Rog haw Nazheuj aen mbanj iqetet, daeg lwgmbauq ndeu heuhguh Daegcingq, ndaw ranz ngamq de nem meh de song boux vunz.

Meh Daegcingq dwg yahmaiq mingh hoj ndeu, de rox saw mbouj lai, hoeng guh fwen coengzlaiz mbouj saw bouxwnq. Boh Daegcingq mwh lij lix caemh dwg bouxak guh fwen he, de couhdwg baengh guh fwen cij aeu ndaej meh Daegcingq guh yah. Bide Daegcingq ngamq ndaej 3 bi, boh de couh bungq deng cihux vut roengz song mehlwg gag bae lo. Hainduj, meh Daegcingq hix siengj daiq lwg lingh haq vunz, hoeng, it cungj ra mbouj raen boux ndei gvaq boh Daegcingq, ngeih lau vunz doiq Daegcingq mbouj ndei, 20 geij bi gvaqdaeuj cungj haq mbouj baenz. Seizneix, lwg gaenq ndaej 20 geij bi lo, caengz aeu ndaej yah. Meh Daegcingq yienznaeuz lij miz rengz ak guhhong, hoeng goknaj cix nyaeuq haujlai lo. De gag eu:“Lwgsai ngeih daih geij, ndi maex meh yousim, cieng gvaq gyau laebcin, doengxhwnz ninz mbouj ndaek.”

Daegcingq yienznaeuz hix mbouj ndaej doeg maz saw, hoeng de baez byaij hwnj haw bae bungz daengz gyoengq lwgnyez ndawhag, gyoengqde cungj angqvauvau heuh de guh “lauxsae”. De gag hag Sawcuengh gvaq, rox raiz sawfwen, geij bi gonq bae gauj gij gaujsi Vahcuengh Sawcuengh suijbingz aeu ndaej “mbawcwngq gaugaep”, ndaej aen hagdangz gwnz haw Nazheuj miz mingzdaeuz swnjcienz vwnzva Boux- cuengh cingj guh “lauxsae fujdauj Sawcuengh”. Gyoengq lwgnyez ndaw hagdangz Nazheuj dingzlai cungj ndaej riengz de hag guh fwen gvaq, miz dingz he lij ciengzseiz ndaej okrog bae camgya biujyienj vueddoengh, nanz mbouj nanz lij ndaej hwnj densi dem. Sawj ndaej gyoengq vunzlai cungj byaengqda daeuj yawj Saw- cuengh. Aen doih guhfwen lwgnyez hagdangz Nazheuj miz dah lwgmbwk he heuhguh Dahvei, dahgux de roxnyinh Sawcuengh miz yinxdaeuz. Miz baez ndeu gux Dahvei riengz doih lwghag bae densidaiz biujyienj, lij daegdaengq bae nem Daegcingq gangjgoj, cam Sawcuengh dwg cungj saw baenzlawz yiengh, hoj hag mbouj hoj hag.

Geij bi neix, Daegcingq nem geij dah lwgsau guhyoux gvaq, hoeng cungj yiemz Daegcingq it mbouj miz ranz youq gwnz haw, ngeih mbouj miz ciiq naengh, cungj doxbiek lo. Meh Daegcingq simgip raixcaix, de rox gwnzbiengz seizneix mbauq lai sau noix, cib aen bengh gouj aen fa, caiq mbouj cagaenj di, lauheiq Daegcingq caen deng lw roengzdaeuj bw. Mehmbwn ha, neix dauqdaej dwg maz seiqdauh ha, caen dwg “caetneix sau genj gvan, ranz moqsak cij haq, mbauq mbanj gwnz mbanj laj, gvaq sauh rox geijlai”. Bineix ndwen sam bae sauq- moh, meh Daegcingq youq naj moh gvan gouz naeuz:“Boh lwg ha, mwngz couh hojlienz hojlienz daeglwg raeuz ba, baujyouh de ra ndaej yah sienhsoh mbouj yiemz ranz raeuz hoj he!”

“Goengloh doeng haeuj mbanj, gaiqgaiq canh ndaej ngaenz, ndaem ciengx yienghyiengh baenz, boux raen boux bae guh.” Gangj coenz vah laux- saed, lajmbanj seizneix mbouj doengz gaxgonq lo, gyoengqvunz doxcanj guh dajndaem dajciengx, ndaem lai ciengx lai, guh ndaej gwn sadsad. Doengh bi neix mbouj rox miz geijlai vunz ndawsingz dauqfanj hozhaenz vunz lajmbanj. Ciengzseiz nyi naeuz miz lauxbanj Namzningz roengz mbanj lawz mbanj lawz daeuj co dieg guh dajndaem dajciengx, cienzco boux beij boux ok ndaej sang. Aiq dwg doengh dah nem Daegcingq damzyoux gvaq uk ngawz roxnaeuz mbouj miz lwgda, gingqyienz yiemz hauxseng lajmbanj?

“Lwgsai hung baenz mbauq, rox siengj caux aen gya, ndi sau riengz dauqma, gyawz miz baz caemhciuh.” Damz gvaq geij dah mbouj baenz, Daegcingq nyapnyuk ha, mbouj siengj caiq ra saek dah sau lo. “Moudog rox maj noh, faexdog rox maj mwn, gou neix gag guh gwn, ndi vunz haq couh suenq.” Meh de bi’gyaeuj laglag naeuz:“Hai, feiz mbouj ndat daeuh ndat, hat vaiz mbouj rox bae, roengz- rengz gaemh fagcae, namhnaez mbouj rox fonj.”

Raen Daegcingq baenz yiengh- neix, meh de cungj gag ienq bonjfaenh mingh rwix, ienq gvan bae ndaej caeux, mbouj hwnj ndaej ranzlaeuz mbouj cawx ndaej ci, hawj daeglwg ngoenzneix nyaenx hoj ra yah. “Minghyinh nyaenx anbaiz, ienq lai mbouj miz yungh, diuzcag gaej hawj rungq, lau de nyungq baenz doi.” Seizneix lij miz diuz roen dog byaij, couhdwg caenhliengh siengj banhfap cingj vunz bang yien sienq ra dahsau, yawj ndaej bungz daengz saek dah mbouj yiemz ranz hoj. Vih neix, meh Daegcingq baezbaez caeuq vunz gangjgoj, cungj dwen daengz gienh saeh neix, cungj maqmuengh gyoengqvunz ndaej bang ra saek dah lwgsau daeuj guh bawx.

Cax muz lai couh raeh, saeh gangj lai haengj baenz. Meh Daeg- cingq okbae nem vunz gangj lai le, cungjsuenq miz vunz nyienh bang ra lo. Ngoenzneix Naxseiq Hawnazheuj sawqmwh daeuj daengz ranz naeuz yaek gaisau dahlwg boux laux- doengzhag de hawj Daegcingq. Nax- seiq gangj ndaej da laep da luiq, meh Daegcingq sim angqfwngfwng, doq heuh naengh doq raix caz.

Daegcingq nyi naeuz yaek gaisau dahsau he daeuj hawj de, ndawhoz cix angq mbouj hwnjdaeuj, de caenh lau youh bungz dwg dahsau rox yiemz de “fouz ranz fouz ci”. “Naxseiq, dah haenx gvai lai lwi?” Daegcingq mbak cam.

Naxseiq naeuz:“Aeya, gij neix mwngz couh gaej yousim lo, seizneix bouxcoz ra youx mbouj nyienh ra bouxhuk bouxngawz, neix gou caemh rox, gou mbouj naengz ra dah dwg fwngz haeuj bak mbouj haeb ndeu hawj mwngz!”

“Gou nyienh ra dah mbouj daih gvai.” Daegcingq dap.

“Hei, gaej gangj riu lo, dah de youh gvai youh lengj, bau mwngz habhoz.” Naxseiq daekeiq dangqmaz.

Baez nyi naeuz gij vah neix, Daegcingq cix lumj duz gaeqseng ngamq deng iem nei, ngouz roengzbae lo. Dah gvai rox ngeix lai, caemh rox genj vunz lai, caeuq doengh dah neix damz mbouj miz yungh, canhndaej sieng gamjcingz. Daegcingq naemj le coh Naxseiq naeuz:“Gyo’mbaiq mwngz nyaenx gvansim gij saeh gou. Dahsau mwngz yaek gaisau aiq caen ndei lailai, cix dwg gou yienghyiengh yaez gvaq vunz, mbouj gamj gyawj de ha.”

Naxseiq mbouj fug couh yiengh- neix daeuj gvaq ndwi, naeuz:“Gaej gag hag cienh, mwngz couhdwg fouz ranz fouz ci, hoeng mbouj miz gijneix doengzyiengh ndaej gvaq saedceij. Couhdwg raen mwngz simsoh、gaenx hong、uk gvai, nem dah de doxdaengh, cij daeuj gaisau hawj mwngz. Mwngz couh bae damz baez ndeu ba!”

Daegcingq lau Naxseiq ndaq naeuz mbouj hawj naj hawj de, couh daejnaemj hanbak bae raennaj baez ndeu.

Meh Daegcingq naeuz:“Hai, lwg neix ha, gangj geijlai sau gyaeu, mbouj ndaej aeu guh yah, doenghbaez boek ruz gvaq, daengz henz dah couh lau. Naxseiq, mwngz couh gaej dam de. Gou rox baenzlawz guh vunz, saehcingz guh ndaej baenz le, cungj mbouj lumz gij aencingz mwngz.”

“Ndaej lo, gij saeh neix couh bau hawj gou lo, gou bae coh dah de gangj di coenz ndei, haengjdingh baenz!” Yaep he Naxseiq daeuj naeuz：“Ngoenzcog dwg ngoenzhaw, gou caeuq dah de dingh ndei lo, ngoenzcog banringz youq cicamh doxraen.”

Ngoenz daihngeih, ngamq cib diemj lai cung, Daegcingq couh caeuxcaeux daeuj daengz ranzcajci cicamh naengh lo, de lau caj vunz mbwq lai, couh dawz mbaw bauqceij Sawcuengh ndeu bae yawj.

“Daegcingq lauxsae, youq neix yawj bauqceij ha.” Daegcingq cingq yawj bauqceij dawzyinx, sawqmwh miz aen sing dahsau ndeu dongx de, de ngiengx gyaeuj baez yawj, doek- saetyat, cij raen Naxseiq caeuq dahsau he ndwn youq henz ndang, dah haenx naj gig sug lumj youq gyawz raen gvaq.

“Daegcingq lauxsae, lumz gou la?” Dah haenx riugekgek naeuz, “Gou dwg dahgux Dahvei ha!”

“O! Geiq hwnjdaeuj lo, baezgonq dwg mwngz caemh riengz doih bae densidaiz yawj lwgnyez biujyienj ba?” Daegcingq sim fwt angq hwnjdaeuj, guhmuengz iet song fwngz gvaqbae gaem song fwngz gux Dahvei ndaet- ndwtndwt.

Naxseiq ra gyaij deuzbae lo, Daegcingq caeuq gux Dahvei guhdoih naengh youq aen eijraez.

Daegcingq naeuz:“Naxseiq heuh ngoenzneix daeuj doxyawj, caen mbouj siengj daengz dwg mwngz.”

“Gaxgonq dan rox mwngz sij ndaej sawfwen, son lwghag guh fwen, ngoenzneix dingqnyi Naxseiq gaisau, engqgya liujgaij mwngz caeuq ndaw ranz mwngz.” Gux Dahvei naeuz.

Baez nyi naeuz liujgaij ndawranz de, Daegcingq ndawsim diuqbubbub, gag ngeix naeuz saeh mbouj ndei lo, caiq gangj roengzbae lauheiq couh mbouj ndei souciengz, ceiq ndei mbouj gangj daiq lai lo. De mbaj- dwddwd naeuz:“Gou mbouj……mbouj miz ranz youq gwnz haw, hix mbouj……mbouj miz ci. Gou……gou yaek bae cawx……cawx doengh- yiengh gonq.” Gangj le couh hwnq- hangx yaek byaij deuz ok ranzcajci.

Gux Dahvei fwt gaemdawz fwngz Daegcingq beng doxdauq, sing sang sek naeuz:“Gangj maz mbouj miz ranz mbouj miz ci, mwngz laihnaeuz gou hozhaenz gij haenx ha? Gou dwg siengj cimh mwngz hag Sawcuengh……”