Gou naengh gwnz sahfaz yawj densi.

Mehyah youq ndaw ranzdajcawj cawj haeuxcaeuz, cij dingqnyi sing gucanj caujbyaek “gvangdang gvang- dang” yiengj dwk.

Songdou dwg cizgungh cangj- guhceij. Aen cangj neix 3 bi gonq gaenq doekbaih lo. Caengz doekbaih gaxgonq 2 bi, aencangj lumj bouxvunz yaek goenqsai nei, miz heiq mbouj miz rengz——cienzhong mbouj ndaej ciuq soq fat hawj gyoengq cizgungh, saek ndwen lij mbouj miz cienzhong fat dem. Gij saedceij gyoengq cizgungh cangjguhceij hoj gvaq lai lo. Aencangj baez doekbaih, cizgungh mboujdan mbouj ndaej saek faen cienzhong guh swnghhozfei, lienz cienzciengxlaux、cienzyihbauj cungj hawj cizgungh gag bae gyau, gwndaenj mbouj miz gaiq baengh, gij haemzhoj gyoengq ciz- gungh mbouj rox baenzlawz gangj, daj gizlawz gangj.

“Daxboh daxmeh, gou ma lo.” Daeglwg doeg siujyoz sam nienzgaep haenx, baez haeuj ranz couh hemq. Daeg neix bingzseiz vah noix, hoeng de haemq manz, youq hagdangz ciengz nyex saeh, gou ciengzseiz ciep ndaej gij denva lauxsae gauq de. Seizneix de baez haeuj ranz couh gyotgyaugyau dwk dongx dou, gou miz di mbouj gvenq. Gou yawj de da ndeu, laihnaeuz caeuq bingzciengz miz maz mbouj doxdoengz, gou “o” sing ndeu, gig vaiq couh veq naj dauqdaeuj laebdaeb yawj densi.

Daeglwg dawz daehsaw gveng youq gwnz sahfaz le, couh haeuj ranzdajcaemx bae, yaepyet, de dawz batraemx ndeu daengz dangqnaj gou naeuz:“Boh, gou bang mwngz swiq din. Gangj sat, de nengh aen daengqdaemq henz ndang de daeuj naengh, gaendwk ngiengxgyaeuj daeuj yawj gou, gij riunyumj oiqet gwnz naj de gig dwggyaez.

Gou cix doeksaet dwk cim de, cim yaep ndeu, gou cam:“Ngoenzneix mwngz youq hagdangz youh guhmaz saehrwix moq lo?”

“Ngoenzneix gou mbouj guh saehrwix.” Daeglwg haengjdingh dwk dap.

“Mbouj guh? Caen mbouj guh saehrwix?” Gou mbouj saenq, caiq cam.

“Caen! Danghnaeuz gou nyex saeh, lauxsae caeux couh bauq hawj mwngz lo.” Daeglwg damzdingz dwk gangj.

“Hix dwg bw. Haenx youh dwg maz saeh o? Gangj vei!” Gou gag roxnyinh de itdingh miz saeh.

“Mwngz siengj ndaej baenzlai. Gou cij dwg siengj bang mwngz swiqswiq din ndwi.” Daeglwg gag riu dwk naeuz.

De gangj sat, song fwngz buen dinswix gou yaek coq roengz batraemx bae. Gou yied naemj yied mbouj deng: Laeq nyez neix haengjdingh miz saeh, mboujnex de mbouj rox aeu swiq din daeuj bungj gou? Gou mbouj ndaej hawj gij yaemmaeuz de ndaej baenz bw. Baenzneix naemj le, gou sikhaek daj ndaw fwngz de yut din dauq, dieb youq gwnzdieg maenhmaenh bae.

“Mwngz mbouj gangj cingcuj gou mbouj swiq!” Seizneix gou caen hozndat, sing gangj caemh sang lo. Gou hozndat laeq nyez neix, nienzgeij oiqoiq ndawsim couh “miz fangz”, rox daeuj maeuz daxboh de, ngoenzlaeng lij baenz lwg dem ha?

Mehyah youq ndaw ranzdajcawj ndaejnyi gij vah gangj songdou, couh buet okdaeuj yawj dou, fwngz de lij gaem gucanj ne, de naeuz:“Lwg ha, mwngz miz maz saeh couh gangj ba! Mbouj yungh diem laeng diem naj ne. Miz saeh raeuz itheij doxyaeng.”

Siengj mbouj daengz daeglwg fatheiq lo, sing sang hemq naeuz:“Vihmaz sou cungj mbouj saenq gou? Ngoenzneix dwg ciet daxboh, lauxsae daengq naeuz maranz le bang daxboh swiq din, gyo’mbaiq bohmeh ciengx lwg hung son lwg gvai.” Daeglwg gangj daengz neix, raemxda gaenq dawz- gvaengz lo, aiq dwg mbouj siengj hawj dou raen gij raemxda de ba, de ngaemgyaeuj roengzdaeuj, da cim batraemx, huj dwk gemj bongz- boebboeb……

Gou caeuq mehyah doxcim, maezgaeq dwk…… Songdou baenz- ngoenz vih gij gwndaenj nyaengqfofo, baenzlawz ndaejgeiq doengh gij ciet neix ha.

Caj daengz gou roxsingj le, gou couh lienzmuengz gag dawz song din coemj roengz batraemx bae, naeuz:“O! O! Ciet daxboh! Ngoenzneix dwg ciet daxboh! Mwngz mbouj gangj dou couh lumz lo. Daeuj, daeuj bang lauxdaeuz mwngz swiq din!”

Lij ndei, daeglwg raen gou baenzneix gangj mbouj caiq baetniuj, de nyinhcaen dwk caed song faj din haeu gou, song fwngz iqet de baez nunod, lajdin gou yienznaeuz miz di yukyiem hoeng gig cwxcaih. Raemx swiq din gig raeuj, raeuj daengz cienzndang bae. Gou yiet fwngz momo aen gyaeuj de, sing unq naeuz:“Daeglwg gou roxsoq lai lo.” Mbouj rox mbouj nyinh, raemxda gou hix dawzgvaengz lo, hoeng, gou mbouj hawj raemxda doek okdaeuj.

Mehyah lij maezgaeq dwk ndwn youq gizhaenx yawj songdou, gou daeuq de naeuz:“Byaek lem lo, byaek lem lo!”

Mehyah lumj guh fangzhwnzloq ngamq singj nei, muengz “o o” song sing couh buet haeuj ranzdajcawj bae.

Gou caeuq daeglwg nyaenx mbouj ndaej “he he” riu dwk. Daeg- lwg yiengq ranzdajcawj hemq:“Daxmeh, gwn caeuz sat le, gou hix bang mwngz swiq din, mwngz mbouj yungh haenh daxboh.”

“Ndei! Ndei lai lo!” Sing mehyah daj ranzdajcawj cienz okdaeuj.

Swiq din sat le, gou muengz- muengz yaek okdou, gou daengq mehlwg songde gwn caeuz gonq, mbouj aeu deq gou lo.

Daeglwg cam:“Daxboh mwngz bae gizlawz?”

Gou dap naeuz:“Bae yawj dax- goeng daxbuz mwngz.” Gangj sat gou couh okdou lo.

Daxboh gou hix dwg cizgungh cangjguhceij, de caeux couh duiyouh lo. Daxmeh gou dwg bouxguhreihnaz. Songde nienzgeij gaenq 70 lai bi lo. Daxboh duiyouh le, songde youq laeuzsuzse gaeuq ndaw cangj youq, gou gaenq miz buenq bi mbouj bae yawj songde lo.

Gangj daeuj caen dwg najmong, mwh cangjguhceij ngamq doekbaih mboengqhaenx, gvanyah gou caengz ra ndaej hong wnq, saedceij hoj raeuh, gou mbouj goq naj dwk seiz mbouj seiz bae vat gij ngaenzduiyouh daxboh. Gizsaed ngaenzduiyouh de gig noix, ngamq gaeuq songde gwndaenj, noix miz ngaenzlw. Miz song baez daxboh caen mbouj miz cienz bang gou, gou gingqyienz caeuq de fanjnaj, lij baetniuj mbouj bae yawj songde dem. Moix baez siengj daengz neix, gou caen mbouj miz naj raen vunz.

“Dung dung……” Gou roqdou haemq nanz, dou cij hai, dwg daxmeh hai dou. Daxmeh raen dwg gou, sien dwg doeksaet, gaendwk gig angq, gip naeuz:“Haeujdaeuj, haeuj ranz daeuj!”

Buenq bi mbouj raen daxmeh, daxmeh lumjbaenz beij mwhgonq engq gungj nei, seizneix gou roxnyinh simdaeuz cihgeij ndaetndet.

“Meh, sou gwn caeuz caengz?” Gou cam.

“Gwn gvaq lo.” Daxmeh dap naeuz.

“Daxboh ni?” Ndaw ding ndaw rug cungj mbouj raen daxboh, gou couh cam daxmeh.

“Daxboh mwngz youq yangzdaiz gizde.” Daxmeh vix naeuz.

Gou byaij gvaq rugninz daeuj daengz yangzdaiz. Mbwn ha! Boux neix dwg daxboh gou ha? Buenq bi mbouj raen, daxboh gou baenzlawz naengh loekeij lane? Seizneix daxboh cingq yungh gingqfangda daeuj yawj bauqceij.

“Boh, gou daeuj lo.” Gou sing daemq dwk naeuz, sing gou daemq lumj duz nengznyaen hongz nei.

Daxboh ngiengxgyaeuj daeuj yawj gou da ndeu, lumj mbouj dawz gij vah gou haeuj rwz, mbouj oksing, gig vaiq youh ngaemgyaeuj yawj gij bauqceij ndaw fwngz de lo.

Gou byaij dauq ndaw ding cam daxmeh:“Daxboh baenzlawz naengh loekeij ne?”

“Mboengqgonq boh mwngz laemx mbat ndeu, hwet gvat lo.” Daxmeh naeuz.

“Mbouj bae yihyen yw ha?” Gou cam.

“Bae ne. Soujsuz hix guh gvaq lo, canghyw naeuz ndaej dauqranz menh ciengx ndang le, dou couh ma lo.” Daxmeh naeuz.

“Daxboh lij ndaej ndwn hwnj lij ndaej byaij lw?”Yienznaeuz gou caeuq daxboh ciengzseiz doxceng, hoeng, seizneix gou caensim vih gij ndangdaej de yousim.

“Canghyw naeuz ndaej. Mbouj- gvaq nienzgeij hung le aeu seizgan nanz di cij ndaej fukdauq lumj gyouh.” Daxmeh naeuz.

“Ok cungj saeh neix, mwngz hix mbouj gangj hawj gou saek coenz.” Gou gvaiq daxmeh, gizsaed dwg gvaiq cihgeij mbouj gvansim bohmeh.

（caengz sat）