Gou caen hojlienz, youq aen ranz neix, gou gangj mbouj ndaej coenz cixbah, caemhcaiq hong naek hong mbaeu cungj aeu gou raq gonq, mbouj ndaejhoengq saek lawz dem.

Gou caen hozhaenz daeglwg gou, baez okseng couh ndaej dang “vuengzdaeq”. De baez daej, daengx ranz vunz couh riengz de vueng; de baez noh ndat gyaeuj in, daengx ranz vunz haemz mbouj ndaej lawh de ndat lawh de in; de rox gwn haeux le, gij haeux gij byaek aeu aeknaj de; lij bibi miz buh moq haiz moq daenj gvaq cieng. Dang “vuengzdaeq” caen dwg ndei, hoeng, gou ceiq hozhaenz lijdwg “meh vuengzdaeq”—— mehyah gou.

Aenvih de ndaej dawz ngaenz, gij ngaenz ndawranz cungj dwg de guenj, moix baez saiyungh youz de daeuj dingh. Gij ngaenz ndawranz de haeujsim bae guenj, moix baez sou- haeuj de sijsaeq guh soq, moix baez saiyungh de gig yiemz. Seiz angq, de baez bi fwngz couh naeuz dawz bae; seiz huj, de faen ngaenz ndeu hix mbouj hawj, lij aeu fouqda daeuj daengx vunz dem, daengx dwk mwngz dwglau bae.

Dangyienz, giz baenz sai lij aeu sai. Gij ngaenz sai youq ndawranz de mbouj mbaet, haethaemh riengzgyongq de miz laex. Gvaq ciet seiz hawj bouxgeq di cienzlingzyungh de guh ndaej daengz. Caencik baengzyoux miz hoj miz nanh daeuj ciq ngaenz, de aenq ndang caiz buh bang ndaej geijlai suenq geijlai. Gangj vahsaed, ndawsim gou doengzeiq de daeuj guenj ngaenz ndawranz.

Hoeng, gou mbouj muenxeiq de doiq gou gig ged, de caeuq daxmeh gou doxdoengz, cungj naeuz bouxsai miz ngaenz couh rox bienq vaih, ndigah bingzciengz de noix hawj gou cienzlingzyungh. Bouxsai gwnz ndang mbouj miz faen cienz lawz lij baenz bouxsai ma? Guhmaz bouxsai dem! Gwnz ndang mbouj miz saek faen cienz, mboujdan dwg ndawsim gou mbouj cwxcaih, caemhcaiq guh maz saeh cungj mbouj fuengbienh.

Lumjbaenz, mizseiz gyoengqdoih heuh bae gwnz haw gwn laeuj rox- naeuz gwn caz, daihgya doq gwn di laeuj caz doq gangjgoj nauhyied, dwg saeh angq. Gwn gyoengqdoih geij donq le, hix daengz swhgeij cingj saek donq lo, neix heuhguh miz mwngz miz gou, miz bae miz dauq. Baez daengz vih neix cam mehyah gou aeu ngaenz, de mboujdan mbouj hawj lij aeu vah daeuj gik gou, naeuz gij baengzyoux laeuj noh gou miz mbouj miz hix mbouj youqgaenj. Moix baez ndaejnyi gij vah neix, ndawsim gou gig haemz, gag mieng naeuz gou aeu rom di cienzrei cij ndaej bw.

Gizsaed rom cienzrei naeuz ngaih couh ngaih, naeuz nanz couh nanz.

Baez daih’it mbaet cienzrei, gou dwg daj cienz cawx byaek ndawde yom ndaej. Mehyah gou mbouj gamj hai cimohdoz, baenzneix bae haw cawx byaek couhdwg gou bae lo. Moix baez gou cungj daj cienz cawxbyaek mehyah gou hawj yom di ndeu coq youq daeh swhgeij, ndwen ndeu roengzdaeuj hix rom ndaej 300 maenz. Hoeng, baez daih’it rom cienzrei, mbouj miz ginghyen caemhcaiq mbouj rox guenjleix, baezhaenx rieg buh guh saeg, dwklumz dawz cienz okdaeuj, deng mehyah gou fatyienh, doeklaeng de laeglemx muedsou bae lo. Haemh- haenx gwn caeuz seiz, mehyah gou da mbotgyawqgyawq lah gou, mbouj ok sing, cukcuk miz haj faen cung, lumj doiq gou naeuz:“Mwngz caen ndaengqcwq bw, hainduj gamj rom cienzrei lo!”

Ndwen daihngeih gou youh rom ndaej 300 maenz. Mbatneix gou hag gvai lo, dawz cienz diem haeuj daehbuh geu buh gaeuq ndaw gvihbuh bae. Geu buh neix gou gaenq miz 3 bi mbouj daenj lo, dwg cungj buh vut bae youh hojsik, ce daeuj youh mbouj daenj haenx. Gou laihnaeuz cienz diem youq gizhaenx onj di.

Haemh ndeu, mehyah gou swiq- ndang sat le dawz geu buh neix daeuj roemj, lij daekeiq fefe dwk youq dangqnaj gou byaij bae byaij dauq dem. Gou raen le gikheiq yaek dai, haemz mbouj ndaej gvaqbae ciengj geu buh haenx dauq. Hoeng, gou rox mbouj miz yungh lo, cijndei gag nyinh boihseiz. Gizsaed haemhhaenx, dien- heiq mbouj suenq gyoet, mbouj aeu aemq buh hung. Yah ced haeu neix, daj mbat gonq de fouzeiq fatyienh gij cienzrei gou le, de bienq ndaej “singjsuij” lo.

Aen yienh dou deng heuhguh “Mbanj makgaivaiz Cungguek”, ranz- ranz cungj miz suen makgaivaiz. Ranz gou hix miz aen ndeu, aiq miz cien lai go makgaivaiz. Bi de mak cug lo, gvanbaz dou bae mbaet mak. Moix mbaet ndaej rim 4 loz, gou couh aeu cisamloek daeh mak bae haw gai, mehyah gou youq ndaw suen laebdaeb mbaet mak caj gou. Baenzneix gou youh miz gihvei yom ngaenz lo. Moix baez gou daj souhaeuj yom di okdaeuj yo youq daeh swhgeij, dauqdaeuj le bauq soq gyaj hawj mehyah gou. Bi gai makgaivaiz, gou youh rom ndaej 1000 maenz ngaenz. Mbatneix gou aeu haeujsim bae diem cienzrei cij ndaej.

Sahfaz ranz gou dwg baengz guh, gaiq demh haenx youh na youh naek, gou dawz cienzrei aeu daehsuliu suek ndei le, oet haeuj laj demh bae, gou gag nyinhnaeuz byawz gwn imq mbouj miz saeh guh, rox daeuj biengj gaiq demh neix.

Liuh mbouj daengz, miz ngoenz ndeu, daeglwg gou, cingq doeg siujyoz seiq nienzgaep, aenvih ra gonj bit de, dawz gaiq demh sahfaz fan hwnj fan roengz, cienzrei gou youh deng laeuh lo, gou heuh haemz heuh hoj. Hoeng, gou lij mbouj roxhit, ciuqyiengh aeu rom.

Seizdoeng dwg aen geiq dou ceiq nyaengq、 souhaeuj ceiq sang ——“byaek baihnamz soengq bae baihbaek” daj giz dou hwnjdin, gij souhaeuj gai byaek hawj bouxguh- reihnaz vuenheij raixcaix.

Gou lumj baezgonq nei yom cienz. Gij souhaeuj gai byaek gou youh rom ndaej 2000 maenz cienzrei. Mbatneix gou mbouj ndaej lujlaj lo, aeu ndeindei diem maenh. Ndaw rug ndaw ding gou yawj caez, guggug gehgeh gou caz doh, doeklaeng gou gietdingh dawz cienz diem haeuj aen gvih coq ceijcienz gyang ding bae, gou lij gag laihnaeuz coengmingz youq ngaenz caen baihgwnz baihlaj gab gij ceijcienz, caiq cug baenz bog he, coq youq ndaw gvih. Byawz rox ceijcienz ndawde miz ngaenz caen ne? Sim onj lo! Seizhaenx gou lij miz di daekeiq fwngfwng.

Ngoenz ndeu banringzgvaq, gvanbaz dou sou hong maranz. Gou yamq haeuj dou ranz seiz, raen aen lozyieng gwnz congzbaed miz yieng dawz, gwnz congz miz nohmou cug caeq, gij heiq ndat lij biufifi. Daxmeh gou cingq coemh ceijcienz, gwnzdieg gaenq miz ndaek daeuhfeiz miz gaemz gienz bouxhung baenzneix hung.

Gou baez raen, sim diuq byoebbyoeb, lumj yaek diuq okbak daeuj nei. Gou sikhaek vut faggvak gwnz mbaq gou youq gokciengz lajroq, sam yamq gyonj guh song yamq bongh daengz henz gvih ndaw ding, dajhai aengvih daeuj yawj. Mbwn ha! Dab ngaenz gou diem haenx mbouj raen lo, gou roxnyinh mbouj ndei, cienqndang dauq cim daxmeh gou, sing sang dwk hat de naeuz:“Mbouj gvaq ciet mbouj gvaq cieng, mwngz coemh maz ceijcienz?”

Daxmeh gou mbouj rox vihmaz gou hat de, cij vei naeuz:“Haemhlwenz gou loq raen daxgoeng daxbuz mwngz daeuj cam gou aeu ngaenz.” Daxmeh gou mbouj yawj gou, cijdwg dawz ga dawh gaeuq ndeu diksaiq gij daeuhfeiz.

“Gung” sing ndeu, gou nyaenx mbouj ndaej dub gwnz gvih mbat gienz ndeu. Daxmeh gou deng hwk lo, ngiengxgyaeuj daeuj yawj gou, cam:“Baenzlawz lo?” Gou cingq yaek fatheiq naeuz okdaeuj, sawqmwh raen mehyah gou ndwn youq bakdou, maegsaeg dwk yawj gou, gou sikhaek doij lumj ma iem nei.

Gou byaij ok rog dou bae, bae daengz bakdou ranzmou, haenqrengz dik dou ranzmou mbat din ndeu, haeb heuj nam: “Cienzrei gou couh yiengh- neix baenz daeuhfeiz la? Ced meh auq! Rom cienzrei yungzheih, diem cienzrei vihmaz baenzneix hoj!”

Doeklaeng daxmeh gou rox gou vihmaz hozndat le, de dawz 2000 maenz hawj mehyah gou.