Daj ciuhgeq daeuj, youq dieg Bouxcuengh cujyau baengh dajndaem gvaq ndwenngoenz haenx, vanzging ganhoj, hawj haujlai daxmeh youq seiz roengz reih guhhong roxnaeuz benz bya gvaq ndoi bae caencik caeuq ganj haw, aeu yungh nda daeuj aemqdawz lwgnyez.

Gaengawq seiz aeuyungh, nda baen guh gij ngoenznaengz yungh caeuq gij ngoenzciet yungh song cungj, gij nda youq ranz yungh roxnaeuz bae haw yungh sawcengh saek mbaeu, mbouj miz va roxnaeuz va noix, dingzlai cungj dwg yungh gij baengz dingj ndaej saeg daeuj guh, hoeng gij ngoenzciet yungh haenx, couh daegbied gyaepgouz gyaqciq.

Aenvih nda miz hamzeiq daegbied, gij goengrengz mehmbwk yungh daeuj guh nda haenx ceiq lai. Caemh aen minzcuz, gij ceng’ca mbanj caeuq mbanj engq daejyienh youq dinfwngz caeuq yienghva diuznda. Diuz nda iqetet ndeu, danh gij dinfwngz dajsiuq couh miz geijcib cungj. Gij yienghva gwnz nda, aenvih miz gij goengnaengz dingjlawh cihsaw daejyienh gij vwnzva vunzlai, gyoengq mehmbwk minzcuz mbouj doxdoengz、dieg mbouj doxdoengz、nga mbouj doxdoengz haenx aeu gij geiqndaej lizsij caeuq gij fouzhauh duzdwngz minzcuz yungzhaeuj ndawde bae.

“Aen nda ndeu goek gyaeraez”, youq mwh diuz mingh’iq ndeu hainduj daiqndang doekseng, couh gaenq bienqbaenz gij naek ceiq van daxmeh rapdawz lo, hoeng diuznda, cawqdingh bienqbaenz dieg yietnaiq lwgnyez buetcoh ciuhvunz vuen- yungz. Siengj ndaej ok, lwgnyez cwxcaih youzlangh youq ndaw simgyaez majhung youq mwh dauqngeix seiz lwgnyez bonjfaenh, wnggai gamjsouh ndaej daengz cungj rengz cingzngeih vunz ndaw ranz gwnz seiqgyaiq ceiq mbouj miz seisim caemhcaiq ceiq hungmbwk neix.

Gij nda conzdungj, itbuen baenzranz gaxgonq youz lwgsau gag guh roxnaeuz baenzranz le youz beixnuengx ranzdaiq (yahdaiq、 nax- bawx) soengqhawj. Mbangj dieg daengz seizneix vanzlij miz gij fungsug seiz senglwg rim ndwen yahdaiq soengq nda, seiz yahdaiq soengq nda itbuen gapbaenz bang vunz ndeu, ciengzmienh lumj seiz baenzranz nei angqyangz. Ngoenz cingj laeuj lij anbaiz eu fwen dem, ndawde miz eu《Fwen Nda》, daihgaiq neiyungz dwg cuknyienh gvanbaz nienzoiq gyaranz vuenyungz habhoz, cuknyienh lwglan ndangcangq bingzan, lij miz couhdwg eu gij nda siuqva guh ndaej gyaqciq, yungh neix gangjok gyo’mbaiq.

Aenvih gij fungsug minzcuz soengq nda, vunzlai gig maij cimyawj diuznda, ndigah vunz ranzdaiq youq mwh guh nda siuqva gig gyaepgouz gyaqciq, cawzbae yahdaiq daj goek daengz byai guh, lij iucingj cangh- dajsiuq、canghraedceij daengj doenghboux dinfwngz ak neix daeuj doxcaez bang dem, muzdiz couhdwg aeu guh ok gij nda siuqva gig ndaej vunzlai haenh haenx. Hix cingq dwg diuzvih yienghneix, gij dinfwngz fwngzguh diuznda ndaej riuzcienz roengzdaeuj gyaenanz.

Nda youq ndaw gyaranz miz gij gvanhnen lwglan daih ciep daih lienzdaemh roengzbae rag laeg goek maenh haenx, ciengzseiz dwg daeggo yungh liux hawj daegnuengx, daeg- nuengx yungh liux hawj dahnuengx, itcig yungh daengz vaih yungh mbouj ndaej bae, lij suj youq ndaw loengx sij mbouj ndaej vut. Linghvaih, ciuq gij fungsug mbangj dieg, diuznda yungh gvaq haenx aeu laeglemx daiq bae ranzdaiq byaeu bae, daxmeh mbangj dieg cix aeu de yawj baenz dwg gij fouz hen ndang gyoengq lwg. Daxmeh itbuen cungj sij mbouj ndaej vut bae, youq seiz mbouj ndaej mbouj nyiengh hawj vunz, mizmbangj daxmeh vanzlij genhciz raed diuzsai roengzdaeuj, gag yo ce. Gyoengqde naeuz cijmiz yienghneix, cij gangj- naeuz bouxcawj gaeuq gaenq caeuq diuz nda neix mbouj miz saekdi gvenhaeh, gij hoenz lwgnyez cij mbouj liz gyae, ndangdaej cij mbouj miz in mbouj miz bingh, bingzan majhung.

（daj Guengjsae Gyaeundei genjaeu）