Cangdeuguh gyapdeu Bwzhaij ginggvaq 400 lai bi mboujduenh bae cimhra、swnjcienz、fatyiengz、cauh- moq, daj roixgyap、doigyap、gyapdeu bingzmienh daengz fouzdeu, caiq daengz gyapdeu aendaengj, daiq miz gij daegsaek vwnzva haij Bwzbuvanh Cungguek, dwg gij daiqbiuj maenh- ndei dinfwngz gyapdeu Cungguek, hawj gyapdeu Bwzhaij ndaej haeuj aen cangbauj hung yisuz cienzdoengj minzcuz Cunghvaz. Gyapdeu dwg Bwzhaij yiengh doxgaiq dangzhong cienzdoengj ceiq miz daegsaek, dangz dinfwngz gyapdeu Bwzhaij youq bi 2010 ndaej lied haeuj Guengjsae buek daihsam feih vuzciz vwnzva yizcanj mingzloeg.

Dangz dinfwngz gyapdeu Bwz- haij lizsij gyaenanz, youq Ciuhmingz satbyai Ciuhcingh ndujdaeuz couh guh ndaej sugsed hwnghoengh, gij gyasei caeuq gunghyibinj Mingz Cingh youq ndawbiengz Hozbuj daih cienz daih haenx couh rengzrwd dwk cingqmingz le gijneix. Gyapdeu Bwz- haij hwngfat daengz ciuhgyawj, gyoengq canghdeuguh youq swnj- cienz ndawde daihdamj cauhmoq, youq gwnz goekdaej dinfwngz cienz- doengj, supsou gij ndei nyawhdeu、faexdeu caeuq guekveh daengj lai cungj lai yiengh de, mumaeq okmoq, seizneix gaenq miz bouxvunz、dujva duzroeg、byaraemx daengj 6 aen cungjloih 1600 lai aen binjcungj, bauhamz le baenzaen fouzdeu hung- loet, veh gyapdeu, gaiqbaij gyapdeu, gaiqdawz gyapdeu、aendaengj gyap- deu、gaiqdajcang gyapdeu daengj, ndawde veh gyapdeu aeu dujva duzroeg dwg ceiq ndei, lumjbaenz duzroeg、 mauxdan、 va’nyiedgeiq、vagutlungz caeuq vafuzyungz daengj, hawj gyapdeu Bwzhaij ndaej hwngfat haeuj mboengq moq.

Dangz dinfwngz gyapdeu Bwz- haij dwg dangz dinfwngz cienzdoengj aeu gyaphau、gyapndaem、saeroeg- yengj、saeyaprongh daengj aensae aengyap dijbauj noix miz Bwzbuvanh guh yienzliuh daeuz, doenggvaq ndasuenq vehdoz、senj genj aen- gyap、faenmbek baenz gep、muz bingz muz lwenq、daebnem gyoepcang daengj baenz cib monz hong guh baenz gak yiengh gunghyiz meijsuz cingbinj haenx, canghdeuguh dawz saenznyinh guekveh、lingzgiuj seuj- siuq、gyaeundei nyawhdeu、rongh- lwenq naedcaw lumj mbwnguh sengcingz nei yungzhab guh aen ndeu, baenz gep baenz gaiq dwk bae guhbaenz.

Vwnzmingz ciuhgeq caeuq din- fwngz ciuhneix doxgyau doxyungz, saeklwenq sengcingz caeuq baez deu baez muz doxcaez giethab, hawj gyapdeu Bwzhaij daj aen dem aen gyapbyouq bingzciengz, ndaej bienq- baenz gaiq dem gaiq gunghyibinj hawj vunz yawj dwk byaengqda doeksaet haenx, mboujlwnh dwg byaraemx bouxvunz roxnaeuz dujva duzroeg duznon duzbya, cungj yienghde swhyienz caenlumj、hamz- eiq lai yiengh, yawj bae aende gyaqciq、yaprongh yabyab、gyaeundei dangqmaz, ngamjhab dajcang caeuq yawjngonz, vunzlai cungj gig haengj- gyaez… Bi bae bi dauq, gyapdeu Bwzhaij ginggvaq geiqcib daih vunz sim doxdoeng fwngz doxcienz, youh ndaej youq saedceij lizsij gwnzde langhfat ok ronghlwenq.