Ndwensam mbwn raeuj bak va hai,

“Songhoih” daibyauj comz gingsingz,

Caez ngeix saeh hung vih beksingq,

Cauhfuk lajbiengz cingz laeg haij.

Vamak valeiz hai muenx da,

“Yinzda”、“cwnghez” gingsingz hai,

Caez yaeng saeh ndei vih vunzlai,

Daihgya sim’angq youh diuqfoux.

Byaifaex roegciu heuhcaca,

Yinzda daibyauj lwnh minzcingz,

Fanjyingj minzeiq caeuq guekcingz,

Nyi sing betfueng maeuz fathoengh.

Roegciu ciengq rwenz youh diuqfoux,

Ngeix dingh saeh hung youh senjgij,

Senj bouxvunz ndei daeuj dazroen,

Vih gyoengq lwgminz maeuz vuenyungz.

Roegciu ciengqgo gacak eu,

“Songhoih” ciuhai vih lwgminz,

Gaxgonq gyoengqdou hoj youh gungz,

Seizneix cin raeuj vagim doh.

Daengx bya daengx ndoi bak va hai,

Miz cai miz nanh cin youh ngaz,

Seizneix caezgya couh lumj faz,

It sim doxgiet gauj fazcanj.

Bak va hai hoengh hom yinx mbaj,

“Songhoih” heijsaenq lajbiengz cienz,

Cauhfuk lwgminz mauh fanh cien,

Dangj daiq caezgya sij bien moq.