Banzvangz”. “Ciet Banzvangz”(itbuen dwg liggaeuq bet nyied cibngux gawjbanh) dwg ciet conzdungj Yauzcuz. Vih geiqniemh cojcoeng bonjfaenh——Yauzvangz, gyoengqvunz daiq gij gyongnaezhenj maijgyaez haenx daj baihrog geij goengleix ganj daeuj camgya aen ciethoengh neix.

Ginhsiu Yauzcuz Swciyen Luz- gangj Yangh Luzgangjcunh mbanj Yagujcinz boux vunzmbanj Banz Cinsungh lai bi daeuj yunghsim guh gij hong aenfoux gyongnaezhenj baujhu caeuq cienzciep. Bi 2009、2012, Banz Cinsungh gonqlaeng ndaej minghmingz guh swcigih gaep caeuq gozgyah feih vuzciz vwnzva yizcanj hanghmoeg “Yauzcuz cangzgujvuj (aenfoux gyongnaezhenj) daibyaujsing vunzcienzciep”. Youq de yingjyangj dauqlaj, ndawmbanj guhbaenz cienzhag gihdi, caemhcaiq youq bi 2013 ndaej hwnj aen daizheiq yanghsi “sim lienz sim”.