Fouxcauhyangz Bouxcuengh dwg vunzcoj Bouxcuengh youq yamqdin lizsij hwngfat raezrangh ndawde, aeu gij dungxcaiz coengmingz bonjfaenh, dawz fouxmo、fouxnoz、fouxgoengsae caeuq fungsug sibgvenq dangdieg gyoebyungz youq giz ndeu, menh- menh yienjbienq baenz cungj hingz- sik diuqfoux miz daegsaek minzcuz daegbied ndeu, hawj gij diuqfoux cuengq saenz ciengq saenz saenz- maed haenx engqgya daiq miz gij gikcingz cuengqlangh, engq miz gijdij yisuz yawjngonz engq sang haenx, gyoebbaenz le gij minghhoengh yisuz daegbied de, daih cienz daih mbouj rox byaiz.

Fouxcauhyangz Bouxcuengh nyuenz heuhguh “diuqdungzbwngz”, dwg dujva ronghlwenq minghhoengh yisuz daegbied daj fouxgoengsae mbekfaen okdaeuj ndeu, youq Sieng- couh Yen Cunghbingz Cin、Lozsiu Cin、Bwzcang Yangh、Majbingz Yangh doengh gij mbanj Bouxcuengh roxnaeuz gij mbanj Bouxcuengh cabyouq haenx riuzcienz hoenghhwd. Gij diuqfoux de doenghyeg ndei yawj, vahloih diuqfoux lai yiengh, gijdoengh ciethoh sienmingz, diuq- wenq hoenghhaenq ndei dingq, yaem’wenq buenxndaek daegbied, biujyienj hingzsik caeuq biujyienj neiyungz lai cungj lai yiengh, gijdoengh aenndang biujyienh lwenq- da, vunzlai Bouxcuengh cungj gig gyaez yawj gyaez dingq. Seizneix Siengcouh Bwzcang、Cunghbingz song aen yanghcin neix mbanjmbanj miz goengsae, ciengzseiz diuq foux- cauhyangz yienghnduj. Gij foux- cauhyangz riuzcienz roengzdaeuj haenx, moix aen heiq foux cungj miz cit gojriuz gyaeundei gamjdoengh vunz ndeu, neiyungz cungj comz miz gij gamjcingz sohsed ceih yak haenh ndei vunzcoj Bouxcuengh, dakgeiq gij saenqyiengj nem maqmuengh simvangh caeuq gyaepgouz saedceij vuenyungz gyaeundei vunzlai. Ndaw diuqfoux, bouxyienj naek youq bae cauhyienj bouxvunz, doedok biujyienj gij singqgek bouxvunz, doengh gij biujyienj bouxvunz lumj liuliu, gij cingzciet roxnaeuz saeqciet caeuq saedceij doxlienz gaenjmaed haenx, roxnaeuz goenggingq mizsim cix naekcaem, roxnaeuz cocat saenzgeiz cix vifeng, roxnaeuz reuxred neuzned cix gyaeundei, roxnaeuz mbaeu- mbengq mbinyeg cix dawzyinx, gizgiz raen miz gij siengjvanh caeuq lahdawz hoenghhwd lai cungj lai yiengh de.

Mauhngeg dwg cungj doxgaiq ndaw fouxcauhyangz Bouxcuengh noix mbouj ndaej ndeu. Daj ciuhgeq gvaqdaeuj, gij bouxvunz ndaw heiq foux biujyienh haenx couh miz gij gangjfap “samcib roek saenz, caetcib ngeih siengq”, boux biujyienj ciuq bouxvunz ndaw heiq bienqvuenh yaekaeu cix vuenh mauhngeg, hawj gij yiengh bouxvunz caeuq singqgek daegbied haenx yienj ndaej lumj liuliu. Fouxcauhyangz naeuz miz samcib roek foux, samcib roek diuqciengq, baulamx gak fueng gak mienh, ndawde aeu diuqciengq caet cih caeuq diuqciengq haj cih Vahcuengh ciengq lai, gya hwnj supsou gij diuqfwen Bouxgun nem diuq Fwencuengh、fwenlaeggiek daengj, ciengz yungh miz cibgeij cungj baenz lai.

Fouxcauhyangz Bouxcuengh dwg daj hainduj ciengq couh ciengq daengz daej faen bouxgiek yienj- ciengq, daj ciengq saenz guhcawj daengz aeu ciengq vunz guhcawj, byaij gvaq le duenhroen yienjbienq gig nanz ndeu. Cungj yienjbienq neix, baenzbaenz youq ndaw vwnzva Bouxcuengh majhung, dwg naedgiet ronghlwenq vwnzva cienzdoengj Bouxcuengh. Diuqfoux faen song loih, cungj ndeu dwg foux cuengqcaeq, cungj ndeu dwg foux saedceij ciuqei yiengh doenghduz. Aenvih de goek raez rag laeg, hawj de daj cungj hingzsik diuqfoux ndujdaeuz ndeu, cugciemh cauhmoq hwngfat、caez- cienz, doeklaeng ndaej baenz cungj diuqfoux minzcuz yiengh foux ndei yawj, neiyungz lai yiengh, funggek daegbied, gag baenz dangzdauq ndeu, vih vwnzva Bouxcuengh demlai le ronghlwenq.