Canghfaex sang haenqrengz beng diuz faexgyaengh, baujan hozraez song fwngz gaem gaenj hix okrengz beng dauq. Sam fwngz seiq da da daengx da, heiqfodfod, hujdengdeng, nanz faen sawhingz. Canghfaex biz yawjraen gwnznamh miz aen siengceij ndeu, doq gip hwnj daep youq gwnz gyaeuj baujan hozraez. Goengbaetranz gaenj- gip gaem gaiq sauqbaet gaenz raez haenqrengz bae fad aen gyaeuj canghfaex sang. Canghfaex sang dingj mbouj ndaej, baez soeng fwngz, diuz faexgyaengh ndaw fwngz baujan hozraez swnh gij gvenqlig mbouj bien mbouj van cingq fid deng aen bak goengbaetranz. Cij ndaejnyi sing “yo” ndeu, goengbaetranz vit gaiq sauqbaet gaenz raez, song fwngz fung bak, lwed daj gehfwngz lae roengzdaeuj……

Gyoengq canghfaex raen gij cingzgvang mbouj ndei, foenxfoenx sanq bae gyae di. Diuz faexgyaengh ndaw fwngz baujan hozraez youh doeng fid sae fid, goengbaetranz youh deng sauz mbat roengz gyaeuj. “A” sing inget daih swenj, laemx youq gwnznamh.

Gyoengq canghfaex lau dwk ndoet gaemz heiqnit, youh suk doiq bae engq gyae, byawz mbouj lau deng faexgyaengh dat! Raen gij yienghceij goengbaetranz, bouxboux cungj byoemgyaeuj dit, caen hojlienz bouxlaux!

Ndaek baujan hozraez fatguengz lo! Danghnaeuz mbouj dwg bungq daengz goenj suijnizcenh laemx roengzbae, de lij aeu lumj duz mabag vad diuz faexgyaengh dem.

Laj benj hung ndaek baujan venj lingjdai, raen mbouj miz doenghcingh le, song fwngz cengj deih, menhmenh ndot ok benj hung, buhvaq aepaep saepsaep, naj uq namh, cij miz doiq lwgda doeng cim sae yawj, byoem nyungqnyat, bonjlaiz gij byoemgyaeuj roi ndaej caezcaez cingjcingj, seizneix lumj roeg faeg gyaeq. Din haiznaeng duet lo, lohdin mbouj daenj mad. Congh ndaeng lae ok di lwed, najswix bok vengq naeng hoengzgyoengq. Diuz lingjdai lumj diuz rieng duzvaiz ngamq daj gyuekvaiz okdaeuj, venj youq laj hoz, bibuengq mbouj daengx. Hax- baenh de geijlai vifung, hoeng seizneix vunz mbouj vunz, fangz mbouj fangz, mbouj miz saekdi yienghceij. De haeb heuj haeb faenz song fwngz cengj deih cengqgengz ndwn hwnjdaeuj.

Ndaek baujan hozraez laemx youq gwnznamh, miz aen siengceij daep dwk, mbouj deng sieng naeng- gyaeuj, gahengh deng gonj suij- nizcenh bungq in di. De ndwn hwnjdaeuj, song fwngz dawz ok siengceij, hoeng dawz mbouj ok. Aen siengceij yungh doumingzgyauh cug maenh, aeu fwngz hix sik mbouj hai. Ndaek baujan venj lingjdai raen de lumj duz nengznyaen fouz gyaeuj doeng bungq sae ndonj mbouj dingz, couh hemq naeuz:“Gaej ning, gou bang mwngz.” Baujan venj lingjdai saemxsaemx saxsax gvaqbae, song fwngz haenqrengz cij dawz ndaej ok siengceij. Doeklaeng de lumh mbaq- swix swhgeij, sing daemq naeuz:“Ndok mbaq gou goenx lo.” Ciepdwk naengh youq gwnz suijnizcenh.

Baujan hozraez raen goeng- baetranz laemx youq gwnznamh, gip- muengz gvaqbae, yawjraen goeng- baetranz naj cungj dwg lwed, heujnaj raek caez, najbak doed aen nohgyaeq, sing hung sing iq gyangz dwk. Baujan hozraez doeksaetyat, de ienq haenq swhgeij roengzfwngz daiq naek. “Doiq mbouj hwnj, boh’au, gou loeng lo, daeuj, gou fuz mwngz hwnjdaeuj.” De gig gvaqeiq mbouj bae, mbouj gamj cingqda yawj goeng- baetranz. Goengbaetranz byaij mbouj daengz song yamq, ndang baez nyengq, yaek laemx, de caenhrengz bae dingj. Goengbaetranz ndang saenzfaenfaen, gangj vah mbouj baenz coenz. “Gou…… gou yaek dai lo, mwngz deng soengq …… gou …… bae yihyen yw …… yw gou.” Ndaek baujan hozraez baez dingq, simgaenj lo, fuz de naengh youq gonj suij- nizcenh, goengbaetranz siliengz dwk naeuz:“Gou baenzlawz ndaej naengh youq gwnz cien, mwngz siengj hawj gou laemx baez daihngeih dai vaiqdi?” Baujan hozraez youh fuz de naengh youq gwnz bausuijniz, baihlaeng ing geij bau suijniz doxdaeb.

Ndaej rox ndaw daihding oksaeh, laeujdiemq ginghlij haeujdaeuj, yawj- raen gij cingzgvang neix, geizheih raixcaix. Song gvanbaz nem dibanj- cenh gangj hawj ginghlij gij saehcingz baedauq. Ginghlij byaij gyawj sam ndaek haenx, nyaenxheiq dwk naeuz:“Heuh song vunz sou daeuj dang baujan, sou dauqfanj daeuj rasaeh! Goengbaetranz mwngz mbouj bae baet ranz, daeuj neix ra doxdaj, uengjfeiq mwngz baenzneix geq! Baenz lo, sam ndaek sou mbouj yungh youq neix guh hong lo! Doq sousib doxgaiq deuz vunz!”Vadfwngz heuh laeujdiemq bouxguenjngaenz gvaqdaeuj, daengq naeuz gietsuenq ngaenzhong hawj gyoengqde, caemhcaiq gam yawj sam de youq banhaemh 5 diemjcung gonq sousib doxgaiq okdou daep ndei suj. Gangj sat ginghlij bae’ngwtngwt. Sam ndaek haenx doxcim myoegmyoeg. Goengbaetranz raemxda roengzyagyag. Ndaek baujan hozraez siengj deuz, goengbaetranz doq got gagoek de heuh:“Mwngz …… mwngz…… mwngz mbouj ndaej deuz, mwngz haih …… haih gou deng sieng! Ndaek vunz mwngz vad lai, mwngz bietdingh aeu yw ndei gou!”

Baujan hozraez riunyaen naeuz:“Gou mbouj heuh mwngz daeuj, dwg mwngz aeng riengz hangx gou daeuj, dwg mwngz gag daemj diuz faex- gyaengh gou, gij sieng mwngz gag guh gag souh, mboujguenj gou maz saeh.” “Duz …… duz fangzbyaiz mwngz, mboujguenj saeh mwngz, mwngz mbouj ndaej ndei dai! Gou ra denva dwk hawj daeglwg gou heuh de daeuj……” Ndaek baujan hozraez dasang dwk naeuz:“Gou miz soujgih daixbaj, gou hawj mwngz daj heuh daeglwg mwngz daeuj, gou coj mbouj lau.” Ndaek baujan hozraez naj mbouj bienq sim mbouj diuq vaiq. Ndaek baujan venj lingjdai naeuz:“Song sou gaej cauz lo.” “Cauz?” baujan hozraez fanj cam de, “Dwg mwngz heuh gou daeuj, seizneix gou mbouj miz hong guh lo, mwngz baenzlawz naeuz?” Gangj sat, mbek song fwngz goeng- baetranz, goengbaetranz caenhrengz got dwk, di he mbouj soeng fwngz.

Ndaek baujan venj lingjdai roxnyinh daengx ndang lumj mbouj miz ndok nei youh unq youh in, ndwn hwnjdaeuj, yamq mbouj bae, couh naengh roengz gonj suijnizcenh sim naemj, itdingh deng sieng ndaw, de doeknaiq dwk doiq gyoengq canghfaex gouz naeuz:“Gyoengqsou daenz gou sieng naek lo, vaiqdi soengq gou bae yihyen!”

Gyoengq canghfaex lumj daj ndaw loq doengzseiz dauqsingj gvaq- daeuj nei, mwngz “yo” sing, gou “yo” coenz, mwngz bek fwngzswix gou, gou bek fwngzgvaz mwngz. Bouxbwngienj naeuz:“Gij sieng baihlaeng gou sou mbouj leix lo?” Canghfaex geq heuh de duet buh, bouxbwngienj naeuz:“Gij sieng gou dwg ndwengonq hai mohdozceh fan ci deng sieng ngamq ndei, haxbaenh youh deng baujan hozraez nyoeg deng, bae ra ywdoj daeuj oep couh baenz lo.” Gangj sat, byaij ok bakdou hung bae. Canghfaex biz naeuz:“Seizneix gaenq dwg 4 diemjcung lo, raeuz bae haw cawx nohma bae ranzco yaed laeuj.” Canghfaex sang cam:“Haxbaenh dwg bouxlawz gip gij ngaenz dwkbaiz hwnjdaeuj, couh dawz bae cawx nohma soengq laeuj.” Canghfaex geq dap naeuz:“Dwg gou gip, miz 256 maenz ngaenz.”

Gyoengqde miz gangj miz riu, byaij coh bakdou hung……（sat）