Boux riengz laeng de haenx couhdwg Veiz Yenbingz, Veiz Yen- bingz daj ngoenz raen boux hauxseng da naj lumj daxboh de, couh haengjdingh boux hauxseng neix dwg daxboh caeuq mehmbwk wnq seng. Vih ra daengz baengzgawq, Veiz Yenbingz gyajcang naeuz cihgeij maranz, saedcaih laeglemx riengz laeng daxboh, yawj daxboh de bingzciengz bae raen byawz.

Gvaq le diemj cung ndeu, Veiz Yenbingz riengz laeng daxboh de ma daengz aen mbanj ndeu, boh de haeuj ranz bae le, de hix laeglemx haeuj ranz bae. Laeglemx yawj haeuj ndaw bae, Veiz Yenbingz yawjraen boux hauxseng ngoenzhaenx gai dangzrwi haenx, lij miz naih mehmbwk 50 bi baedauq ndeu ninz gwnz mbonq. Mwhhaenx, daxboh doiq hauxseng naeuz:“Mboengqneix, gij bingh dax- meh mwngz lai ndei di ba? Gij doxgaiq neix louz hawj sou, gwn ba!”

Veiz Yenbingz youq luengq rog dingqnyi gij vah neix, couh cienzbouh rox lo. Yenzlaiz daxboh caen dwg youq diegrog ciengx mbwkyoux, itseiz, de saet gij laex, cung haeuj ndawranz bae, ciengj aeu gij doxgaiq ndaw fwngz daxboh, vit roengz dieg bae, daihsing rongx:“Yenzlaiz cungj dwg caen, mwngz caeux couh youq diegrog miz mbwkyoux, miz lwgmbauq, daxmeh gou dwg baenzlawz dai gou rox lo. Gou haemz dai mwngz lo!” Vunz ndawranz cungj hawj Veiz Yenbingz gij vah neix haep lau liux lo. Veiz Yiz gik ndaej naj heu caez, naeuz:“Mwngz baenz- lawz lo, vihmaz baenzneix?”

Dingz ndaej yaep ndeu, Veiz Yiz couh naeuz:“Gawqyienz mwngz cungj rox lo, couh hawj mwngz rox gij saedsaeh ba!” Veiz Yiz couh fwngz vix daeg hauxseng naeuz:“De dwg daeggo mwngz, coh heuh Veiz Damingz, boux ninz youq gwnz mbonq dwg mehciengx daeggo mwngz.” Ciepdwk, Veiz Yiz couh gangj gij saeh 20 geij bi gaxgonq okdaeuj.

Yenzlaiz, Veiz Yenbingz mbouj dwg daeglwg Veiz Yiz caenseng, Veiz Damingz cijdwg daeglwg Veiz Yiz caenseng.

20 geij bi gaxgonq miz ngoenz ndeu, Veiz Yiz caeuq mehyah daiq daeglwg Veiz Damingz bae haw caemz. Youq gwnz roen maranz raen miz daeg lwgnding deng vunz vit youq henz roen, gvanbaz aenvih ndawranz ginghci gunnanz, mbouj gamj gip lwgnding neix daeuj ciengx, hoeng daeglwg ngamq ndaej 5 bi Veiz Damingz rag fwngz bohmeh aeu dawz lwgnding haenx maranz ciengx. Veiz Yiz gvanbaz couh yienghneix dawz lwgnding neix umj dauqma ciengx, an mingz guh Veiz Yenbingz.

Hoeng, mwh youq Veiz Yenbingz ngamq ndaej bi ndeu seiz, ndaej cungj bingh geizheih ndeu, song gvanbaz mbouj miz ngaenz yw, couh ra daengz laenzgaenh mbanj boux canghyw ndeu. Boux canghyw neix naeuz:“Yw ndei gij bingh mbouj aeu cienz, hoeng, aeu daeglwg 5 bi sou daeuj guh lwgciengx gou. Danghnaeuz gvanbaz sou mbouj doengzeiq, couh mbouj yw bingh lwg neix.”

Seizhaenx, Veiz Yenbingz mbouj ndaej gibseiz yw bingh, couh yaek dai lo. Baenzlawz banh? Mbiengj ndeu dwg lwg caenseng, mbiengj ndeu dwg lwgciengx ciengx ndaej bi ndeu. Couh youq seiz gip neix, Veiz Damingz lumjbaenz yawj rox gij simsaeh bohmeh, hamz raemxda gangj:“Caenh aeu yw ndaej bingh daegnuengx, gou nyienh guh lwgciengx songde.” Yienghneix, gij bingh Veiz Yenbingz yw ndei lo, Veiz Damingz hix baenz lwgciengx boux canghyw, gaij mingz guh Cinz Damingz.

Mbouj geij nanz, daxmeh Veiz Damingz aenvih siengj lwg daiq lai baenzbingh gvaqseiq lo. Veiz Damingz bi siujyoz bizyez seiz bohciengx hix baenzbingh gvaqseiq lo. Mehciengx ndangdaej itcig mbouj ndei, Veiz Damingz aenvih ranz hoj couh mbouj bae doegsaw lo. Veiz Yiz soengq Veiz Yenbingz doegsaw, doiq Veiz Damingz couh goq mbouj ndaej lo.

Veiz Yenbingz gauj hwnj dayoz bihaenx, Veiz Yiz hix mbouj miz cienz soengq lo, mbouj siengj hawj Veiz Yenbingz hwnj dayoz. Hoeng, Veiz Damingz rox le mbouj doengzeiq, dawz gij ngaenz cihgeij comz yaek aeu yah laeglemx hawj Veiz Yiz soengq daegnuengx hwnj dayoz, gij saeh neix Veiz Yenbingz coengzlaiz mbouj rox. Veiz Damingz mbouj miz ngaenz, mehciengx youh ciengzgeiz baenz- bingh youq mbonq, mbouj miz saek dahsau nyienh haq hawj de gvaq saedceij hoj, ndigah daengz seizneix de lij caengz aeu ndaej yah.

Veiz Yenbingz dayoz bizyez le miz hong miz souhaeuj, Veiz Yiz dawz gij ngaenz Veiz Yenbingz bingzseiz hawj mbaet roengzdaeuj, boiz hawj Veiz Damingz, gij buhvaq haenx couhdwg de aeu bae gai ndaej ngaenz le hawj Veiz Damingz.

Gizsaed, Veiz Yiz mbouj nyienh bae ndaw singz riengz Veiz Yenbingz caemh youq, caencingq yenzyinh dwg mbouj cuengqsim Veiz Damingz ya!

Dingq gij vah daxboh le, Veiz Yenbingz lumj loq ngamq singj nei, fouzfap nyaenx simcingz gikdoengh, rag fwngz Veiz Damingz rongx dwk naeuz:“Go, cungj dwg aenvih gou, mwngz cij deng baenzlai haemzhoj ya!” Gangj dwk, caeux couh raemxda laebyoegbyoeg, gangj mbouj baenz coenz.

（sat）