Luz Lanzcinh dwg bouxswnjcienz gij ndang- daenj conzdungj caeuq dinfwngz dajsiuq lai saek Bouxcuengh Vujmingz, youq gwnz Gvangjsih Gunghyi Meijsuz Canjlanj ngamq dingzsat haenx, gij cozbinj ndangdaenj bawxmoq Bouxcuengh de caeuq aendoih de cauhguh haenx aeundaej le ciengjgim. De daj 13 bi hainduj hag dinfwngz dajsiuq lai saek, gij dinfwngz neix swnjcienz daengz de gaenq dwg daihseiq daih lo.

Cozbinj gyaqciq dangqmaz gij ndang- daenj Bouxcuengh gyaciz sang

Luz Lanzcinh bineix gaenq ndaej 65 bi lo, dwg bouxswnjcienz gij ndangdaenj conzdungj caeuq dinfwngz dajsiuq lai saek Bouxcuengh Vujmingz, de dwg bouxswnjcienz daihseiq daih, ciengzseiz vih cauhguh caeuq swnjcienz gij ndangdaenj conzdungj caeuq dinfwngz dajsiuq lai saek Bouxcuengh Vujmingz nyaengq hwnj nyaengq roengz.

Seizneix, Luz Lanzcinh caeuq dahnuengx Luz Lanzcunh youq Vujmingz Gih Namzningz Si co song aen bouq dangguh ranzguhhong, yungh daeuj son bouxhag cauhguh gij ndangdaenj conzdungj caeuq dinfwngz dajsiuq lai saek Bouxcuengh. Seizneix, gizneix gaenq dwg aendieg swnjcienz feih vuzciz vwnzva yizcanj Namzningz Si.

Gicej youq ranzguhhong Luz Lanzcinh yawj- raen, gwnz faqciengz caengz laeuz daih’it venj rim gij cozbinj dajsiuq lai saek, dingzlai yungh daeuj dajcang faqciengz. Gij doz gwnz cozbinj dajsiuq lai saek miz doenghduz、va daengj, saek ronghsien, yiengh gyaqciq. Youq caengzngeih, lengqgaiq ndangdaenj dajsiuq lai saek daenj youq gwnz ndang bouxmozdwz, lengqgaiq cozbinj venj youq gwnz faqciengz. Gij cozbinj ndangdaenj Luz Lanzcinh caeuq aendoih de cauhguh haenx gig miz daegsaek conzdungj Vujmingz, miz duzfungh、va、12 swnghsiuh daengj, gij doxgaiq ndaw doz lumj caen nei, gij saek de lai cungj lai yiengh.

Dauq ndangdaenj Bouxcuengh gaijndei mingz heuhguh Bawxmoq Loegvet ndeu, dwg gij cozbinj ndei aendoih Luz Lanzcinh ndawde gaiq ndeu. Gaiq cozbinj neix aeu saeknding guh saekdaej, gwnz geubuh siuq miz lungz fungh、va, maesiuq gig nyaed，yawj hwnjdaeuj gyaqciq dangqmaz. Luz Lanzcinh gaisau, dauq buhvaq neix dwg de gaengawq gij geiqndaej mwh lij iq daeuj cauhguh. Mwh lij iq, daxmeh de ciengzseiz caeuq de gangj gij ndangdaenj bawxmoq Bouxcuengh ciuhgeq, daxmeh lij fwngz gaem fwngz son dahlwg gij fuengfap siuq doz gwnz ndangdaenj bawxmoq. Luz Lanzcinh naeuz, vihliux cauhguh dauq Bawxmoq Loegvet neix, aendoih de yungh bae bi lai seizgan.

Gij siuq Bouxcuengh Luz Lanzcinh guh ndaej gyaqciq dangqmaz, gij siuq baij okdaeuj gig miz heiqseiq、ronghswgswg、yungh ndaej nanz; gij cozbinj dajsiuq lai saek boiq saek gig lai、yiengh daengj gig haenq、naj siuq gig fag, gya hwnj bouxswnjcienz doiq gij dajsiuq lai saek conzdungj guh cauhmoq dem, hawj gij cozbinj dajsiuq lai saek engq miz gij rengz cungdongj lwgda, miz gyaciz yawj、gyaciz yisuz caeuq gyaciz yo gig sang.

Daj iq hag dinfwngz 12 bi hainduj siuq dajsiuq lai saek aennda

Vujmingz Yen dwg giz dieggoek Bouxcuengh ndawde giz ndeu, minzcuz vwnzva Bouxcuengh goek gyae rag raez. Gij dajsiuq lai saek Bouxcuengh Vujmingz dwg gij yisuz vwnzva gig miz daegsaek deihfueng aen minzcuz neix, youq ndaw yisuz ndawbiengz dangdieg miz aen diegvih maqhuz youqgaenj. Miz lizsij geiqloeg, 15 sigij 30 nienz- daih, gij siuq fwngz siuq Vujmingz hainduj youq Mbanjloegvat Gaeuq hwnghwnj, gij siuq fwngz siuq mwhhaenx doiq gij fuengfap siuq miz iugouz yiemzgek, senj aeu saekmae gijmaz hix youqgaenj dangqmaz, baengz aeu baengzdoj saeko guh daeuz, saek siuq aeu nding、loeg、o daengj saek ronghsien guh daeuz.

Ranzcoj Luz Lanzcinh youq aenmbanj Mbanjloegvat Gaeuq Lozboh Cin Vujmingz Gih, mwh lij iq lwgmbwk cungj hag siuqva. Mwh Luz Lanzcinh ndaej 12 bi, daxmeh de couh son de hag siuqva, hag cimbingz、cimdiuq daengj gak cungj fuengfap siuq dajsiuq lai saek. Luz Lanzcinh hix gig maij siuqva, mwh de ndaej cib lai bi couh hainduj siuq aennda. Siuq baenz le, de couh youq ngoenzhaw aeubae gwnzhaw gai. Mwhhaenx gij doz gwnz aennda miz 12 swnghsiuh、vamauxdan daengj.“Mwhhaenx ndaw ranz hoj, gij cienz gai aennda ndaej haenx, gou cungj aeuma boujdiep gij cienzyungh gvaq ndwenngoenz ndaw ranz lo.” Luz Lanzcinh naeuz, youq aen sigij gonq 60 nienzdaih aennda dajsiuq lai saek de siuq haenx moix aennda gai ndaej 1.5 maenz daengz 2 maenz ngaenz.

Doeklaeng, riengz bi’ndwen bouxdajsiuq ban- laux gyalai caeuq gohyoz gisuz hwngfat riengjvaiq, aengihgi siuqva dennauj menhmenh dingjlawh gij siuqva conzdungj lo. Aengihgi siuqva dennauj ndaej baenz buek cungzfuk cauhguh siuq， cienzgoek cauhguh gij siuq gig daemq, ndigah, gij siuqva conzdungj dingj mbouj ndaej gij cungdongj dennauj siuqva, dinfwngz conzdungj bungz daengz saetcienz.

Caiq doeklaeng, gunghyez siuqva menhmenh hwnghwnj, gij siuqva fwngz siuq doekbaih, Luz Lanzcinh daengj dingzlai vunz rox siuqva haenx hix cungj mbouj siuqva lo. Bi 2011, daeglwg ngeih Luz Lanzcinh baenzgya, de siuq mbaw soujgaen- gyaeuj bawxmoq ndeu hawj lwgbawx. Mbaw soujgaen’gyaeuj saek nding, gwnz de lij miz gij doz gyaeundei dem, haujlai vunz yawjraen le cungj haenh mbouj daengx bak. Daihgya cungj naeuz, haujlai nanz mbouj ndaej raen gij siuq baenzneix gyaeundei lo. Luz Lanzcinh dingq le fwt singj hwnjdaeuj, gij vunz rox dinfwngz dajsiuq lai saek Bouxcuengh gaenq mbouj miz geijlai lo, danghnaeuz mbouj swnjcienz, dinfwngz dajsiuq lai saek aiq yaek saetcienz. Yawjraen daihgya cungj baenzneix maij gij cozbinj dajsiuq lai saek, roxnyinh lij miz hawciengz, Luz Lanzcinh dauq gaemhwnj fagcim siuqva moq lo.

Vihliux swnjcienz gij dajsiuq lai saek Vujmingz, Luz Lanzcinh mwhhaenx gaenq 60 bi dungyenz song dahnuengx gaenq okrog bae dajgoeng haenx dauq gaemhwnj fagcim siuqva moq. Guh gijmaz saeh ngamq hainduj cungj hoj, mwhhaenx ndaw fwngz de mbouj miz gijmaz cienz, ndigah dan co dieg ranz cuengq ci iq ndeu dangguh ranzguhhong, moix ndwen geij bak maenz cienzco.“Mwh ceiq hoj bae daengz Namzningz cawx mae siuqva, cij miz cibgeij maenz ngaenz, mbouj miz cienz naengh ci, gou dwg dap aenci swnhloh bae.” Luz Lanzcinh hix siengj mbouj laebdaeb guh gvaq, caeklaiq miz vunz ndaw ranz haeujcoengh, de cij ndaej laebdaeb guh roengzdaeuj.“Gyoengq boux- guhhong fulenz、vwnzva’gvanj hix ndaej bang gou gvaq, caen gyo’mbaiq gyoengqde.” Luz Lanzcinh gaisau, Couh Yinghgij bouxvunz mwhhaenx dang bouxgvanjcangj Vwnzva’gvanj Vujmingz neix, gaenq youq mwh de ceiq hoj gujli de gvaq. Vihliux swnjcienz gij siuqva Bouxcuengh, Couh Yinghgij haenqrengz bae bang Luz Lanzcinh, baugvat gij hong bauq feih vuzciz vwnzva yizcanj hanghmoeg daengj.

Ndaej daengz daeglwg caeuq dahnuengx daengj vunz bangcoh, Luz Lanzcinh youq bi 2013 laebbaenz Diengzhong Fwngzguh Caijsiu Nazfuz Vujmingz Gih Namzningz Si.

Swnjcienz dinfwngz daiq lwgsae son gij siuqva Bouxcuengh

Bi 2014, Luz Lanzcinh caeuq song dahnuengx Luz Lanzcunh、Luz Lanzvah dawz gij cozbinj gyoengqde yungh bi seizgan ndeu siuq okdaeuj haenx bae daengz aenhoih baijgai hawfwen “sam nyied sam” Mbanjcuengh Vujmingz camgya langh- baij, yinxhwnj fanjyangj gig hung. Ngamq 3 ngoenz ndawde, couh yinx ma haujlai bouxyawj, mbangj vunz gouzra doxgap, mbangj vunz cazcam dinfwngz siuqva. Cingq dwg baez neix baijok ndaej baenz, hawj gij saenqsim sam cejnuengx de dauq cauhguh gij dinfwngz ronghsag siuqva Bouxcuengh Vujmingz moq engq giendingh lo.

Bi 2015, dajsiuq lai saek Nazfuz ndaej lied- haeuj feih vuzciz vwnzva yizcanj Vujmingz. Bi 2016 ndwen 6 ngoenz 17, “Namzningz Si feih vuzciz vwnzva yizcanj daiqbiujsingq hanghmoeg” aendieg swnjcienz gij ndangdaenj Bouxcuengh Vujmingz youq Diengzhong Caijsiu Nazfuz banh. Seizneix, gij loihhingz cozbinj diengzhong baugvat aendomq、ndangdaenj Bouxcuengh、baengzdoj Bouxcuengh、man Bouxcuengh、aennda Bouxcuengh、soujgaen- gyaeuj daengj.

Seizneix, Diengzhong Caijsiu Nazfuz ndaej mizgven bumwnz yawjnaek, hix bienqbaenz “Namzningz Si feih vuzciz vwnzva yizcanj daiqbiujsingq hanghmoeg” aendieg swnjcienz gij ndangdaenj Bouxcuengh Vujmingz. Luz Lanzcinh caeuq dahnuengx Luz Lanzcunh daiq geij boux lwgsae, miz aendoih bonjfaenh lo. Gyoengqde bingzseiz hix banh aen ban son siuqva, dawz dinfwngz siuqva son hawj engq lai vunz, seizneix gaenq hwngfat baenz aendoih bouxdajsiuq miz 30 boux baedauq. Yamqlaeng, Luz Lanzcinh dajsuenq laebdaeb banh aen ban son dinfwngz dajsiuq lai saek, gungganq engq lai vunzcaiz miz dinfwngz, baujmaenh dinfwngz dajsiuq lai saek Bouxcuengh miz vunz swnj laeng.