Ndwen 6, gou caeuq ndaw mbanj geij bouxdoih bae daengz Guengj- doeng Fuzsanh ranz laeujdiemq ndeu guh hongdajcang. Dou ceiq maenh bae ciengz, lauxbanj couh anbaiz dou hwnjbae caengz daihsam, vix naeuz faq ciengz lawz bae hau, faq ciengz lawz nem cienmeng, youh heuh dou daeh niswjfaenj hwnj caengz daihsam bae.

Gij niswjdaenj bae ciengz gaenq doi youq baihrog bakdou hung. Gou caeuq Daegsam ram hwnjbae hawj gyoengqde bae ciengz, 50 bau niswj- faenj aeu haet ndeu cij ram caez.

Gyanghaet 8 diemj buenq cung, geijcib boux vunzgoeng youq ndaw laeujdiemq hung nyaengqnyatnyat, miz loh dwk gag boux guh gag hong. Song boux canghfaex ram aen gunghyazgih ndeu hwnj daengz caengz daihngeih mbaeklae, aen daeh suliu ndaem ndeu coq youq gwnz gunghyazgih vaih lo, ndaw daeh lozswhdingh doek roengzdaeuj, miz haj roek gaen baedauq, loenq youq gwnz geij mbaeklae, boux riengzlaeng yungh din baet gvaq mbiengj ciengz, naeuz ram gihgi hwnj caengz daihseiq bae gonq caiq roengzdaeuj gip.

Gou caeuq Daegsam ram ndaej baez daihhaj, roengz daengz mbaeklae caengz daihngeih, raen goengbaetranz 60 lai bi cingq yaengx gaiq sauqbaet baet gij lozswhdingh haeuj daeh cang nyapnyaj bae. Gou sikhaek doiq de naeuz:“Gaej baet, gij lozswhdingh lij aeu!” Hoeng, de lumj mbouj ndaejnyi gou gangj maz, laebdaeb guh.

Mbwn ndwenloeg, bienqvaq vaiq, gyanghaet fwj hau daengngoenz angj, oem’aeng dangqmaz. Cij ndaej- nyi byajraez “hung hung” geij sing, yaek doek fwn lo, gou caeuq Daegsam gipmuengz buet ok bakdou hung bae daeh geijcib bau niswjfaenj haeuj- daeuj, ngamq daeh liux, fwn couh doek lo, haenq lai.

Song boux canghfaex gak boux dawz aen daehsuliu hau roengz mbaeklae caengz daihngeih gip loz- swhdingh, mbouj raen saek naed, miz di geizheih, cam gou raen byawz gip bae, gou vix goengbaetranz. Song boux canghfaex gvaqbae cam goeng- baetranz. De mbouj naihfanz, vix dou hung baihrog doi nyapnyaj, naeuz:“Boekbak youq gizde.”

Song boux canghfaex baez dingq, bak ajloengqloengq. Boux canghfaex sang hozhwnj faegfaeg rongx naeuz:“Dairaq mwngz! Mbouj rox yawj gij lozswhdingh moqsak dwg ngamq cawx ma?”

Goengbaetranz hix mbouj han, laenggoz moegdoeg ndwn youq gok- ciengz, gaemz ien dawz gyangfwngz, ndoet hix mbouj dwg, vit hix mbouj dwg, song ndokgemj doed ok yaek coeg vunz, gij byoemgyaeuj nyumx gvaq, ndaw hau miz hoengz, ndaw ndaem youh cab miz lamz, mbouj sam mbouj seiq dwgcaengz yaekdai.

Boux canghfaex biz naeuz:“Baenzlawz guh ne, cib lai boux vunz deq cang diudingj hwnj dienmienh bae cang denhvahbanj, mbouj miz lozswh- dingh, ngoenzneix mbouj ndaej guh hong lo.” Boux canghfaex sang naeuz:“Hong gaenj cixbah, youh deng goeng bag neix gauj vaihsaeh. Gou yawj naj mwngz dwg bouxlaux, mboujnex, gou caen siengj dik geij din hawj mwngz!” Goengbaetranz dingq le vuengmuengz deuzbae……

Gou caeuq boux canghfaex biz gangj dauqcungz bae cawx lozswh- dingh dauqma couh ndaej lo. De naeuz:“Mwngz mbouj rox, gij lozswhdingh gig daegbied, bae Gvangjcouh dingh aeu cij ndaej. Haxbaenh gou dwk denva hawj lauxbanj gai gij lozswh- dingh neix, de naeuz gvaq song ngoenz cij ndaej.” Lingh boux canghfaex geq naeuz:“Deq song ngoenz, gou baema suenq lo.” Lingh boux canghfaex oiq naeuz:“Baema caiq daeuj sai bae geij bak maenz, mwngz sij ndaej?”

Doeklaeng gyoengq canghfaex mbwq dwk byaij hwnj byaij roengz, gou gyoh gyoengqde deq youq ndwi, hozndat goengbaetranz euqgeuz laek- gaek.

Ngoenz daihngeih, cib lai boux canghfaex youq gungx ndaw daihding laeujdiemq dwkbaiz, cauz hemq gyuk- caca. Boux baujan venj lingjdai laeujdiemq byaij gvaqdaeuj cam:“Sou mbouj guh hong, youq gizneix hemq maz?”

Caezgya yawj de da ndeu, mbouj swt de. Gvaq le cib faen cung, de youh gvaqdaeuj, yakriri dwk naeuz:“Sou caiq nauh roengzbae, gou couh gyaep sou ok bakdou!” Seizneix miz boux ndeu dap naeuz:“Song ngoenz neix guh mbouj ndaej hong.” Boux baujan neix di he hix mbouj saenq couh deuz lo.

Dwkbaiz dwg cungj guh’angq boux youq rog dajgoeng ceiq ngah, mbouj yinx geijlai, dwk maenz ngaenz he, byawz hingz couh ndaej boux saw haenx maenz ngaenz he. Seizneix, gyoengq canghfaex ra ndaej 4 aen doengjyouzcaet daeuj, gwnz vang gep benj, gak boux gak ra ndaek suijnizcenh, naengh humx gvaqdaeuj. Mizmbangj mbouj miz dieg naengh, ndwn humx youq boux ndaej naengh baihlaeng, baiz baij cungqgyang benj hung, gak boux gak baij ngaenz youq seiqhenz.

Sawhingz mbouj youqgaenj, caezgya couh maij nauhyied. Cingq dwk daengz seiz haenq, boux baujan venj lingjdai daiq lingh boux baujan haeuj bakdou daeuj. Boux baujan neix hoz raez, sangrwd, byoemgyaeuj roi coh baihlaeng, daj mozswh wenj- yapyap, fwngzgvaz dawz diuz faex- gyaengh ndeu. Baihlaeng riengz boux goengbaetranz, dawz gaiq baetgaenz- raez, doq byaij doq damzbyoedbyoed:“Bang goet cienh neix okbae!” Gou caeuq Daegsam youq daihding doq daengq sang, ndaej raen gij saehcingz daj goek daengz rieng.

Bouxbwngienj canghfaex fwd roxnyinh baihlaeng de miz diuz faexgyaengh hung lumj gaenzcax nei dingj dwk baihlaeng. Henz ndang song canghfaex ngeuxgyaeuj yawjraen dwg boux baujan hozraez fwngzgvaz gaem diuz faexgyaengh.

“Mwngz?” Song canghfaex doek- saet dwk cam.

“Gaej ning!”Baujan hozraez yak- doeg dwk naeuz.

“In yo!” Bouxbwngienj canghfaex swenj naeuz. Baihlaeng deng faex nyoeg gizhaenx gij lwed gaenq conh ok buhhau. Gyoengq canghfaex ndwn dwkbaiz haenx humx gvaqdaeuj, gienq naeuz:“Baujan sienseng, lajfwngz louzcingz lo.”

Baujan hozraez yawjsiuj dwk naeuz:“Haxbaenh de mbouj dwg angq hemq yaek dai ma? Seizneix youh swenj in lo? Cangmoengx.”

Hangz vunz baenzlai! Boux canghfaex sang byaij gyawj, fwngzgvaz gaem dawz gyang faexgyaengh doi coh baujan hozraez, song boux canghfaex doq rex bouxbwngienj gvaq henz bae, boux baujan venj lingjdai song fwngz doq fan boek gep benj, gep benj neix cingqngamj daengj youq gwnz gyaeujhoq geij boux canghfaex naengh. Gij baiz caeuq ngaenz loenq youq gwnz gyaeuj gwnz mbaq, doek roengz gwnznamh, vava loegloeg. Song boux canghfaex ndwn haenx doq rax dawz benj hung, coh boux baujan venj lingjdai nyoengx bae, lumj raq rumzhwx fwd daeuj, de laemx roengz laj benj. Gep benj hung dimz dwk, de haenqrengz yaek dingj fan benj hung, haj roek boux canghfaex hixnaengz yungh fwngz gaemh dwk, de lumj duz mou hung yaek deng gaj buekmingh cak swenj:“Gou ndaej hwnjdaeuj ni, aeu dai sou!” Gyoengq canghfaex dingq le, engqgya hozndat, aeu din caij daenz benj hung, laj benj cienz daeuj gij sing swenjyauyau.

（caengz sat）