Seizneix dwg haemh 9 diemj lai cung, ndaw diemq haeux gaenq mbouj miz geijlai bouxhek, miz di caem.

“Iek loba, vaiq gwn haeux, mwngz ngamq daeuj baez nduj, mbouj miz maz ciepdaih mwngz, lai gwn di byaek he ba.” Daegvangz naeuz.

“Ndei, miz mwngz youq neix, gou mbouj lau dai iek.” Mehmbwk naeuz.

“Mwngz caeuq daegyoux mwngz roxnaj seizganz nanz gvaq la?”

“Roxnaj song bi lai lo, cungj dwg youq gwnz veihsin gangjgoj.”

“Gwnz vangj gij doxgaiq neix, buenq caen buenq gyaj, mwngz nyinhnaeuz de dwg caensim ha?”

“Mbouj rox, gou baezneix daeuj, couh naemj sawqsawq de caen mbouj caensim.”

“Hoh mwngz ra ndaej youx ndei.”

Daegvangz caeuq mehmbwk doq gwn doxgaiq doq gangjgoj, mbouj rox mbouj nyinh gaenq hwnz lo.

Ciepdaih mehmbwk gwn ndei caeuq ra ndei dieg ninz, Daegvangz couh dauqbae lo, mehyah de hix ngamq dauq daengz ranz. Daegvangz naeuz:“Haemhneix miz baengzyoux cingj okbae gwn caeuz, gou seizneix cij ndaej dauqranz.”

Daegvangz gig lau mehyah rox de okbae ciepdaih mehmbwk neix, de caenhliengh caeuq mehyah gangj vah ndei, mehyah dauqfanj miz di mbouj naihfanz, naeuz:“Miz gwn couh ndei, baeg dai lo, gou yietnaiq gonq.”

Gangj vahsaed, geij bi neix daeuj Daegvangz gvanbaz caen sinhoj, songde vunz lajmbanj, ndaem reih guh naz, cungj dwg gwn ndaej imq daenj ndaej raeuj, rom mbouj ndaej ngaenz. Daeglwg doeg dayoz le, gyoengqde mbouj ndaej mbouj okdaeuj dajgoeng, ngoenz guh hong 10 aen cung, ndwen souhaeuj 2000 lai maenz, suenq dwg ciengx ndaej bonjfaenh caemhcaiq soengq ndaej lwg doegsaw lo. Sinhoj dwg sinhoj, hoeng beij youq lajmbanj guh reihnaz ndei.

Ciepdaih mehmbwk neix yungh bae bak lai maenz ngaenz, gwn bae le gyoengqde song ngoenz hong, baenz- lawz gamj hawj mehyah rox.

Yaek haeuj ninz seiz, soujgih miz saenqsik daeuj, Daegvangz gig naemj yawjyawj, youh lau dwg mehmbwk haenx fat daeuj, mbouj yawj youh mbouj cuengqsim, lau dwg mehmbwk haenx miz maz saeh ra de. De fanndang yawjyawj mehyah, mehyah gaenq laep da ninz lo. Daegvangz laeglemx hai soujgih yawj saenqsik, dwg mehmbwk fat daeuj dahraix, mehmbwk fat aen hoengzbau sij coenz vah “docih mwngz ciepdaih” hawj Daegvangz, Daegvangz hai hoengzbau seiz, doeksaet dwk yaek diuq hwnjdaeuj. Aen hoengzbau neix miz 200 maenz. Yaep he youh miz aen hoengzbau he daeuj, youh dwg 200 maenz.

Daegvangz laebdaeb sou ndaej 3 aen hoengzbau, gungh 600 maenz. De mwnh lo, gag naemj: Mehmbwk neix, gij buhvaq daenj gwnz ndang de mbouj rim bak maenz ngaenz, baenzlawz couh fat hawj gou aen hoengzbau baenzneix hung ni? Dwg mbouj dwg fat loeng lo.

Daegvangz gig naemj dwk dienhvah gvaqbae camcam mehmbwk haenx, hoeng mehyah couh ninz youq henz ndang, hawj de bak aen damj de hix mbouj gamj seizneix dwk dienhvah.

Daegvangz hwnz he ninz mbouj ndaek.

Ranzrongh, ciuq doenghbaez doxdoengz, Daegvangz hwnq congz swiqndang、cawj ngaizromh, gvanbaz song vunz gwn ndei ngaizromh le, gag boux gag bae nyaengq hong swhgeij lo.

Ngoenzneix Daegvangz yietnaiq, mbouj yungh bae hwnjban, de daeuj daengz gwnz gai, dwk dienhvah hawj mehmbwk haenx, naemj dawz gij ngaenz hoengzbau de doiq doxdauq.

“Vei, Mwngz ninz hwnq caengz?” Daegvangz cam.

“O, Daegvangz ha, gou caeux couh hwnq lo, haetromh couh miz vunz daeuj ciep gou dauqranz. Docih mwngz ciepdaih gou, docih mwngz dawz gou haeujsim.” Mehmbwk naeuz.

“A, a, a…….” Daegvangz buenq ngoenz gangj mbouj ok vah.

Daegvangz byaij youq gwnz gai, mbouj rox baenzlawz guh ndei, de cawx ndaej song gaen byaekheu caeuq duzbya he couh dajsuenq maranz loengh byaekngaiz, seizneix dienhvah yiengj hwnjdaeuj.

“Vei, mwngz dwg Daegvangz lwi? Mehyah mwngz laemx youq gwnz roen, seizneix miz vunz soengq daengz yihyen lo, mwngz vaiq gvaqdaeuj yawjyawj.”

Daegvangz roxnyinh lumj deng byaj bag dingjgyaeuj nei, baez vut gij byaek gyang fwngz, coh yihyen buet bae.

Mehyah Daegvangz dwg baenz bingh lwedhaeujuk, canghyw naeuz mbouj gibseiz yw couh mbouj baenz vunz lo, gizneix gouq mbouj ndaej, aeu daengz yihyen hung ndaw sengj bae yw cij ndaej.

Ndaw ranz mbouj miz geijlai ngaenz, yaek bae dieg wnq ywbingh, mbouj miz sam haj fanh maenz ngaenz baenzlawz ndaej, seizneix mehyah gaenq dwg mingh hoij daengz bak namh, mbouj bae yw hix mbouj ndaej, Daegvangz gietdingh sien soengq mehyah bae yihyen hung ndaw sengj le caiq lingh guh dajsuenq.

Mehyah gaenq 3 ngoenz caengz singj gvaqdaeuj, Daegvangz boux ndeu youq yihyen ciuqgoq.

Ngoenz ndeu banhaemh, meh- mbwk haenx dwk dienhvah hawj Daegvangz, cam de duenh neix gvaq ndaej baenzlawz yiengh, Daegvangz naiqnueknuek dwk lwnh de naeuz yienghneix yienghneix lo.

Haemh daihngeih, ndaw ranz- bingh byaij daeuj geij boux hek, mehmbwk saufwtfwt gwnz daenj buhheu laj daenj vinj raez he cigsoh byaij gaenh Daegvangz naeuz:“Mwngz bungz daengz gij saeh yienghneix wnggai caeux couh lwnh gou nyi, mizseiz gou hix ndaej bangbang mwngz.”

Daegvangz daj gwnz daengz laj cim mehmbwk neix baez he, lumj roxnaj lumj raen gvaq youh siengj mbouj hwnj youq gizlawz raen gvaq.

Dahsau ndwn henz ndang meh- mbwk he naeuz:“De dwg lauxbanj dou, de rox mwngz miz gij saeh neix, daegdaengq daeuj yawj mwngz, caemhcaiq soengq ngaenz daeuj hawj mehyah mwngz ywbingh gonq.”

“Lauxbanj? Mwngz dwg Nungz Siujli.” Daegvangz gig doeksaet.

“W, w, w.” Mehmbwk naeuz, gwnz naj loq ok gij sai riu haenx gig maez vunz.

Daegvangz naeuz:“Mwngz ndaej daeuj yawj gou, gou gig gamjdoengh, gij ngaenz mwngz gou couh mbouj aeu lo.”

Mehmbwk naeuz:“Yungh ba, mwngz couh dangq dwg ciq gou aeu, gvaqlaeng caiq boiz hix ndaej. Linghvaih ngaenz mbouj gaeuq, hix ndaej caeuq gou naeuz. Ndeindei ciuqgoq mehyah mwngz ba.”

Mehmbwk gangj sat, dauqbae lo, gij rang gwnz ndang de youq ndaw ranzbingh nanznanz mbouj sanq.

Daegvangz hwnz he ninz mbouj ndaek.

Nungz Siujli, 42 bi, de youq ndaw singz hai miz geij aen bouq gai buhvaq, lajfwngz de ciengx miz 30 lai boux vunzhong. Gvan de miz yahnoix le, songde couh lizvaen lo, 5 bi neix daeuj, de baedauq boux ndeu, haeuj ok bouxdog, roxnyinh gig gadog, de hix naemj gvaq ra boux sai ndeu, youh mbouj gamj seizbienh bae ra.

Hoeng mbouj nyaengq seiz, Nungz Siujli gyaez caemz veihsin、loengh QQ, de roxnyinh miz boux sai he heuhguh Liu Dungjdanj, caeuq de gangj ndaej gig doxngamj, songde miz maz lwnh maz, miz saeh gangj saeh, couh lumj gaenq doxgyaez nei.

Songde doxhanh raennaj baez ndeu, Nungz Siujli couh cang aen siengq haenx bae raen Liu Dungjdanj.

Siengj daengz song boux ngoenz gonq vah unq vah van, haemz mbouj ndaej baez raennaj couh doxgot doxcup hwnjdaeuj, seizneix couh yaek doxraen lo, Nungz Siujli itloh simhai, angqyangz dangqmaz. Ngeix mbouj daengz Liu Dungjdanj raen daengz Nungz Siujli le, mbouj sij ndaej doxbuenx yaep he, hix mbouj rox de caen miz saeh roxnaeuz de yawj Nungz Siujli mbouj hwnjda. Doeklaeng dwk dienhvah hawj de hix cungj dwg gvengih, veihsin hix mbouj raen hwnj lo, QQ hix mbouj daeuj caemz lo, Nungz Siujli ndawsim mbouj naemj hix rox it ngeih lo.

Miz vah naeuz, miz sim ndaem mak mbouj giet aen, fouz sim faenj namh ndaej gimngaenz. Mbouj ndaej raen Liu Dungjdanj, dauqfanj raen daengz Daegvangz. Nungz Siujli roxnyinh baez doxhanh neix mbouj suenq beg daeuj lo.

Nungz Siujli dwg bouxdaeuz aen gunghswh ndeu, de mbouj siengj hawj bouxwnq rox de daeuj raen youx moq. Ngoenzhaenx de naeuz daeuj banhsaeh, hwnz lai mbouj ndaej dauqbae, haetromh couh heuh boux- haici daeuj ciep de dauqbae.

Mehyah Daegvangz yw lix diuz mingh lo, vunz gaenq bienq gvez gvaq, soh noengnoeng ninz gwnz sangz, ndaej gwn mbouj ndaej sangj. Canghyw naeuz, cungj bingh neix aeu miz cib bi bet bi cungj ninz gwnz sangz lo, mizseiz hix youq gwnz sangz gvaq ciuhvunz.

Ndaw ranz gungz youh gungz, hoj youh hoj, bungz daengz gij saeh neix bouxlawz hix roxnyinh mbwn laep, Daegvangz mbouj rox diuz roen baihnaj baenzlawz byaij roengzbae.

Youq yihyen yaek dauqbae ngoenzhaenx, Nungz Siujli daengz yihyen daeuj, doiq Daegvangz naeuz:“Mwngz dauqbae hix dwg co ranz youq, hix dwg bae dajgoeng cij ndaej miz souhaeuj. Yienghneix ba, mwngz bae gunghswh gou guh hong, gou anbaiz diegyouq hawj mwngz. Baenzneix mwngz youh miz souhaeuj youh ndaej ciuqgoq yah mwngz, mwngz naeuz baenz mbouj baenz?”

Ngoenz nit vunz soengq danq, ngoenz gyanq vunz hawj haeux, Daegvangz roxnyinh de raen daengz vunz ndei lo, gikdoengh dwk raemxda yaek doek bae.

（sat）