Youq Yungzsuij Myauzcuz Swciyen, moix baez gvaq cietgingq roxnaeuz baebo, cungj raen baenz cien baenz fanh boux daegmbauq dahsau Myauzcuz daenj gij buhvaq ronghlwenq cangndang gyaeuget angqyangz doxcomz, riengz gij sing goksad aenvenz mbaeumbengq diuq foux yekyek, lumj bouxsien nei yienhda yinxvunz… Gij buhvaq Myauzcuz ndaej youq gwnzbiengz riuzmingz, mboujdan dwg aenvih gij yienghsik de lai yiengh、yiengjceij daegbied、dangz dinfwngz ndeiraeuh, engq biujyienh youq gij saek de yungh ndaej hableix, hawj vunz yawj le roxnyinh gig gyaeundei. “Baengz- lwenq” couh dwg yiengh ndei gij daegdied yungh saek cienzdoengj Myauzcuz. Bi 2014, “baengzlwenq Myauzcuz Yungzsuij” ndaej lied haeuj buek daihseiq swcigih feih vuzciz vwnzva yizcanj mingzloeg.

Yungzsuij Myauzcuz “dangz- hong dinfwngz fwngz guh baengz- lwenq dienhromj” goek raez rag laeg, daj Ciuhsung couh miz, gaenq 1000 lai bi lizsij lo. Dangz dinfwngz guh baengz de doenggvaq mehmbwk Myauzcuz bi doek bi bae guh, bouj gaij ndaej caezcienz, baenz le dauq dangzhong dinghmaenh ndeu. Baengzlwenq gyaemqhoengz caeuq baengzlwenq dienhromj dwg song cungj baengz nyibguh buh Myauzcuz yungh lai ndeu. Guh song cungj baengz neix yaek ginggvaq nyumx、saeg、dak、loih、cat daengj lai dangq hong cij guh ndaej. Ndujdaeuz mehmbwk Myauzcuz aeu gij faiq gag ndaem haenx ma laenz mae、geuj baenz gyoengzmae, yienzhaeuh aeu aen daemjrok daemj baenz baengz- hau. Riengzlaeng couh daengz dangzhong saeg nyumx fukcab saeq- naeh haenx: Daih’it, dawz goromj cimq roengz gangraemx, ciuq gonq- laeng gya hoiseng、raemxdaeuh (gij raemx aeu ganjriengz haeuxcid coemh baenz daeuh cimq raemx daih nyaq ok)、laeujvan haeuxcid, gyaux- yinz guh baenz raemxnyumx dienh- romj. Daihngeih, saeg nyumx. Nyumx baengz aeu ginggvaq “cib nyumx cib saeg cib loih”、“song cimq”、“song cat”、 “song naengj”、 “gya saek”: Dawz baengzhau cimq dumz le, dwk roengz doengjnyumx cimq 30 faen cung, rauz okdaeuj saeg seuq, dak hawq; yienzhaeuh dawz baengz- nyumx cuengq youq gwnz benjrin aeu sakfaex mbouj dingz dwk loihcuk, baenzneix fanfuk cib baez; “song cimq” dwg aeu gauvaiz aeuq raemx cimq baengz song baez; “song cat” dwg aeu gaiqcat bwnbit gag guh nyub haux gyaeqgaeq cat baengznyumx song baez; “song naengj” dwg aeu aencaengq dawz baengznyumx naengj unq song baez; “gya saek” dwg aeu gij raemx gomaenzbya roxnaeuz raemx naeng gomakseq aeuq raemx gya saek, hawj baengz nyumx baenz saek gyaemqhoengz. Ginggvaq gij dangzhong neix le, cungj baengzlwenq unqnemq rongh- yeb neix couh guh baenz lo. Gij buh aeu baengz gyaemqhoengz nyib guh haenx couh heuhguh “buh baengz- lwenq”, gij buh aeu baengz dienh- romj nyib baenz haenx couh heuhguh “buh dienhromj”. Mehmbwk Myauz- cuz aeu gij baengz neix nyib guh buhvaq saimbwk, daegbied dwg gij “buh bwnroeg”“vunjbaebbap” nem Manmyauz daengj ndangdaenj, gyaeundei youh maezvunz.

“Dangzhong fwngz guh baengz- lwenq Myauzcuz” dwg naedgiet beixnuengx Myauzcuz gaenxhong dungxcaiz laeg, dwg vwnzva ndang- daenj Cunghvaz minzcuz aen bouh- faenh gyoebbaenz youqgaenj ndeu, caemh dwg minzcuz vwnzva yizcanj dijbauj ndawde aen ndeu, dijndaej bae swnjcienz、 baujhoh、 hwngfat de.