Maxfaexcuk doxgaex Boux- cuengh dwg hangh hozdung doxdax dijyuz cienzdoengj ndawbiengz dieg Bouxcuengh gag miz ndeu, gij yiengh guh’angq、yiengh doxdax de haenq- rem yinxvunz, vunzlai cungj gig haengjgyaez, rengzrwd doidoengz minzcuz dijyuz yindung hwngfat, hawj vunzraeuz ndangcangq ndangrengz. Bi 2010, maxfaexcuk doxgaex Boux- cuengh ndaej senj haeux buek daihsam swcigih gaep feih vuzciz vwnzva yizcanj mingzloeg.

Maxfaexcuk doxgaex Boux- cuengh, couh dwg ndwn youq gwnz “max” aeu faexcuk guh baenz haenx doxdax, miz gij eiqsei beij dungxcaiz beij mbeilaux beij lingzgiuj de, youq ranghdieg Namzningz Si Cinghsiu Gih Cangzdangz Cin nem Yungh- ningz、Liengzging daengj riuzcienz. Riuz naeuz, Ciuhmingz satbyai Ciuhcingh ndujdaeuz, bang bing Ciuhmingz deng hoenxbaih ndeu deuzriq daengz rangh Cangzdangz ciengj doxgaiq gaj beksingq, miz boux vunzmbanj heuhguh Lij Valungz ndeu heuhcomz vunz rengzak seiq- henz mbanj daeuj lienh hoenxciengq, aeu faexcuk soek soem guh mid, youq rangh Ndoisamvuengz Cangzdangz dingjhoenx bang bingbaih neix. Daihlaeng vih geiqniemh Lij Valungz, couh ciuqei gij yiengh Lij Valungz aeu faexcuk daeuj lienh bing haenx guh baenz maxfaexcuk, doenggvaq gij hozdung maxfaexcuk doxgaex daeuj geiqniemh boux vunzmbwk neix, doeklaeng couh menhmenh bienq baenz dangdieg caeuq doengh dieg seiqhenz cungj hozdung doxdax dij- yuz ndawbiengz Bouxcuengh yiengh vunzlai saimbwk lauxnyaeq cungj camgya ndeu, moix bi liggaeuq ndwenseiq cobet roxnaeuz ngoenzciet hung hoengh banh. Maxfaexcuk dox- gaex vunzsoq camgya doxdax mbouj hanh, moix ciengz doxdax faen doihnding doihhenj song doih dox- doiq ndwn youq song mbiengj, moix boux vunz gwnz faexcuk cungj baek mbaw geiz ndeu. Bouxbuenq baez vad geiz, song doih vunz couh dieb hwnj gwnz “max”, camca dwk hopngomx diegciengz byaij song hop, baij yiengh doxndei; bouxbuenq caiq vad geiz le, “doxhoenx” couh hainduj lo. Aenvih bouxdoxgaex dwg ndwn youq gwnz maxfaexcuk, song fwngz gaem ganj faexcuk ndaetndi, caenh baengh gencueg roxnaeuz bangxmbaq、caekhaex daengj dieg ndang bae gaex doiqfueng, caen yienj gij dungxcaiz caeuq mbeilaux lingzgiuj bouxvunz bw. Youq ndaw sing gyonglaz gyuk- gyad coenghrengz ndawde, caenhraen song mbiengj bingmax siujsim yukyuk dwk depgyawj doiqfueng, itmienh bauj ndang bingzonj, itmienh ra seizgei bae gaex, muengh dawz vunz doiqfueng gaex roengz “max” bae, itcig gaex daengz doiqfueng mbouj miz vunz ndwn gwnz max- faexcuk le cij ndaej hingz.

Maxfaexcuk doxgaex Boux- cuengh doxdax seiz doiq ciengzdieg iugouz mbouj sang, caenh ra dieg gvangq youh bingz ndeu couh ndaej doxdax. Maxfaexcuk raezdinj iqhung cix mbouj dingh gvigek, itbuen yawj bouxvunz gisuz sugseng cingzdoh roxnaeuz dinfwngz lingzgiuj bae dingh; youq gyaeujgoek giz sam seiqcib lizmij haenx sebbaek gaiq diebdin ndeu, vunz “gwih max” song din dieb gwnz diebdin, song fwngz gaemh “max” byaij, lumj caij maxfaex nei. Maxfaexcuk doxgaex Bouxcuengh doxdax seiz, ngoenzde caemh banh miz cuengq daengdah、foux lungzronggyoij、gvaq hoihmiuh、doiq fwen、yienj heiqgoengsae、diuq fouxnyaebcaz daengj vwnzyiz hoz- dung, mbaenjgouz daengx mbanj ndaw bi rumz dingh fwn yinz, gohaeux fungsou dajciengx ndaej baenz, bingzan vuenyungz, ciengz- mienh hoenghhwd nauhyied.