Seizneix, ndaw mbanj gou bienqvaq hungloet, ndaem miz haujlai faex haujlai va, diuzdiuz roen cungj aeu suijniz guh baenz, dauqcawq ndei byaij raixcaix. Hoeng, mboujcaengz gaijgwz hailangh seizhaenx, mbanj gou mbouj dwg yienghneix.

Ndaej geiq, gou lij iq seizhaenx, ndawranz cien gungz fanh gungz, ciengzseiz baenz ndwen mbouj miz saek gaiq noh gwn. Daxboh caeuq daxmeh haet hwnq vaiq ok rog guhhong, haemh maranz laeng. Gou caeuq daegnuengx miz mbangj baez iek mbouj miz gwn, song boux iq cij ndaej gag cawj souh. Daxmeh ngoenzngoenz guhhong sinhoj le, ma daengz ranz mbouj haengj gangj vah geijlai. Daxboh gueng mou le, gwn vanj haeux, couh vaiq bae ndaw naz gonh raemx lo. Dou ceiq haengj fwn doek, fwn doek gwnz loh miz haujlai raemx, dou couh caij raemx angq raemx, angq dwk buhvaq mbaeq- mboetmboet. Daxboh daxmeh coengz- lai mbouj ndaq dou gvaq, aenvih gyoengqde caen sinhoj, mbouj miz seizgan guenj dou.

Ndawranz haemzhoj baenz haujlai bi, bohmeh gou sinhoj haujlai bi. Miz baez ndeu, yangh cwngfuj daeuj mbanj dou son vunzmbanj gohyoz dajndaem, bohmeh gou ndaejnyi, couh bae hag. Bi daih’it, couh gai byaek canh ndaej 50000 maenz. Daxboh naeuz hawj bohlungz yangh cwngfuj gij gohyoz dajndaem ndaej canh ngaenz. Ndaw mbanj vunz boux cienz boux, gyoengqvunz cungj gaen bae hag gij gisuz neix. Mizmbangj ndaem mak, mizmbangj ndaem haeux, mizmbangj ndaem byaek. Ciemhciemh, ndaw mbanj vunz bouxboux swnghhoz suijbingz daez- sang lo, gak ranz cungj cawx ndaej noh gwn, miz buh moq vaq moq daenj. Ausam gou cawx ndaej aen dohlahgih, hwnq ndaej sam caengz laeuz, caiq aeu ndaej yah gyaeundei ndeu. Buzsam angq raixcaix.

Miz yangh cwngfuj daiq mbanj dou gohyoz dajndaem, vunzmbanj swnghhoz caen bienq ndei. Seizneix mbanj dou bouxboux cungj ndaej hwnq ranz moq, miz ciiq. Bouxlaux cungj mbouj yungh guhhong, lwgnyez couh miz vunz daiq. Bi’gvaq youq mbanj dou hwnq ndaej aen yozyau hung ndeu, lwgnyez doegsaw gig fuengbienh.

Gou caen docih dangj caeuq cwngfuj, hawj gij swnghhoz suijbingz mbanj dou ndaej daezsang. Bouxboux cungj yiengjsouh daengz gij ndeicawq gaijgwz.