Foux saeceij Bouxcuengh Denz- yangz dwg dujva ronghlwenq geizheih yisuz vwnzva ndawbiengz minzcuz cienzdoengj ndeu, daj ciuhgeq gvaq- daeuj, vunzlai Denzyangz youq gvaq cieng gvaq ciet, gak cungj ngoenz angqhoh、ngoenz baehaq aeuyah、bae dangbing、ngoenzseng souhyienz daengj ngoenzndei angqhoh haenx, cungj cingj doih foux saeceij loenghfoux angqhoh, dem gij yiengh gitleih habhoz, dwg hangh hozdung fungsug minzcuz beixnuengx Boux- cuengh gyaez yawj maij ngonz ndeu. Bi 2007, “foux saeceij Bouxcuengh Denzyangz” ndaej lied haeuj buek daih’it swcigih gaep feih vuzciz vwnzva yizcanj mingzloeg, bi 2011 ndaej gozvuyen baecinj lied haeuj buek daihsam guekgya gaep feih vuzciz vwnzva yizcanj hanghmoeg gya’gvangq mingzloeg.

Foux saeceij Bouxcuengh Denz- yangz lizsij gyaenanz, riuznaeuz mwh ciuhnduj vunzcoj Bouxcuengh vihliux mbouj hawj duznyaenyak haeb vunz caeuq nyoegnyamx gomiuz, siengj ok aen banhfap aeu nyaen gyaep nyaen, ciuqei yiengh duzvuengz gyoengq- nyaen—saeceij, duk san baengz longz baenz yiengh saeceij, yienzhaeuh roq gyong roq laz foux saeceij hwnjdaeuj, doengxhaemh lij diemj yuih diemj bogfeiz bae gyaep nyaenyak, bauj bouxvunz aencienz, hen gomiuz maj baenz. Ciuq saw lizsij geiq naeuz, Ciuhmingz Gyahcing samcib seiq bi (bi 1555), vunzmbwk minzcuz Boux- cuengh Vajsi fuhyinz daiq gyoengq- bing Denzcouh bae dingjhoenx Vohgou ndaejhingz dauqma, gyoengq vunzlai Denzcouh foenfoen comzdoih foux saeceij loenghfoux angqcoux Vajsi caeuq gyoengqbing ndaej naj- rongh dauqma mbanjranz. Daj seiz- haenx gvaqdaeuj, foux saeceij couh baenz le Bouxcuengh vwnzyi cungj cietmoeg biujyienj gag miz ndeu, daih cienz daih, hoenghhwng mbouj byaiz.

Foux saeceij Denzyangz comz- giet le sang、hoj、cieg、yiemj、geiz、gyaeu roek daih daegdiemj. Aenfoux dauqloh lai, cietmoeg lai cungj lai yiengh, gisuz ndeiraeuh, dawz dwk- gienz、diuqfoux、saj bajheiq daengj yungzhab youq giz ndeu, miz gij daegsaek Bouxcuengh noengznwd- nwd, daj singqcaet gwnzde ndaej faen baenz saeceij gwnznamh caeuq saeceij gwnzmbwn song cungj. Saeceij gwnznamh gvihaeuj foux saeceij faenzbaij, aeu gij yiengh- siengq manzgaengq lingzlaeux dwg- gyaez haenx guh daegdiemj, youq gwnznamh biujyienj veq、coemj、doenq、yat、ringx roxnaeuz gijdoengh vadgei haenx daeuqnyex gyoengq- vunz, duzsaeceij youz bouxfoux raek miz mauhngeg duzmaxlaeuz manz- gaengq caeuq goengbaed gyaeujloet naj riunyumnyum haenx boux gonq boux laeng dazyinx daeuqnyex, youq ndaw sing bauqrengh caeuq sing gyonglaz boiqhab guh biujyienj; saeceij gwnzmbwn gvihaeuj foux saeceij fouxbaij, gij daegdiemj de dwg dawz gijdoengh dwkgienz、bajheiq、diuqfoux yungz haeuj ndaw foux saeceij bae, bin hwnj gwnz daiz sang guh biujyienj, itbuen dwg youz boux canghfoux ndeu fwngz gaem aencaw saeceij dazyinx、daeuqnyex saeceij biujyienj gak cungj yiengh gijdoengh hawj vunz simcieg haenx, ndaej bin hwnj aen byagim aeu ngeih samcib aen daengqsang daeb baenz haenx baij yiengh akmaengh, roxnaeuz youq gwnz diuz caggang venj rag youq byonghmbwn haenx yatdiuq ringxroux lumj byaij gwnz diegbingz nei, roxnaeuz youq gwnz bakcax soemsat biujyienj dingj naengdungx baenqcienq daengj, simcieg yungyiemj raixcaix.

Foux saeceij Bouxcuengh Denz- yangz dangz gisuz biujyienj de youq gwnz goekdaej swnjcienz caeuq hoengzyiengz dauqloh cienzdoengj haenx, mboujduenh bae vatgud、cingjleix caeuq cauhmoq, doi ok le “saeceij hwnj byagim”“saeceij gvaq giuzmbwn”“saeceij bin lae bakcax soemsat”“saeceij caij dongh vamoiz”“yiengh mbwk saeceij” daengj baenzdauq gwnzmbwn biujyienj hanghmoeg, gyoebbaenz le dauq gisuz ndeindiq cienhangh foux saeceij ndeu, doengh bi neix daeuj byaij doh daengx guek gak dieg bae biujyienj, caemh bae Dwzgoz、Yeznanz daengj guekgya biujyienj gvaq, youq ndaw guek rog guek doxdax ndawde aeundaej haujlai gij ciengj miznaj haenx, vih hoengzyiengz vwnzva cienzdoengj Bouxcuengh caeuq hawj dijyuz vunzlai miz lai cungj lai yiengh guh ok gungyen gaenxmaenx de.