“Fong rek! Fong rek lo——” Seiz lwgnyez gou, baez dingqnyi sing heuh fong rek, couh angq dwk aen sim yaek saet ok aek daeuj. Gyoengq lwgnyez doq boux heuh boux coh henz mbanj buet bae, doq buet doq hemq:“Canghfongrek daeuj lo! Laujlij daeuj lo!”

Ciuq naeuz, canghfongrek mbouj gai dangz mbouj gai gijgwn, lwgnyez miz maz ndei angq ni?

Miz song aen yienzaen. 20 sigij 60 nienzdaih, vunz lajmbanj youh gungz youh mbwq. Gungz daengz gwn cuksawzminz gvaq saedceij, ngoenz- cieng ngoenzciet cij miz saek donq haeuxseuq caeuq nohmou gwn. Mbwq daengz doengxngoenz yawj roeglaej, doengxhaemh dingq ma raeuq. Canghfongrek baez daeuj, aen mbanj couh ndwet lo, vunzlaux lwgnyez cungj doxcomz daeuj yawj fong rek, couh lumj yawj ciengq heiq nei, gangjgangj riuriu, gij dungxiek lainoix cungj lumz siu di lo. Lingh aen yienzaen couhdwg canghfongrek dwg boux vunz ndei, bouxboux cungj haengj caeuq de gangj vah gangjriu.

Canghfongrek singq Lij, dou heuh de guh Laujlij, ciuq Vahgun heuh, vunzlaux hix miz vunz cwng de guh Goengleix.

Gyoengq lwgnyez riengz sing buet daengz henz mbanj, caenh raen Laujlij rap rap hongdawz fong rek ndeu, bibi buengqbuengq byaij haeuj luengqmbanj daeuj, doq byaij doq rwenz sing hemq “fong rek——fong rek——” Dou doxcaenx byaij gaen- laeng de, doq byaij doq rw de hemq.

Byaij daengz aen suen maknim, Laujlij cuengq diuz rap roengzma, aj bak riuhoho naeuz:“Vaiq maranz heuh bohmeh, aeu rek daeuj fong, vaiq bae vaiq bae……” De doq gangj doq nda gij hongdawz fong rek. Gou sijsaeq ngonzyawj, gij hongdawz haenx hix mbouj lai: Aen lozfeiz iq ndeu, aen loengzrumz ndeu, caiq miz fagnep fagcuiz caeuq di dietsoiq dem.

Nda ndei doxgaiq, Laujlij maeuq roengzdaeuj yaek naengh, mboujliuh, aen daengqgeg lumj lau in ne doq conj gvaqvang, Laujlij “bob” naengh roengz gwnz namh bae, cengdi dingj- byonj, yinx ndaej gyoengq lwgnyez riuhehe. Laujlij yiet fwngz vax dawz daengqgeg, bekbek song mbat, riu naeuz:“Aen daengq neix, caen cab- heiq, caeuq gou gaemhndoj ne.” Gyoengq lwgnyez engq angqriu haha, hwk dwk gij roeglaej gwnz faex mbin deuz fwfw.

Mbouj ndaej gvaiq daengqgeg, gvaiq Laujlij vunz biz lai. Doengh bi haenx, lumj Laujlij baenzneix biz, caen mbouj miz daihngeih boux. De daenj dauq buhdangzcangh gag nyumx ndeu, baenz ndang ndaemndadndad, ndongqmyigmyig. Dauq buh loengz- lula daenj youq aen ndang biz de, yienznaeuz soengsupsup, hoeng aen dungx bongz de lij doed okdaeuj. Vunz biz daengq daemq, yawj de naengh dwgrengz raixcaix, hoeng de naengh gvenq lo, ciuqyiengh riuhoho guhhong.

Laujlij itmienh caeuq lwgnyez cejgoj, itmienh rag loengzrumz ci lozfeiz. Gvaq geij faen cung, gij danq ndaw lozfeiz gaenq ndongqmyanmyan. Seizneix, gyoengq vunzlaux boux riengz boux hix gwed rek riuj gu daeuj lo.

Laujlij raen lozfeiz ndongq le, couh nep aen mbokdiet moek roengz feizdanq bae, caiq gveng geij naed dietsoiq roengz ndaw mbokdiet, caj dietsoiq yungz baenz raemxdiet le, de couh doengh fwngz fong rek lo. De fwngzswix mbehai angjfwngz, youq gwnz angjfwngz bu vengq vaj na ndeu, gwnz vaj na caiq demh caengz daeuh ndeu gek ndat. Baez fong rek, Laujlij aeu sieg iq daj ndaw mbokdiet daek raemxdiet, raix youq gwnz vaj na, ciepdaeuj, riengjret dawz raemxdiet nem haeuj laj hangxrek bae, fwngzgvaz gaem mbaenq faexgyaengh luenz, doiq cinj naed raemxdiet haenqrengz at roengzbae, song fwngz doxgap baenz naenx, ndik raemxdiet couh nem youq congh rek lo. Fwngzgvaz de caiq dawz faexgyaengh nu congh fong geij baez, couh suenq fong ndaej lo. Yienghneix, congh dem congh swnh fong roengzbae, mbouj geij nanz, aen rek couh fong ndei.

“Baenz lo, mehbaj, dawz rek maranz cawj haeux lo.” Laujlij riuhoho ndenq rek hawj Bajsam. Bajsam riuhehe ciep dawz aenrek, baenq ndang doq gaenjmuengz byaij roen. “Caengz hawj cienz bw, daxbaj.” Miz vunz naeuz. “Eiya! Yawj gou, moengzloengz mangxlangh, hab dai!” Laujlij riu naeuz:“Mwngz nyaengq lai, bae ndoi ma caiq hawj caemh ndaej.” “Mbouj baenz, baez baenq hangx couh lumz, seizneix hawj mwngz, geijlai cienz lo? “Congh 8 faen cienz, mwngz hawj 7 gak ndaej lo.” “Mbouj dwg 10 congh ha? Mwngz suenq loek lo.” “Congh he iqet, mbouj suenqsoq, aeu cingjsoq, 7 gak ndaej lu.” Bajsam doq ndenq cienz doq haenh:“Goengleix caen simsienh aek gvangq, gvaiq mbouj ndaej bibwdbwd.” Gyoengq- vunz doq riu hwnjdaeuj, Laujlij hix riengz riu.

Laujlij vunz hailangh, gyaez cejgoj gangjriu. Youq ndaw yaenq- siengq gou, caengz raen de nyaeuq gvaq najbyak, gongz gvaq coenznaiq. Hoeng, baihlaeng de hix miz gij hoj hawj vunz cojgvaq ha! Laujlij nienzgeij mbouj daengz 50 bi, aenvih de biz lai, youh rap naek banh mbanj fong rek, yawj aennaj miz di laux. De yienzlaiz dwg vunz ndaw singz, ciuh bohmeh de couh youq diegyouq gunghse an’gya, de seng youq gwnz gai. Vwnzva Dagwzming seiz, daengx ranz deng cuengq roengz lajmbanj. Aenvih mbouj rox guh hongnaz, ndaw ranz de aeu ndaej gunghfwnh gig noix, binaengz faen haeux mbouj gaeuq gwn. Laujlij couh bazboed gij hongdawz fong rek okdaeuj, dauq guh gij bonjhangz baezgonq. Cingq dwg yienghneix, Laujlij gig doengzcingz gij vunz mbanj gungzhoj, de fong rek bungq daengz bouxgyax、bouxgeq, de ndaej mienx cienz couh mienx cienz, ndaej noix aeu couh noix aeu.

Miz baez ndeu, ndaw mbanj boux vunz ceiq laux Goengfeih dawz rek daeuj fong, Laujlij gaem aen rek baez yawj, raen aen rek cungqgyang vauq baenz aen congh gyaeqgaeq hung, couh ngauzngauz gyaeuj, gangjriu naeuz:“Goenglaux, aen rek mwngz iek lai lu, hawj de gwn di youz cij ndaej, mbouj gwn youz, aen dungx de ceg liux lo.” Goengfeih riumbw naeuz:“Gaej naeuz gwn youz lo, raemx cungj mbouj gaeuq gwn ho.”

Laujlij ngonz Goengfeih baez ndeu, gwnz naj loh ok gij saenzcingz cojgvaq daeuj. “Mbouj lau vauq, fong ndei hawj mwngz.” Laujlij itmienh nai Goengfeih, itmienh doengh fwngz fong rek. Aen rek neix caen hoj fong raixcaix, Laujlij yungh bae baenz buenq diemj cung cij fong ndaej. Doeklaeng de aeu raemx guenq haeuj gizfong bae, cazyawj mbouj raen laeuh raemx le, cij ndenq rek hawj Goengfeih. Goengfeih fwngz saenz- dwddwd mo aen daehbuh haujlai nanz, cij mbon ndaej geij gak ngaenz okdaeuj. Laujlij bibi fwngz, naeuz:“Goenglaux, mbouj aeu lo.” “Mwngz hix mbouj yungzheih, naed hanh naed cienz, aeu cij baenz.” Goengfeih yiet fwngz nyengh mbouj soudauq. Raen yienghneix, Laujlij cij ndaej ciep cienz. De daj gaem cienz ndawde yut song mbaw okdaeuj, youh dawz gizyawz doiq hawj Goengfeih naeuz:“Daxgoeng ha, mwngz dawz gij cienz neix bae cawx di youz ma gwn.” Goengfeih lienzlienz doi fwngz. Raen song de nyiengh bae nyiengh dauq, gyoengqvunz couh gienqnaeuz fonfon:“Goengfeih, gaej gawjeiq lo, Laujlij hauqswnh mwngz bouxlaux, mwngz couh sou gij saenzcingz de lu.” Yienghneix, Goengfeih cij yo cienz, soemxsoemx saxsax byaij baema. Ndaw bak lij damzbyoedbyoed:“Goengleix ndei, Goengleix sienh, Goengleix ndaej souh cien fanh nienz.”

Laujlij yiedsim bang vunz, bouxwnq bang de, de hix daihliengh boizlaex. Miz baez ndeu, seiznit, Laujlij fong rek nyaengq lai, fwngz mbouj ndaejhoengq rag loengzrumz. Laujlij raen gou umj daegnuengx iq youq henz guhcaemz, couh heuh gou bang de rag, gou raen nit lai, cingqhab ndaej byoq feiz, couh fwngz ndeu umj nuengx, fwngz ndeu rag loengzrumz. Gou deih mbouj deih liuq Laujlij saek baez, caenh raen de song fwngz nyaengqfoedoed, gwnz naj hanh rih- cancan, diemheiq hix baegfofo. Hoeng de lij riunyumnyum, haeujsim fong rek. Gou hix roxnyinh ndang raeuj- rubrub, dungx hix mbouj iek lo.

Banringzgvaq, vunzlaux guhhong dauqma, Laujlij hix fong rek caez lo. Itseiz, laj gonim nauhyied hwnj- daeuj. Laujlij soengsetset ndoet gaemz raemx ndeu, menhmenh daj ndaw daehbuh mbon ok geij gak cienz ndenq hawj gou, naeuz:“Daeglan, caeklaiq miz mwngz coengh, mboujnex gou ngoenzneix fong mbouj liux gij rek neix lo. Dwgrengz mwngz lo. Ne, hawj di cienz mwngz bae cawx dangz gwn.” Gou baenzlawz raen bouxwnq hawj gou cienz gvaq, ndwn hwnjdaeuj doq siengj byaij. Laujlij hix ganjvaiq ndwn hwnjdaeuj gyaep gou, nyengh oet cienz haeuj fwngz gou daeuj, gou najnyaenq ndiemndiem mbouj rox baenzlawz guh. Gyoengq nyezdoih doq hemqriu geggeg: “Aeu lu! Aeu lu! Cawx dangz faen dou gwn.” Hemq sat, doq nyoengx gou baema. Laujlij ndwn youq baihlaeng, aj bak riuhaha.