Baez daengz ngoenzciet, gyoengq beixnuengx Bouxcuengh gak mbanj Cangzdangz Cin Cinghsiu Gih Namzningz Si couh roq gyonglaz boq loxlez dwk angqangq yangzynagz diuq foux yienglungz ronggyoij, banh gij hozdung fungsug ndawbiengz foux lungzronggyoij hoenghhwd haenx, mbaenjgouz lungzsaenz baujyouh vunzmbanj an’onj ndangcangq、miz lwg miz lan、saedceij vuenyungz. Bi 2010 ndwen 5, fouxlungzyieng rong- gyoij Bouxcuengh Cinghsiu Gih ndaej lied haeuj swcigih buek daihsam feih vuzciz vwnzva yizcanj mingzloeg, bi 2012, Cinghsiu Gih ndaej Cungguek vwnzyi’gyah ndawbiengz hezvei ancoh guh “mbanjranz lungzyieng rongyoij Cungguek”.

Lungzrongyoij caeuq gij guh- hong、saedceij vunzlai doxgven maedciet, miz gij cwkrom vwnzva ndaemnaz Bouxcuengh nanwt, gaek- deu miz gij yaenqlog vwnzmingz dajndaem daegbied Bouxcuengh. Gaxgonq roeb mbwnrengx seiz, gyoengq vunzlai Lungzanh、Yungh- ningz、Liengzging、Cinghsiu daengj Yienhgih Namzningz Si cungj aeu diuzgaeu hotheuz youq gwnz go’gyoij le baenz go vut roengz ndaw raengz bae, aeu neix daeuj heuh ndiu duzlungz, hawj duzlungz fonjndang, yienghneix couh miz fwndoek lo, biujdap le gij simmuengh gyaeundei vunzlai mbaenjgouz rumz dingh fwn yinz haenx. Ndigah lungzronggyoij cix dwg biujyienh cungj yizsi cuengqcaeq ndeu, daj hainduj daengz gatsat miz daj henz raengz cingj lungz、heuh lungz ndiu、lungz fonjndang、lungz loengh caw、lungz dawz mok、lungz roengzfwn、gyo’mbaiq lungz、cingj lungz dauqma ndaw raengz daengj baenz dauq guhfap, yiemzrwd hoenghhwd.

Foux lungzyieng ronggyoij Bouxcuengh dwg diuqfoux ndaw- biengz Bouxcuengh youq ranghdieg Cangzdangz Cin Cinghsiu Gih caeuq gij dieg henzgyawj de riuzcienz lai, daengz seizneix gaenq miz 300 lai bi lizsij. Youq gij dieg neix, baez daengz ndwencieng roxnaeuz ngoenz- ciet ngoenz angqhoh, daegbied dwg liggaeuq ndwencieng cobet、ndwen- ngeih co’ngeih、 sam nyied sam、seiq nyied bet、ngux nyied ngux、ndwencaet cibngeih daengz cibloeg, lij miz liggaeuq moix ndwen coit、cibngux daengj, vunzmbanj cungj guh ceiz baek yieng cuengqcaeq, aeu goek go’gyoij guh gyaeujlungz, aeu ganj go’gyoij cug baenz ndanglungz, cugswnj baenz yiengh duzlungz, caemhcaiq youq gwnz gyaeuj、ndang duzlungz baek diuzyieng diemjdawz rim doh, youq ndaw naz gyaeujreih diuq foux lungzyieng ronggyoij mbaenj fuk, comz doih fouxlungz biujyienj, caemhcaiq guh baenzdauq hozdung. Cungj foux neix goekrag de dwg daj foux goengsae Bouxcuengh daeuj, gvaqlaeng supsou le gij yamqfoux caeuq yienghdoengh heiq goengsae、heiq mauhngeg、dwkgienz、sajbajheiq daengj vwnzva cienz- doengj, yienjbienq baenz cungj hingzsik diuqfoux miz daegsaek minzcuz naekgywg daegbied ndeu, aeu gij yamqfoux geizlaenz goengsae、yamqfoux goujcingq guh diuqfoux biujyienh hingzsik daegbied de, gij doenghlwd diuqfoux de lai yiengh ndei yawj, gij yienghdoengh vaiq- menh de mingzbeg yienhda, ndaw- comz vwnzva lai cungj lai yiengh.

Lungzyieng ronggyoij gungh miz 9 hoh, moix hoh cungj aeu duk san ndei caiq aeu ndaijgyoij cug ndaet lienz baenz duzlungz, caiq cug gapgyoij baek ronggyoij hwnjbae, youq gyaeujlungz、ndanglungz baek baenz geij cien diuz yieng diemjdawz yaprongh haenx, guh baenz duzlungz gouj hoh raezrangh yap rongh lwenqda ndeu. Miz gouj boux goengsae foux lungz, boux ndeu foux hoh ndeu, lingh miz boux vunz ndeu byaij youq baihnaj duzlungz foux cawlungz hairoen. Bouxsai foux lungzdaeg, bouxmbwk foux lungzmeh, lungzdaeg lungzmeh miz yiengh faen ndaej yienhda, lungzdaeg najdungx dwg saek hoengz, laenghwet aeu gij ronggyoij rozhenj cugguh, ndaw heu miz henj, yawj hwnjdaeuj vifung gvaekgvaek; lungzmeh ne cix dwg cingh saek heu. Baenz duz lungz caenh raen gapgyoij ronggyoij, henj- cengj heusaux, yawj bae gaeuqgeq、mbwnbaenz, daegsaek yienghnduj yienhda.