Gangj daengz aen densi ndaem- hau, haujlai hauxseng geiq mbouj hwnj gij yienghceij de lo. Hoeng, doiq banvunz dou daeuj gangj, youq aen nienzdaih gig daegbied, yiengh doxgaiq neix couhdwg yiengh huq ceiq senhcin ndeu. De dwg swnh raq rumz gaijgwz hailangh byaij daeuj daengz henz ndang dou. Roxnaeuz dwg gwnzmbwn anbaiz ba, hawj gou beij haujlai vunzcaemhban ndaej raen yiengh doxgaiq gig saenzgeiz neix gonq.

Geiq ndaej dwg bi 1979 seizcou, gou daj lajmbanj bae daengz Gunghse(seizneix gaij guh yangh roxnaeuz cin) doeg cuhcungh, youq hagdangz baez daih’it dingqnyi “densigih” aen mingzcoh neix. Miz vunz dwg yienghneix lwnh: Yiengh dwg seiqfueng, miz gep gingq youq dangqnaj, hawj mwngz daj gep gingq ndaej yawj sinhvwnz caeuq denyingj. Mwhde gou laihnaeuz aen souhyinhgih gaenq dwg yiengh doxgaiq gig senhcin lo, ndaej dingqnyi gij sing vunz gangj. Siengj mbouj daengz densigih beij de engq saenzgeiz ne, lij ndaej yawjraen dozsiengq. Mwhde doiq gou daeuj gangj, aen maqmuengh ceiq hung couhdwg ndaej yawj mbat densi ndeu, gou siengj yawj de dauqdaej dwg yiengh maz, caemhcaiq danghnaeuz gou lwnh yiengh doxgaiq gig saenzgeiz neix hawj gyoengq doih gou nyi, gyoengqde haengjdingh hozhaenz gou. Mbouj geij nanz, youh dingqnyi vunz naeuz Gunghsiuhse gyang haw miz aen densigih, mboujgvaq dou vunzbaihrog mbouj miz gihvei haeujbae yawjngonz.

Bi daihngeih haihag mbouj nanz, aen maqmuengh gou couh ndaej saedyienh lo, hagdangz cawx dauq aen densi ndaemhau ndeu.

Gou lij geiq ndaej yienghceij aen densi ndaemhau hagdangz, mbouj- suenq hung, dingq lauxsae naeuz dwg 17 conq. Roggvamq densigih lijdwg benjgauhyaz daeuj guh ne, dwg maz baiz geiq mbouj ndaej lo, fanjcingq daengj youq gwnz daiz roxnyinh gyaqciq dangqmaz. Yaucangj lij daeg- daengq comz daengxcungq hagseng youq cauhcangz daeuj bauq gienh saehndei neix.

Mwhde daengz banhaemh 7 diemj cingq miz saenqhauh densi, mboujgvaq gyoengq doengzhag gaenq daezgonq homh ndwn youq dangqnaj densi lo, byawz cungj lauheiq deng lauqgvaq aen gingdaeuz. Mwhde ngamq miz Guengjsae Densidaiz aen daiz ndeu, hix mbouj miz gvangjgau, sinhvwnz sat le couh boq densigi lo. Haemhde dwg yingj 《Gyahlijswnh Ganjswjdui》. Ben densigi lienzdaemh neix daj Meijgoz yinx haeujdaeuj, lwnhgangj mwh Daihngeih Baez Seiq- gyaiq Daihcan, bingdaeuz Gyah- lijswnh daj aen gamlauz comz bang vunzfamh gap guh aen doih hoenx- ciengq mbouj lau dai ndeu bae caeuq bing Dwzgoz hoenxciengq, gyoengqde gvai ak gvaq vunz, dwkcungq youh cinj, bing Dwzgoz deng gyoengqde hoenx ndaej ra gyaeuj mbouj raen rieng. Mbouj yungh gangj, mwhde ndaej yawj gij densigi neix caen mizyinx. Aenvih dwg baeznduj ndaej yawj densi, lij nauh ok gienh saeh dwgriu ndeu ne. Haemhde densi gatsat le, aenvih miz geij lwg hagseng mbouj ndaej daj goek yawj, iugouz yaucangj caiq ingj doxdauq. Gyoengqde laihnaeuz densigi lumj denyingj gyangdien nei, ndaej dangciengz ingj doxdauq!

Haemhde yawj gvaq densi le, gyoengqdou roxnyinh densigih saed- caih saenzgeiz lai lo, hoeng youh mbouj miz byawz gejnaeuz ndaej ok vihmaz de sou ndaej dozsiengq. Baez daengz singhgizroek daihgya cungj comz youq cauhcangz deq ben densigi boq ok. Mwhde gyawz miz densigih, seiqhenz geijcib leix vunz cungj rox doh. Gyoengqvunz cungj comz daeuj hagdangz gou yawjngonz densi, vun lai ndaej raemx baeuh mbouj haeujbae.

Danghyenz lo, mwhde saenqhauh densi caeuq seizneix ca ndaej gyae lai, mizseiz raen ngaeuz mbouj nyi sing, mizseiz nyi sing mbouj miz ngaeuz. Bungz daengz mwh saenqhauh mbouj ndei, hawj geij boux vunz bae menhmenh cienj gonj ganjdenhsen. Aenvih gonj ganjdenhsen daengj youq diegsang baihlaeng gyausiz, song baih doxyawj mbouj raen, gyoengqde couh doq cienj doq hemq: “Ndaej caengz? Ndaej caengz?” Baez dingqnyi vunz lai hemq “ndaej lo, ndaej lo” couh sikhaek dingz roengzdaeuj cug maenh, gou lij ndaej bae cienj geij baez dem. Aen densi dwg hagdangz gij doxgaiq ceiq dijbauj ndeu, vih mbouj hawj hagseng luenh mo luenh niuj, hix fuengbienh beuj haeujok, hagdangz baij vunz aeu benj daeuj doq baenz aen sieng daiq seiq ga sang ndeu, daeuj coux aen densi, ngoenznaengz yungh fagsaj daeuj daep maenh, gyanghwnz lij baij bouxcawjhaeux hagdangz ninz youq henz dem.

Miz baez ndeu dou yawj densi cingq gvaqyinx, densi foedfwd mbouj miz saenqhauh, cienj gonj ganj- denhsen geij hop hix mbouj raen saekdi ngaeuz, daihgya geijlai doeknaiq. Lijdwg yaucangj siengj ndaej daengz, de sikhaek dwk dienhvah bae gunghsiuhse cam gij saenqhauh densi gizde ndei mbouj ndei, baihde hoiz naeuz sou mbouj ndaej. Yaucangj caz bae caz dauq laxlawz dwg fazsedaiz ok vwndiz. Mwhde dieg hagdangz depgyawj Denzlinz Yen, gvaenghgyawj cungj dwg ciepsou gij saenqhauh aen fazsedaiz Denzlinz. Caiqnaeuz seizde daengx aen Denzlinz yienhsingz yungh dienh baengh diuz raemxdah henzde daeuj gyaeng raemx fatdienh, baez daengz seiznit raemxdah noix le, gyanghaemh bet gouj diemjcung couh mbouj miz raemx daeuj fat dienh, baenzneix couh yingjyangj aen fazsedaiz gunghcoz lo. Seizwnq mbouj miz dienh lij camhseiz gvaq ndaej bae, hoeng daengz mwh yawj densi aenvih mbouj miz dienh fazsedaiz mbouj miz saenqhauh, vunzlai couh mbouj haengj lo. Doeklaeng, dingqnaeuz vih hawj vunz ndaej yawj densi, bouxdaeuz Denzlinz Yen iugouz doiqlaeng gij seizgan fat dienh, baenzneix couh youh lumj gaxgonq nei ndaej yawj densi lo!

Aen densi ndaemhau neix, cawz le hawj dou ndaej yawj densigi daeuj gaijmbwq, lij hawj dou rox seiqgyaiq baihrog dwg yiengh lawz. Miz aen gijluzben ndeu hawj dou saenqdoengh gig daih, ben neix dwg gangj Dwng Siujbingz youq bi 1978 fangjvwn Yizbwnj. Gij gingqdaeuz hawj gou geiq ndaej ceiq laeg dwg seizde Yizbwnj caux ciiq、densigih gingq- yienz mbouj aeu vunz guh, cienzbouh aeu gihgi daeuj guh (seizneix heuhguh diuz swnghcanjsen), caemhcaiq geij faen cung couh caux ndaej aen ndeu okdaeuj! Caen dwg mbouj gamj siengj ha! Gvaqlaeng gou dauq ranzmbanj lwnh gienh saeh neix hawj vunzmbanj dingq, gyoengqde cungj mbouj saenq ne! Daj gienh saeh neix couh rox seizde swnghcanjliz suijbingz guek raeuz beij Yizbwnj doeklaeng lai lo.

Hix dwg aen densi ndaemhau neix, hawj gou rox guek raeuz fatseng gienh saeh hawj vunz gig ndaengmoj ndeu, gienh saeh neix doeklaeng coi baenz yiengh seizdaih cingsaenz caemhcaiq yingjyangj dou geijcib bi. Bi 1981 ndwen 11 haemh ndeu, densi boq ok aen gingqdaeuz Cungguek Nijbaiz youq Yizbwnj doxdax ndaej hingz, doeklaeng aeu ndaej seiqgyaiq gvanginh! Gvaqlaeng densi youh lai baez boq ok ben gijluzben 《Cungguek Nijbaiz》. Baez gvanginh neix yiyi hungmbwk, guek raeuz youq gij doxdax cizdij baez nduj ndaej seiqgyaiq gvanginh! Gienh saeh neix hawj daengx guek vunz ndaengmoj lai lo, gvaqlaeng lauxsae hwnjdangz seiz gangj daengz gienh saeh neix, caemhcaiq coi dou hagsib “gij cingsaenz nijbaiz”—— mbouj lau sinhoj, vih guek aeu najda. Daj mwhde hwnj, daengx guek cungj aeu “gij cingsaenz nijbaiz” guh yienghndei, coenz vahriuz gwnzbiengz “doxgiet hwnjdaeuj, hwng Cungguek raeuz” couhdwg mwhde daez okdaeuj. Daengz ngoenzneix lij miz meizdij dwen daengz neix dem.

Bizyez ok ndawsingz bae doeg- saw, dingq daegnuengx naeuz aen densi ndaemhau hagdangz vanzlij ndaej hawj gyoengqde yawjngonz. Doeklaeng Liengzsoj、 Veiswnghyen、Suijvwnzcan gij danhvei neix hix miz densigih lo, vunzlai mbouj yungh caenx daeuj hagdangz yawjngonz densi lo.

Seizneix, denswj canjbinj gaenq yamq haeuj cinaengz seizdaih caemh- caiq vuenh daih vaiqvut, densigih mbouj caiq lumj geijcib bi gaxgonq dwg yiengh huq noix raen youh dijbauj ndeu lo. Youq ngoenz vangjloz siusik gig hwngfat neix, gou ciengzseiz dauqngeix gij ndwenngoenz yawj densi ndaemhau, couhdwg mwhde hawj gou laeb aen siengjmuengh ciuhvunz swhgeij, hawj gou roengzrengz bae hagsib gij cihsiz.