Youq Lingzyinz Yen, Yauzromj aenvih daenj gij buhvaq cungj dwg yungh baengzdoj nyumx gvaq romj haenx daeuj guhbaenz cij ndaej- mingz. Youq 20 sigij 80 nienzdaih gaxgonq, dingzlai ranz Yauzromj Lingzyinz Yen cungj rox ndaem goromj、guh romj、nyumx baengz daeuj gai aeu ngaenz, daengz seizneix lij miz mbangj ranz cienzswnj ndaej gij dinfwngz nyumx baengzromj daj geqlaux couh cienz roengzdaeuj neix.

Seizneix, youq aen yienh hung Yauzromj comzyouq neix, lij rox dinfwngz nyumx baengz haenx, cijmiz Mbanjnazbo aen Mbanjyauz iqiq neix lo. Youq ndaw mbanj, Buzlij, boux bisoq ceiq laux, daiq dwk “gyoengq hagseng” de, coh gicej langhbaij le gij dinfwngz cienzdoengj Yauzromj.

Baenz doi nga’nge goromj ngamq daj gwnz bya mbaet roengz- daeuj haenx, deng ceh roengz gyang daemzraemx hunghung bae, gyoengq mehmbwk Mbanjnazbo youh dwk hoi roengz daemz bae, yienzhaeuh gaprengz aeu faexsaux daeuj gyongz、ndau aen daemz, raemxdaemz gig vaiq couh daj heu bienq lamz lo, cuengq gij baengz hau roengzbae hix gig vaiq couh nyumx ndaej hwnj saek, hoeng gijneix dan dwg nyumx baengz bouh daih’it. Youq gyang gangraemx iq ranz Buzlij, gij baengzdoj nyumx gvaq romj haenx lij aeu gya roengz lwedmou daengj doxgaiq, caemhcaiq aeu fanfoek dak gvaq caeuq ceh gvaq, doxgek geijlai nanz caeuq geijlai baez cungj miz yiemzgek gvidingh. Cungj dinfwngz neix, mboujdanh gaujniemh rengz- ndang caeuq naihsim, engqgya dwg cungj gingniemh boux cienz boux ndeu.

Youq Mbanjnazbo, cawz le mehmbwk、bouxlaux caeuq lwgnyez, gig noix ndaej raen bouxsai oiq. Aenvih aen mbanj neix dieg youq giz byarin, doemnamh nyaengq lai, ndaem mbouj ok gijmaz loegcak ndei. Bouxsai cungj ok rog bae ra gwn, lwgmbwk hix dingzlai bae dieggyawj dajgoeng. Gaenh bi daeuj, baengh ndaej dangdieg cwngfuj caeuq sevei gak gyaiq bangcoh, mehmbwk dangdieg ndaej naihsim naengh roengzdaeuj hag aen din- fwngz neix. Aen dinfwngz cienz- doengj neix, cix hawj gyoengqde daiq daeuj le soundaej loeklak. Aenvih Yauzromj daengx Guengjsae cijmiz mbanj de lij rox dinfwngz nyumx baengz cienzdoengj, ndigah Yauzromj seiqfueng bet baih cungj daeuj mbanj de cawx baengz.

Lij Siunen, boux hagseng Buzlij ceiq daekeiq haenx lwnhnaeuz gicej, Mbanjnazbo seizneix miz 30 lai ranz Yauzromj, ranzranz cungj ndaem goromj daeuj guh romj, caiq yungh romj daeuj guh baengz guh buhvaq gai. De lij gangjgej le baenzlawz guh romj caeuq nyumx baengz: Bae doz aeu goromj daeuj le, ceh roengz daemzromj bae 5 daengz 10 ngoenz, yienzhaeuh vax gij nyaqfeiq okbae, dawz 10 goenggaen hoi dwk roengz daemz bae hoedgyaux 30 faencung, hawj de yaemz geij ngoenz giet baenz ndaek romj, mwh nyumx baengz aeu gij ndaek romj neix cuengq roengz gyang doengj bae, gya raemx habngamj, doeklaeng dawz gij baengz cuengq roengzbae ceh 10 aen cungdaeuz baedauq, yienzhaeuh dak hawq, cungzfuk song baez couh guhbaenz.

Aenvih miz dinfwngz ndei、baengz maenh、saek gyaeu、naih daenj daengj ndeicawq, gij huq neix ndaejdaengz Yauzcuz Fungsanh、Dunghlanz、Yougyangh gih daengj gaenhgyawj yen gih maijgyaez, lij miz vunz riengzmingz ganj daeuj dinghguh、cawx buhvaq dem. Lij Siunen gaisau, bit baengz ndeu guh ndaej 4 geu buh, gai ndaej 600 maenz, baengh gai baengz、gai buhvaq、gai romj daengj, ranz ndeu baenzbi couh souhaeuj sam fanh maenz. Dinfwngz nyumx baengz cienzdoengj bienqbaenz le hangh cujyau ginghci souhaeuj dangdieg mehmbwk Yauzcuz, dwg diuz daeuzloh ndei hawj lajmbanj bienqfouq.