Lauxgo daeuj daengz aen rungh fwz ndeu, aen rungh neix reih noix ndoeng laep, vunz mbanj gig noix haeujdaeuj, de ra ndaej aen gamj ndeu, cap youq roengzdaeuj.

Ngoenz ndeu miz boux goenglaux ndeu daeuj daengz ndaw rungh ra ywdoj, raen Lauxgo boux dog gag youq ndaw gamj, roxnyinh gig geizheih, couh caeuq de lwnh goj hwnjdaeuj, boux goenglaux neix ciengq:

“Ndaw rungh fwzrikrik,

Miz sip youh miz nyaen,

Mwngz gag daeuj neix gaenz,

Baenz youq gvaq ciuhvunz?”

Lauxgo ciengq:

“Gou guh le saeh loeng,

Doek roengz congh cij ngamj,

Ngoenz daeuj youq ndaw gamj,

Mbouj famh deih famh dien.”

Boux goenglaux neix ciengq:

“Gaen raemx bae ra goek,

Loek faex bae ra rag,

Mwngz guh maz saeh yag,

Cij gag daeuj neix youq.”

Lauxgo ciengq:

“Lwg deuz ranz mbouj youq,

Naeuz gou haq mbouj baenz,

Seiq haj bi mbouj raen,

Ndaenq dwk yaek vut mingh.”

Boux goenglaux neix dingq le ngauzgyaeuj laglag byaij deuz lo.

3 bi gvaqbae lo, 5 bi gvaqbae lo, 10 bi gvaqbae lo, Lauxgo byoem fonx bienq gyaeuj hau, ndang cangq bienq hwet gaeuz, de ciengzciengz naengh youq bak rungh, doiq mbwn hemq naeuz:“Lwg ha, mwngz youq gizlawz couh dauqranz ba, gou caeuq meh mwngz cungj muengh mwngz……”

Rangz guh song mbiengj maj, vah guh song gyaeuj lwnh. Ngoenzhaenx Dahnaq dapci daengz ndaw singz le, bungz daengz bang vunz ndeu, gyoengqde naeuz yaek bae diegrog dajgoeng, Dahnaq couh caeuq vunz bae lo.

Dahnaq roxnyinh daeuj daengz aen singz moq ndeu, laeuz sang ci lai, vunz bae vunz dauq, byaij baenz buenq ngoenz roen, mbouj roxnaj saek boux vunz, caen dwg:

Baihrog vunz lailai,

Miz boux gai boux cawx,

Mehmbwn caen rox cawq,

Hawj gou gag boux dog.

Guhdoih youq lajmbwn,

Guhdoih ndwn gwnzbiengz,

Gou hix siengj youq ndei,

Mbouj meiz(miz) bouxlawz coh.

Ngoenzlaeng Dahnaq gyoengqde couh haihong lo, gyoengqde dwg guh ranzlaeuz, Dahnaq bau hoed naez daeh sa. Boux hai gih gyauznaez dwg daeg coz ndeu, vunz baenzmbauq youh gaenx guhhong, de ciengz heuh:“Naq, vaiq daek naez lubw, mboujnex guh mbouj gib bw!”

Daeg coz heuh ndaej gig van, gig swnh. Dahnaq dingq ndaej gig maez gig angq. Ndaejhoengq seiz daeg coz neix ciengq:

“Lwg bouxlawz youq de,

Lumj goge hai moq,

Lumj duzdouq yaek mbin,

Lumj duzdinz hai fwed.

Lwg bouxlawz rurid,

Lumj ci bit bouxdaeuz,

Lwg bouxlawz baenz gyaeu,

Lumj gij ngaeuz sien mbwn.

Va a va,

Youq gungx caz hau maeq,

Fwngz yaeb yaeb mbouj ndaej,

Faex fad fad mbouj daengz.”

Dahnaq ciengq:

“Ndaejnyi sing roeggeuq,

Sing heuh ndei heuh ndei,

Ndaejnyi sing vameiz,

Sim vunz cungj feiz doh.

Danhfanz mwngz miz sim,

Gimngaenz gou mbouj ngah,

Gvaen raemx bae coh dah,

Mwngz mbouj ngah hix nanz.

Duzbya youq ndaw raemx,

Roengzsim gaemh couh ndaej,

Dujva youq gwnz faex,

Dai lix caj mwngz mbaet.

Miz cingz gap baenz yienz. Dahnaq caeuq daeg coz haenx doxaeu lo, ciep daeuj couhdwg seng lwg ciengx lwg, guhhong ra ngaenz, saedceij gvaq ndaej miz gwn miz daenj, miz angq miz riu. 3 bi gvaqbae lo, 5 bi gvaqbae lo, 10 bi gvaqbae lo, Dahnaq roxnyinh daeng dauqbae ranzcoj yawjyawj baez ndeu lo.

Diegcoj youq ndawsim,

Da cim mbouj ndaej dauq,

Ngoenzneix sau baenz meh,

Ndaej deq geijlai ngoenz.

Diegcoj youq ndawsim,

Da cim mbouj ndaej vaij,

Ngoenzneix geq nya’nyai,

Mbouj dauq couh vaih ciuh.

Liz ranz cib lai bi,

Nienzgeij hix mbouj coz,

Naemj aen siengq doxboh,

Gaenq mbouj rox maz yiengh.

Liz ranz cib lai bi,

Nienzgeij hix bienq geq,

Naemj aen siengq doxmeh,

Mbouj rox de yiengh lawz.

Seizdoeng, mbwn nitriri, fwn roengzfoedfoed, Dahnaq dauq daengz bakmbanj, yawjraen ranzranz hwnj ranz moq, ca di byaij loek roen, yaek mbouj rox gij loh bae ranz gaeq dem.

Aen ranz Dahnaq lij lumj yiengh gaeuq, cien nding vax heu, iqet youh daemqdet.

Dahnaq daeuj daengz bakdou, dahmeh de hwet gaeuzgege gvaqdaeuj, cam de daeuj ra bouxlawz. Dahnaq muengz fuz dawz daxmeh, lwnh naeuz yienghneix yienghneix.

Daxmeh dingq le ciengq naeuz:

“Ngoenzde mwngz okbae,

Gou daej daengz fatsa,

Haemh ninz mbouj laep da,

Yaek dai bae lajnamh.

Ngoenzneix mwngz doxdauq,

Raeuz venj cauq(rek) hwnj fa,

Boh mwngz dai bae laj,

Miz da yawj mbouj raen.

Dingq daengz daxboh gaenq gvaqseiq, Dahnaq ndaenq lumj saej yaek goenq. De dawz yieng dawz laeuj daeuj daengz henz aen moh doxboh, cuengq sing daej hwnjdaeuj.

Boh a boh,

Doxliz cibgeij bi,

Mbouj nyi sing raen naj,

Mwngz gaenq ninz lajnamh.

Boh a boh,

Miz noh mwngz mbouj daeuj,

Miz laeuj mwngz mbouj raen,

Gou ndaenq yaek vut mingh.

Dauq ngeix cib bi gonq,

Gou ndonjndej deuz biengz,

Vunz liz sim hix siengj,

Siengsim vunz mbouj rox.

Cien loeng caeuq fanh loek,

Goek rag youq ndang gou,

Dwg mou rox dwg gaeq,

Coq daeh dawz bae gaj.

Ngoenzneix gou dauqranz,

Vunzmbanj bouxboux youq,

Raen gyaranz gou byouq,

Meh gaeuz boh mbouj raen.

Lwg mwngz mbouj baenzvunz,

Bae mbiengj mbwn gag youq,

Ce bohmeh mbouj guenj,

Dajsuenq dai roengz namh.

Gou daeuj daengz ndaw bya,

Youq doiqnaj aen moh,

Caeq laeuj youh caeq noh,

Mbouj raen boh daeuj gwn.

Yied ngeix yied raen ndaenq,

Daej gaeklaenz ngve’ngve,

Boh dai lij lix meh,

Mbouj cuengq de lanzcienh.

Mbwn fonxfubfub, mbouj dauq- bae mbouj ndaej lo, Dahnaq youq doiqnaj aen moh daxboh baiq le geij baez, yamq din sam ngeux gyaeuj baema ranz.

（sat）