Daegvangz ngamq yamq din haeuj dou ranz, soujgih yiengj lo.

“Vei, gou gaenq daeuj daengz lo, mwngz youq gizlawz, vaiq daeuj luvei.” Dwg mehmbwk ndeu gangj vah.

“Mwngz dwg bouxlawz? Youq gizlawz daeuj? Daeuj guhmaz?” Daeg- vangz cam.

“Mwngz gangj maz vah, geij ngoenz gonq raeuz couh doxhanh ngoenzneix gou daeuj neix raen mwngz, mwngz mbouj dawz haeuj sim ha?”

Ndaw dienhvah, mehmbwk ndeu vah gangj ndaej gig gaenj, couh lumj lau vunz mbouj bae raen de nei.

Daegvangz gaeugaeu gyaeuj, ngeix mbouj hwnj geij ngoenz neix de caeuq bouxlawz miz hanh doxraen.

Daegvangz dwk dienhvah gvaq- bae, siengj cam ndaej coenz cingqging ndeu:“Vei, mwngz dwg bouxlawz? Youq gizlawz daeuj? Daeuj guhmaz?”

“Raennaj mwngz couh rox gou dwg bouxlawz lo, daeuj vaiq di, gou youq doiqnaj Sinhvaz Sanghcangz caj mwngz.”

Daegvangz byaij haeuj ndaw ranz bae, yawjyawj ndaw rug, mbouj raen mehyah dauq, de soeng gaemz heiq ndeu.

Daegvangz roiroi byoemgyaeuj, cingqcingq geu buh, roxnyinh aen siengq swhgeij yawj ndaej swnhda le, okbae lo.

Seizneix mbwn gaenq laep dingh, rog gai ranzranz hai daeng, bakdou Sinhvaz Sanghcangz vunz ndaetfoed- foed. Daegvangz cuengqda yawj gvaqbae, naemj yawjyawj gyoengq vunz nyaengqfoedfoed ndawde miz mbouj miz boux roxnaj haenx.

Daegvangz raen dah ndeu ing youq bakdou sanghcangz, dah neix 20 lai bi, naj gyaeqbit, byoem ndaem- ndad, noh hau oiq, de cingq gwn ndaek sezgauh ndeu. Hoeng, dah neix Daegvangz mbouj roxnaj. Dah ndeu ndwn youq bien gai, doiq lwgda de mbouj dingz dwk yawj baihswix youh yawj baihgvaz, lumj cingq caj vunz nei, dah neix naj luenz noh maeq, nyumx byoem henj, Daegvangz hix mbouj roxnaj.

Daegvangz dawz soujgih okdaeuj dwk dienhvah:“Vei, mwngz youq gizlawz ha, gou daeuj daengz lo.”

“Gou youq…… gou youq……”

Daegvangz roxnyinh sing ciep dienhvah couh youq doiqnaj de, de riengz sing yawj gvaqbae, liz de song yamq din gyae gizhaenx ndwn miz mehmbwk ndeu, mehmbwk neix ndaej 40 bi baedauq, gwnz daenj buh geknding, laj daenj vaq niuzcaij, byoem ndaem noh hau, yawj buh daenj, de dwg vunzguhnaz, yawj saeknaj, couh roxnyinh de mbouj dwg boux youq laj ndit guh hong.

“Mwngz ra gou?” Daegvangz byaij bae daengz gaenh, doiq meh- mbwk neix naeuz.

“Aen hauh soujgih mwngz dwg 138XXX6356?” Mehmbwk neix cam.

“Dwg ha, mwngz ra gou?” Daeg- vangz youh cam.

“Gaej youq neix gangj lai lo, raeuz ra giz dieg he naengh roengz- daeuj caiq saeq gangj ba.” Mehmbwk neix naeuz.

Daegvangz naeuz ndei. Song boux couh doxgaen byaij haeuj aen caz- diemq liz Sinhvaz Sanghcangz mbouj gyae bae.

“Mwngz gwn caz maz?” Daeg- vangz cam.

“Mwngz gwn maz gou couh gwn maz.” Mehmbwk neix naeuz.

“Gou dwg bouxvunz dajgoeng ndeu, gig noix haeuj gij diemq neix daeuj, hix mbouj miz ngaenz daeuj cungj dieg neix sawjyungh. Mbouj rox caz maz ndei gwn.” Daegvangz naeuz.

“Mwngz mbouj dwg Liu Dungj- danj?” Mehmbwk neix cam.

“Mbouj dwg ni, gou dwg Mungz Daegvangz.”

“A, aen hauh soujgih mwngz mbouj dwg 138XXX6356?”

“Dwg ya!”

Mehmbwk neix dawz soujgih okdaeuj, fanfan yaep he, naj nding dwk naeuz:“Doiq mbouj hwnj, dwg gou dwk loek dienhvah lo, boux vunz gou naemj ra aen hauh soujgih de dwg 138XXX6536 hani.”

Daegvangz riuriu, gag bi gyaeuj laklak.

Daegvangz haidaeuz couh rox- nyinh geizheih, de mbouj caeuq vunz doxhanh gvaq, baenzlawz miz vunz daeuj ra de ni? Saehcingz gaenq loengh daengz yienghneix, Daegvangz hix mbouj ndaej vut vunz youq gizneix couh lizbae, de seizbienh heuh aeu cungj caz daeuj le, song boux doq gwn caz doq gangjgoj.

“Raeuz gwn caz sat le, mwngz couh dwk dienhvah hawj baengzyoux mwngz ba, gou couh mbouj cauznauh sou lo. Gawqyienz raeuz gaenq roxnaj, youq dieg neix bungz daengz maz saeh aeu gou bangcoh, mwngz couh heuh gou ba. Ndaej bang gou itdingh caenhrengz bang.” Daegvangz gangj.

“Docih lo, gou daengz neix vunz dieg mbouj sug, boux daih’it couh bungz daengz mwngz boux vunz ndei nei, gangj daeuj suenq gou miz fuk lo.” Mehmbwk neix riu naeuz.

Daegvangz bae hawj ngaenz gwn caz, caeuq mehmbwk neix vah doxbyag le, song boux gag bae guh saeh swhgeij.

Daegvangz dauqbae lo. Daeglwg youq baihrog doeg dayoz, ndawranz cij miz de caeuq mehyah song boux vunz, mehyah de youq aen gunghcangj he dajgoeng, mizseiz de gyaban, haeux- caeuz couh mbouj dauqranz gwn lo, bungz daengz haemh yienghneix, Daegvangz couh seizbienh gwn di haeux lw byaek gyoet couh gvaq donq. Haemhneix mehyah de youh gyaban lo, de couh mbouj dajsuenq caiq cawj haeux gwn.

Daegvangz lizbae le, mehmbwk neix doq byaij daengz Sinhvaz Sanghcangz, dawz soujgih okdaeuj dwk dienhvah hawj baengzyoux de —— Liu Dungjdanj.

“Vei, gou gaenq daeuj daengz lo, mwngz youq gizlawz, vaiq daeuj luvei. Gou youq doiqnaj Sinhvaz Sanghcangz caj mwngz.”

Gwnz gai daeng ronghsagsag, vunz bae ci dauq, mehmbwk neix yawj swix yawj gvaz, mbouj raen boux vunz de caj daeuj daengz.

Youq gwnz veihsin, Liu Dungj- danj fat haujlai dozsiengq hawj mehmbwk neix gvaq, danghnaeuz de daeuj daengz doiqnaj, mehmbwk haengjdingh roxnaj de.

Dienhvah yiengj lo, mehmbwk miz di sim’angq, de ciep dienhvah seiz, mbouj ndaejnyi doiqfueng gangj vah, dauq ndaejnyi baihlaeng miz vunz heuh:“Vei, vei, mwngz couhdwg Nungz Siujli?”

Mehmbwk neix baenqnaj dauq laeng, baihlaeng ndwn miz bouxsai ndang hung youh sang ndeu, de naeuz:“Dwg ha, mwngz couhdwg Liu Dungjdanj?”

Boux sai haenx daj gwnz daengz laj yawj mehmbwk neix baez he, miz di doeksaet, aen naj ngamqngamq hai riu haenx rub caem roengzdaeuj, song boux cungj roxnyinh mbouj ndei eiqseiq.

Caem le yaek ndeu, mehmbwk neix naeuz:“Lij ndwn guhmaz? Raeuz bae ra giz dieg naengh he gangjgoj ba!”

Boux sai haenx yawj gonq ngonz laeng le naeuz:“Caen doiq mbouj hwnj bw, haemhneix gou mbouj ndaej buenx mwngz lo, meh gou bingh lo, ra boux ciuqgoq mbouj miz, mwngz bae ra dieg youq gonq ba.”

Ndaejnyi daxmeh Liu Dungjdanj baenzbingh, mehmbwk neix hix mbouj caiq gangj maz, cijndei naeuz:“Ndei ba, mwngz bae ranz ciuqgoq daxmeh mwngz gonq, gou gag youzyouz gai.”

Boux sai haenx dauqbae lo, mehmbwk neix boux dog byaij youq gwnz gai, aen uk de fanfoek siengj mbouj dingz.

Mehmbwk neix gig naemj bae ra gizyouq he, ngoenzcog caiq dajsuenq, youh naemj daengz Liu Dungjdanj ndawranz miz vunz bingh, aiq mbouj fuengbienh doxraen lo, seizneix lij caengz suenq hwnz, lij miz ci dauqbae, dauqbae suenq lo.

Mehmbwk neix roengz gietdingh le, naemj lwnh hawj Liu Dungjdanj nyi, de dwk dienhvah gvaqbae, dienhvah yiengj hoeng mbouj miz vunz ciep. Mehmbwk neix caiq dwk gvaqbae, dienhvah gvengih lo.

Mehmbwk neix naemj: Ndaek vunz neix dwg mbouj dwg raen aen siengq gou yienghneix le couh mbouj siengj caiq leix gou ni? Hei, suenq lo, miz saeh hix ndaej, mbouj siengj raen hix baenz, dauqdaej dwg baez daih’it doxhanh daeuj raennaj, mbouj swnhleih hix dwg ciengz saeh.

Seizneix soujgih mehmbwk neix yiengj lo, de yawj da he, 138XXX6356, dwg Daegvangz dwk daeuj.

“Vei, mwngz lienzhaeh hwnj baengzyoux mwngz loba?” Daegvangz cam.

“Lienzhaeh hwnj lo, de mbouj miz hoengq daeuj buenx gou ni.” Mehmbwk neix fouznaih dwk dap.

“A, sou mbouj dwg doxhanh ndei cij daeuj doxraen ma, baenzlawz vunz daeuj daengz lo, youh bienq yiengh- neix!” Daegvangz geizheih dwk cam.

“De naeuz daxmeh de bingh lo, hei, suenq lo.” Mehmbwk neix gangj.

“Yienghneix, mwngz couh gag ra diegyouq ba, mwngz miz mbouj miz ngaenz bae hekdiemq aeu aen rug youq, miz mbouj miz ngaenz gwn haeux, danghnaeuz aeu gou bang mwngz, couh dwk dienhvah hawj gou.” Daegvangz naihsim daengq.

“Danghnaeuz mwngz mbouj nyaengq maz, mwngz couh gvaqdaeuj ba, gou naemj raen mwngz.” Mehmbwk neix naeuz.

Vahsug naeuz: Dag ndang caiz buhvaq, yawj nya langh cwzvaiz.Daegvangz souhaeuj noix, bingzseiz mbouj ndaej youq baihrog gwn caeuz- ngaiz gvaq, seizneix yaek ciepdaih mehmbwk neix, de mbouj ndaej mbouj okrog bae gwnz caeuz, de doiq gij gwn baihrog mbouj daiq sug, cijndei seizbienh daiq mehmbwk neix haeuj aen diemq haeux he bae gwn caeuz.

（caengz sat）