Mwngz rox lwi? Aendomq hung- hung coux Gangj Au dauqma、aendomq hung bi 2008 Baekging Auyinvei daengj, cungj dwg daj fwngz bouxlaux Cingsih ndeu okdaeuj. bouxlaux neix heuhguh Vangz Siuh- ginz, bineix ndaej 73 bi, dwg boux- swnjcienz aendomq、bouxswnjcienz dandog aendomq doisiuq Cingsih, de miz aen cwngheuh ndeu heuhguh “mehfwngzmbaeu Cunghvaz”.

Bi 2006 ndwen 8, Vangz Siuh- ginz ndaej Aen Hezvei Canghheiq Ndawbiengz Guengjsae bingzbaenz itgaep canghheiq ndawbiengz. Bi 2007 ndwen 6 ngoenz 3, youq gwnz aen hoih ancoh “bouxswnjcienz maenh’ak vwnzva ndawbiengz Cung- guek” Aen Hezvei Canghheiq Ndaw- biengz Cungguek banh haenx, Vangz Siuhginz ndaej aen cwngheuh “boux- swnjcienz maenh’ak vwnzva ndaw- biengz Cungguek”, baenz vunz Boux- cuengh buek daih’it aeundaej aen cwngheuh mingzdaeuz “bouxswnj- cienz maenh’ak vwnzva ndawbiengz Cungguek” loih siuqva Boux- cuengh.

8 bi caeg hag guh aendomq

“Mwh lij iq gou yawj bouxwnq guh aendomq, couh gag hag guh lo.” Vangz Siuhginz naeuz, bouxsai meh- mbwk vunzgeq lwgnyez ndaw haw Giucouh cungj rox siuqva, de hix dwg doenggvaq caeg yawj bouxwnq siuq guh aendomq, leuxcih bonjfaenh couh menhmenh gag hag rox.

“Mwhhaenx mbouj hawj guh aendomq, byawz guh aendomq couh yaek deng naeuz dwg ‘vunzeu’, ndigah bouxsai mehmbwk coz siuq guh aendomq dinghcingz cungj dwg laeglemx guh.” Youq mwh caengz bienqbaenz gij huqgai gaxgonq, aendomq dwg gij doxgaiq cienzcingz bouxsai mehmbwk dangdieg, gyoengq lwgsau ndaw haw Giucouh youq seiz ndaejhoengq couh siuq guh. Ndaej 8 bi mwhhaenx, Vangz Siuhginz yawj- raen aendomq dahcej ranznden, ndawsim gig maij, ndigah couh hainduj ciuq yiengh hag guh. Yungh gij vah Vangz Siuhginz daeuj gangj couhdwg mbouj yungh vunz son bonjfaenh hix gag naemj ok baenzlawz guh ndaej, yawj ndaej ok Vangz Siuhginz gig miz dungxcaiz guh aendomq.

Doeklaeng, fungheiq gwnzbiengz menhmenh bienq ndei, Vangz Siuh- ginz caeuq gyoengq doengzdoih seiz ndaejhoengq gangjgoj cungj haengj aeu aendomq okdaeuj siuq. Miz baez ndeu, Vangz Siuhginz daiq aendomq bae Baksaek youz, miz vunz yawjraen le couh siengj caeuq de cawx aeu. Ndigah, Vangz Siuhginz yawjraen gij seizgei seng’eiq. Dauqma ranz le, de couh hainduj hai ok diuzroen cauhguh caeuq siugai aendomq lo. Gyahwnj ndaw mbanj miz vunz hainduj bang vunzmbanj siugai aendomq, Vangz Siuhginz baengh dinfwngz gyaqciq caeuq dungxcaiz ak gvaq vunz bonjfaenh, hainduj siugai aendomq ranz bonjfaenh, daj seizhaenx hainduj aendomq byaijhwnj le diuzroen bienq- baenz huqgai.

Aeu doisiuq siuq hwnj aendomq bae

Doisiuq dwg gij fuengfap siuqva conzdungj, dwg aeu mae daeuj san baenz diuz sai lai saek ndeu gonq, liuxle aeu diuzsai lai saek san baenz gij dozanq lizdij, miz gyaciz yisuz gig sang. Doeklaeng aeu gij dozanq neix siuq hwnj aendomq bae, hawj de miz gij yaugoj lizdij lumj fouzdeu nei, gij domq baenzneix gangj ndaej hwnj dwg gij domq ceiq ndei ndaw aendomq.

Gizsaed, doisiuq cungj dinfwngz neix caeux couh youq dieg Boux- cuengh riuzcienz lo, hoeng gig noix miz vunz guh ndaej ndei, Vangz Siuhginz suenq dwg aeu faenh hongcied neix fatok daengz ceiq ndei lo. Mwh gicej cam daengz dinfwngz doisiuq, de mbouj dap vah, cix dwg byaij haeuj ndaw ranz, daj ndaw ranz dawz ok gaiq buenqcingzbinj gaiqsiuq daej nding seiq gak ndeu, caemhcaiq naeuz:“Mwngz yawj, neix couhdwg doisiuq.”

Vangz Siuhginz naeuz, doisiuq ndaej yungh haeuj haujlai cozbinj siuqva ndawde bae, hawj vunz yawj le simhai, ndigah gig ndaej vunz maij. De dinfwngz lingzleih sim lingzgiuj baez doengh, couh siengjdaengz aeu cungj doisiuq lizdij neix siuq hwnj aendomq bae, ndigah couh miz aendomq doisiuq lo. Ndaej aeu doisiuq engqgya lizdij gayhaeuj aendomq bae, Vangz Siuhginz rox- nyinh miznaj dangqmaz.

Hawj daengx seiqgyaiq roxnaj aendomq Cingsih

Miz saw raiz naeuz, gij lizsij aendomq fwngzguh Hawgiucouh Sinhcing Cin Cingsih Si daj Sungdai hainduj. Ndaw haw ca mbouj geijlai ranzranz cungj rox siuq guh aendomq. Hoeng aendomq Cingsih caencingq byaijok Cingsih, bienqbaenz gij dox- gaiq gitleih vwnzva ndaw guek rog guek cungj mizmingz, cix dwg gij saehcingz gaenh ngeihcib lai bi neix. Youq neix ndawde, Vangz Siuhginz dangguh bouxswnjcienz aendomq Cingsih goenglauz gig hung.

Bi 2005, Vangz Siuhginz ndaej iucingj bae Baekging guh hozdung langhbaij aendomq, caemhcaiq dang- ciengz siuq guh aendomq. Youq ndaw aen hozdung hunghoengh canghheiq ndawbiengz daengx guek romcaez neix, aendomq Vangz Siuhginz yinx ndaej haujlai vunz cimyawj

“Gij vunz byaij gvaqdaeuj yawj haenx cungj cam, neix dwg gijmaz? Guh gijmaz yungh?” Vangz Siuhginz naeuz, yawjraen daihgya cungj gig maij, de mbouj lau mazfanz baez youh baez doiq bouxcam gejgangj: “Neix dwg aendomq Cingsih Guengj- sae, ciuhgeq lwgsai lwgmbwk yungh daeuj dinghcingz, seizneix ndaej yungh daeuj doxsoengq, daiqbiuj gitleih hab’eiq.” Yawjraen aendomq ndeiyawj gyaqciq, haujlai vunz cungj doxciengj cawx, lienz cujveijvei hix daihfueng cawx aeu gij domq Vangz Siuhginz siuq guh haenx liux. Gienh saeh neix hawj Vangz Siuhginz saenqsim gig hung, hix hawj haujlai vunz roxyiuj aendomq cungj dinfwngz neix.

Gvaqlaeng, gij dan dingh’aeu aendomq daengx guek gak dieg daeuj mbouj dingz mbouj duenh.

Gizsaed caeux youq bi 2003, couh miz vunz guekrog doenggvaq gunghswh cincuzgouj roxyiuj gij domq Vangz Siuhginz lo, lij sikhaek hai dan dinghcawx, ciemdingh moix bi dingh- cawx geijcib fanh maenz. Vihliux hab’wngq gij aeuyungh hawciengz rog guek, Vangz Siuhginz caeuq cangh- seng’eiq guekrog doxyaeng le, aeu gij geiqhauh caeuq dozanq daiqbiuj 12 aen ndwen guekgya saefueng haenx siuq hwnj aendomq bae, caiq gyahwnj gij saekboiq conzdungj aendomq Cingsih, gig ndaej canghseng’eiq guekrog gyaezmaij.

Aendomq Cingsih geqlaux vih- neix cienz doh daengx guek, vanzlij hamjgvaq haijdah, byaijcoh daengx seiqgyaiq, mingzdaeuz cienz doh daengx seiqgyaiq. Moix bi cungj miz haujlai bouxhek dingq mingz daeuj Giucouh Cingsih youz, doengzseiz hix cawx aendomq Cingsih dangguh laex buenxfwngz.

Aeu dinfwngz siuq guh aendomq cienz hawj daih lwg daih lan

Seizneix, Vangz Siuhginz gaenq baenz bouxdinghgangj dinfwngz siuq guh aendomq Cingsih, bouxhek daeuj Giucouh youz da daih’it cungj dwg yawjraen “mehfwngzmbaeu Cungh- vaz” geij cihsaw raiz youq gwnz gaiq benjbingzgyaq aen douranz de neix. Gangjdaengz aen mingzdaeuz neix, Vangz Siuhginz dauqngeix naeuz, bi 1994 ndwen 12, ndaw yienh miz cangh’ingjsiengq mizmingz ndeu daeuj Giucouh ingjsiengq, yawjraen gij domq ndeiyawj gyaqciq Vangz Siuhginz siuq guh haenx le lwnh de gij doxgaiq neix aeubae camgya doxdax ndaej. Hoeng Vangz Siuhginz doiq baenzlawz camgya doxdax cungj mbouj rox saekdi, doeklaeng cangh’ingjsiengq ciengzsaeq gejnaeuz hawj Vangz Siuhginz rox, gij cozbinj camgya doxdax haenx aeu boux camgya doxdax bonjfaenh gag cauhguh baenz, liuxle soengq bae daengz Baekging camgya bingzsenj.

Vangz Siuhginz nyinhnaeuz, neix dwg aen seizgei ndaej hawj daihgya roxyiuj aendomq Cingsih ndeu, ndigah couh ciepsouh cangh’ingj- siengq iucingj lo, gyaenj dwk siuq guh le aen domq 20 goengfaen ndeu, hawj cangh’ingjsiengq bang soengq bae Baekging camgya doxdax. Bi daih- ngeih, cozbinj aendomq Vangz Siuhginz ndaej ciengj, mbiengj cawjbanh lij fat mbawcingq “mehfwngzmbaeu Cungh- vaz” hawj de dem, yunghdaeuj nyinh- cingq dinfwngz maenhndei de.

Vangz Siuhginz naeuz, dinfwngz de cungj son hawj lwglan de lo, gyoengq lansau iq de bouxboux cungj siuq guh ok aendomq gyaeundei gyaqciq ndaej. Caiqlix moix baez ndaw si cujciz aen ban son dinfwngz siuq guh aendomq, Vangz Siuhginz cungj caenndang daengz dieg son. Doiq aendomq ngoenzlaeng baenzlawz hwngfat roengzbae, Vangz Siuhginz cungj mbouj miz banhfap cuengqsim. Riengz dinfwngz siuq guh aendomq cienzboq, mbanj seiqhenz hix miz haujlai mehmbwk hainduj hag siuq guh aendomq. Hoeng gyaqcienz aendomq ciuqyiengh lij dwg caeuq doenghbaez doxdoengz, seiz gisuz suijbingz gyaep mbouj hwnj ginghci aeuyungh demmaj riengjvaiq, din- fwngz cocat couh bienqbaenz gij yinhsu mbouj ndei sienghaih caet- liengh aendomq.

Gij maqmuengh coglaeng Vangz Siuhginz dwg, caetliengh aendomq aeu daezsang, gij yunghcawq aendomq hix aeu lai yiengh, yienghneix cij ndaej hawj faenh dinfwngz daiqbiuj Cingsih neix riuzcienz roengzbae, riuz ndaej nanz ndaej gyae vanzlij ndaej vunz- biengz sugrox、gyaezmaij.