Bi 2008 ndwen 8, vih angqhoh Baekging Auyinvei haimuq, aen “venzvuengz” sang miz 10.5 mij, naek miz 219.5 goenggaen, daj bwh caizliuh daengz guh baenz, yungh bae ndwen lai seizgan ndeu, youq gwnz aen hozdung angqhoh Baekging Auyinvei haimuq youq Yungzsuij Myauzcuz Swciyen banh haenx “lohnaj”, yinxhwnj gingdoengh; youq mboengq seizgan Baekging Auyinvei haenx youq Yungzsuij Minzcuz Gvangjcangz langhbaij, vunzlai cungj bae cimyawj.

Aenvenz heuh vuengz ndaw vuengz daihneix、aenvenz ceiq hung gwnz seiqgyaiq neix, cingq dwg youz Liengz Bingjgvangh boux saefouh Myauzcuz guh aenvenz okmingz neix daegdaengq cauhguh.

Liengz Bingjgvangh, vunzlai heuh de guh “vuengzvenz”, vunz Yungzsuij Myauzcuz Swciyen Anh- cuiz Yangh Vuhgiz Cunh Mbanj- nganzbanj, aenvih gij dinfwngz boq aenvenz caeuq guh aenvenz ak, bi 2012 ndaej Vwnzvabu ancoh baenz bouxswnjcienz daiqbiujsingq feih vuzciz vwnzva yizcanj hanghmoeg guekgya gaep. De seizneix yaek ndaej 80 bi lo, lij ciuqyiengh youq ndaw mbanj Myauzcuz byaraemx gyae- gyang haenx soujmaenh aen loq- siengj aenvenz de.

Gicej bae caijfangj Liengz Bingjgvangh, lij caengz haeujdaengz ranz de, couh ndaejnyi gij sing aenvenz yaep daengx yaep yiengj. Haeuj daengz ndaw ranz, youq doiqnaj baiz aenvenz guh baenz liux ndeu, boux goenggeq saeknaj hozswnh ndeu dawz aen gingqda dava, cingq baez dem baez sawq boq aenvenz, caem sim roengzdaeuj nyinhcaen dingq, sijsaeq doxbeij gij cabied saeq diuhsing.

Liengz Bingjgvangh naeuz, aenvih daj iq dingq aenvenz majhung, de daj caet bet bi couh hainduj boq aenvenz, doq dingq doq yawj doq ngeixnaemj saefouh ndaw mbanj baenzlawz guh aenvenz, cibroek caet bi couh ndaej guh saefouh lo.

Vihliux hwngfat gij dinfwngz aenvenz, Liengz Bingjgvangh yungh le haujlai goengrengz. “Aenvih guh aenvenz mbouj canh gijmaz cienz youh saepsoiq, bouxcoz hix mbouj haengj hag, daxboh gou ciengzseiz caeuq dou mboen, you daengzcog gij dinfwngz neix mbouj miz vunz swnjcienz roengzbae.” Daeglwg ngeih de Liengz Suiveih mwhgonq youq dieg rog dajgoeng, geij bi neix daeuj ndaej daengz Liengz Bingjgvangh daiqdoengh、dazyinx, bienqbaenz bouxbangrengz de.

Vihliux gyavaiq gij yauqlwd cauhguh aenvenz, bi’gyai, Liengz Suiveih bae Guengjdoeng gaujcaz le, cawx ma dauq gihgi deugaek yungh susw gungci ndeu, caeuq daxboh yenzgiu yungh gihgi ma guh aenvenz, seizneix gaenq guh baenz haujlai aen lo. “Gawq faexndoek、dat naeng、mbongq aendaeuj aenvenz……Ndaej yungh gihgi ma guh, seizgan noix youh mbouj yungh geijlai goengrengz, aendaeuj aenvenz baenz yiengh liuxle, caiq yungh fwngz ma gyagoeng, gij sing aenvenz guh okdaeuj haenx caeuq aenvenz doenghbaez cienzbouh yungh fwngz guh haenx mbouj miz cabied.” Liengz Suiveih naeuz.

Ciuq cam rox, cawz daeglwg ngeih Liengz Bingjgvangh ciepswnj gij saehnieb daxboh, 60 lai boux lwgsae de son haenx gaenq bienq- baenz saefouh, faenbouh youq gak dieg Mbanjmyauz, bienqbaenz gij rengz ceiq youqgaenj genhciz swnj- cienz gij vwnzva aenvenz Myauzcuz. De caeuq lwgsae de moix bi cauhguh 800 lai aen aenvenz, seizneix Guengjsae caeuq Gveicouh song dieg miz 5 fanh lai aen aenvenz dwg gyoengq de cauhguh. “Ndawsim gou maij, miz saek ngoenz mbouj lumh aenvenz couh raen youq mbouj onj. ” Liengz Bingjgvangh naeuz, cijaeu bouxwnq lij ra de guh, de couh itcig guh roengzbae.

Bi’gvaq ndwen 9 ngoenz 16, Yungzsuij Myauzcuz Swciyen banh aenban son’gyauq gij dinfwngz guh aenvenz Myauzcuz. Baez son’gyauq neix dwg youq ndaw aen gvanj langhbaij dinfwngz swnjcienz aen- venz Myauzcuz Liengz Bingjgvangh bouxswnjcienz feih vuzciz vwnzva yizcanj guekgya gaep neix haiban, 15 boux bouxmaij aenvenz Myauzcuz camgya baez son’gyauq neix, son- gyauq cibngeih ngoenz, swnjcienz le gij dinfwngz guh aenvenz Myauzcuz.