Lij Siujlinz ciuq diegyouq daj- dingq ndaej, daeuj daengz bakdou boux vunz neix, menhmenh bongx lo bongx dou. Hoeng, bakdou caengz hai, caj le 30 geij miux daj ndaw ranz neix cienz daeuj gij sing byaij roen youh mbaeu youh onj. Boux daeuj haidou dwg boux mehmbwk coz youh lengj ndeu, daenj dwk dox, song fwngz lij miz di dumz, youq gwnz ndang de mbouj nanz nyouq ok gij heiq bakcauq. De wnggai couhdwg cawj- ranz ba, boux vunz Lij Siujlinz aeu ra haenx.

Boux mehmbwk neix cim dwk bouxcoz daenj saefug baihnaj, siujsim sisi cam:“Mwngz dwg bouxlawz? Miz saeh lwi?”

“Mwngz ndei, gou dwg boux lauxsae ndeu.” Gangj dwk, de dawz ok mingzben de ndenq hawj mehmbwk. Ciepdwk gangj:“Seizneix miz di saeh gvendaengz lwgmbwk mwngz haeuj hagdangz doegsaw, danghnaeuz fuengbienh, ndaej haeujbae gangj vah ne?”

Mehmbwk fanfoek yawj le mingzben caeuq naj Lij Siujlinz sam seiq baez. Aen coh siujyoz mizmingz neix de hix dingq gangj gvaq, Lij Siujlinz daep dwk nganxgingq, miz laex miz yiengh, mbouj daiq lumj bouxguhyaeuh. Naemj le seiq haj baez cij cingj Lij Siujlinz haeuj ranz. De mbouj siengj loek gvaq moix aen gihvei mizik doiq lwgmbwk de doegsaw, aenvih lwgmbwk couhdwg gij cienzbouh de!

Ranz co mehmbwk dwg youq aen ranzlaeuz ndeu, yienznaeuz aen ranz neix iq lumj fungh rug Lij Siujlinz nei, hoeng giz hix suenq caezcienz: Rug、ding、bakcauq、ranzdajcaemx cungj miz, daengq、daiz、cenjcaz、densi hix baij ndaej caezcingj, youq deihbanj caeuq dingjranz yawj mbouj raen namhfaenx、rongzgyau, henz cueng lij miz geij go va nywj youq laj ndit maj dwk…… Lumj yienghyiengh cungj ndei nei. Lij Siujlinz cazyawj seiqhenz sat, mehmbwk cingj de naengh roengz, gyoengqde couh naj doiq naj caez naengh youq gwnz daengqfaex iq. Mehmbwk neix gingq caz, hai bak cam:“Lij lauxsae, mwngz daeuj gizneix dwg mbouj dwg lwgmbwk gou ndaej haeuj siujyoz sou, roxnaeuz dwg aenvih gizyawz? Danghnaeuz caen ndaej haeuj siujyoz sou, neix caen dwg ndei lai lo.”

“Mbouj loek, gou cingq dwg vih saeh neix daeuj.” Lij Siujlinz daj ndaw bau dawz ok mbaw ceij ndeu, neix couhdwg mbaw luzcij dunghcihsuh Namzbaek Seilaeb Siujyoz. Aen siujyoz neix youq daengx swngj mbouj suenq okmingz, hoeng youq si neix dwg aen siujyoz gyae’gyawj mizmingz ndeu, aenvih de ndaej hawj hagseng gij gyauyuz、lauxsae、sezbei ceiq ndei, ndaej haujlai bohmeh gyaez soengq lwg bae doegsaw. Lij Siujlinz naeuz:“Neix dwg luzcij dunghcihsuh lwg- mbwk mwngz, goengheij lwgmbwk mwngz ndaej yozyau dou senj hwnj! Gij cingzcik lwgmbwk mwngz youq youwzyenz ak lai, hagsib ndei, vunz youh gvai.”

Mehmbwk loh ok gij najriu miznaj, de lij gyaep cam:“Seizneix lwgmbwk gou caengz youwzyenz biz- yez, sou baenzlawz seizneix couh daeuj aeu vunz bae yozyau sou ne?”

“Neix dwg aenvih yozyau dou youq bineix miz aen hozdung, couhdwg youq moix dieg lai ciusou lwgnyez ndei. Lwgnyez ndei youh gvai dou couh bae aeu lo. Gienh saeh neix mwngz hix aiq dingq gangj gvaq ba!”

“Dingq gangj gvaq, gou couhdwg mbouj siengj daengz lwgmbwk gou ndaej haeuj Namzbaek Seilaeb Siujyoz sou!”

“Danghnaeuz mwngz mbouj saenq, lij ndaej bae gvanhvangj dou yawjyawj, miz coh lwgnyez mwngz bw!” Lij Siujlinz riuriu gangj, lij lwnh mehmbwk neix lingh gienh saeh ndei:“Aenvih guh hozdung, cienzhag hix mbouj aeu lai, moix aen yozgiz gyau 4000 maenz couh ndaej lo.”

4000 maenz! Seizneix mehmbwk neix ok ndaej hwnj. Dauqdaej seizneix mbouj lumj 5 bi gonq ngamq daeuj gizneix nei, guhhong baeg youh baeg, cienzgoeng moix ndwen cij ngamq miz 2800 lai. Dingqnyi saeh ndei neix, mehmbwk dangyienz aeu gyo’mbaiq boux lauxsae neix lo. Mehlwg song boux vunz caez youq ranz co gwndaenj, couhsuenq boh lwgmbwk aenvih guhhong oksaeh lizhai le, ranz neix lij miz mehmbwk neix dingj dwk. Seizneix couh lumj go’gyaj majhung nei, ginggvaq seizrengx, swnghhoz gyoengqde hix suenq ndaej gvaqbae. Hoeng, mehmbwk neix gij gyaez lwg, mboujdan dwg youq giz gwn caeuq daenj, engq yawjnaek gij sonhag, couh lumj gukmeh ciengx guklwg nei, lwg hag ndei caizhag miz bonjsaeh le cij rox bae najdoiq gij ndwenngoenz daengzcog, mehmbwk neix couhdwg yienghneix naemj. Mbouj nanz lwg- mbwk couh yaek youwzyenz bizyez lo, de hix lumj vunz ndaw singz nei vih lwgnyez haeuj hagdangz simyou, seiz- neix Lij lauxsae daeuj ranz lwnh de gij saeh neix, cingq dwg gyaj hawq ndaej raemxfwn! Da de gaenq ciemhciemh miz di deng raemxda loengh dumz lo, ndang ndwn hwnjdaeuj, rag dwk fwngz Lij Siujlinz, iucingj de itdingh aeu ce roengzdaeuj gwn donq caeuz, naeuz:“Seizneix gou caen dwg sim’angq simhai, caen dwg gyo’mbaiq mwngz lo. Byaek yaek cug lo, couh ce roengzdaeuj gwn caeuz ba!”

Lij Siujlinz nyouq le nyouq, ndaw hoengheiq lij caen miz di heiq hom, hoeng youh miz di mbouj deng. Dwg heiqremj, byaek remj lo! Mehmbwk hix roxnyinh daengz lo, cienq ndang buet bae bakcauq, lau naeuz:“Gangj vah lumz cauj byaek, caen dwg doiq mbouj hwnj ha, Lij lauxsae.”

“Mbouj gvanhaeh. Seizneix hong gou hix guh sat lo, aeu dauqbae lo, sou aeu geiq dwk ciuqseiz bae bauqmingz bw!” Lij Siujlinz cingjleix ndei bau de, ndwn hwnj byaij daengz baihnaj bakdou. Bakdou cix hai gonq lo, yenzlaiz dwg vunz gekleiz bang mehmbwk neix ciep lwgmbwk dauq- ranz lo. Mehmbwk hix ok bakcauq daeuj soengq Lij Siujlinz, raen lwg dauqma, dep daengz henz ndang lwgmbwk, son lwg naeuz:“Dahmeiz, boux neix dwg Lij lauxsae, caeuq Lij lauxsae gangj ‘goodbye’.” Mehlwg song boux caez gangj lo geij baez “goodbye”, da yawj soengq Lij Siujlinz lizbae.

Youq ndaw singyaem “goodbye”, Lij Siujlinz biek le mehlwg neix, roengz laeuz naengh hwnj ci’gyauceh de.

Ci hai bae, rangh neix dwg aen rogsingz. Cij ngamq lizhai ranz mehmbwk, goengloh henz dah, mbawfaex heu caeuq raemxdah seuq youq laj ndit henj banhaemh caez veh ok le fuk dozveh seizhah ndeigyaez, naengh youq ndaw ci couh ndaej caenhcingz bae ngonz gingjsaek ndei neix, bya raemx doxingj, roeghau doxmbin. Lwgda Lij Siujlinz dang- yienz deng gij gingjsaek neix maez lo, sim de youh naemj daengz boux mehmbwk haenx daeuj: Caen dwg dieg ndei ok vunz ndei. Ra boux vunz neix ra ndaej 5 bi lo. 5 bi gonq de fwd aenvih sim mbouj diuq bwt mbouj diemheiq laemx youq gwnz gai, danghnaeuz mbouj miz boux meh- mbwk neix yawjraen de, gibseiz bang de guh simbwt fukdauq, soengq haeuj yihyen, de hix mbouj ndaej lix daengz seizneix, ndigah ngoenzneix de couh laeglemx bang mehmbwk neix soengq lwgmbwk de haeuj aen siujyoz ceiq ndei aen si neix bae doegsaw lo.