Ngoenzneix dwg ngoenzndei,

Beixnuengx daeuj doxhoh,

Gwn laeuj youh gwn noh,

Angqfofo gvaq ngoenz.

Lwg nuengx coux bawxmoq,

Lauxgo haq lwg sau,

Daengx boux nyaeq boux laux,

Nauh lumj gvaq ndwencieng.

“Gyoengq beixnuengx baengz- youx, byaek cawj ndei lo, daeuj gwn ngaiz lo——”Boux dajcawj ndeu ndwn youq bakdou ranz Lauxngeih, song fwngz dop bak heuh hwnjdaeuj.

Rog ranz, vunzhek gveujfoed- foed, gyoengqde ngoenzneix cungj daeuj angqhoh Lauxdaih caeuq Laux- ngeih.

Lauxngeih 50 lai bi, naj luenz, miz mumh, miz vah naeuz “namh oem cij hwnj haz, naj ndei cij hwnj mumh”. Lauxngeih naj dwg mbouj ndei, hoeng de ndang ndei, 4 bi seizgan couh laebdaeb miz 3 daeg lwgsai. Lauxgo de caeuq de doxfanj, 4 bi ndawde, laebdaeb miz 3 dah lwgmbwk, seizneix gyoengqlwg gyoengqde cungj majhung lo.

Lwgmbwk maj lumj rangz,

Lwgsai sang gvaq boh,

Mbouj caux gya baenz hoh,

Doiq cojcoeng mbouj gvaq.

Mbwk ngeihcib baenz haq,

Sai ngeih haj baenz coux,

Daxboh muengh dang baeuq,

Daxmeh siengj aeu lan.

Ngoenzneix Lauxdaih caeuq Lauxngeih couh muengh daengz ngoenzndei lo, Lauxngeih coux lwg- bawx, Lauxdaih haq lwgsau, beix- nuengx song ranz doengzcaez cingj laeuj, mwngz naeuz nauhyied mbouj nauhyied, mwngz naeuz angqyangz mbouj angqyangz.

Gienh saeh angq neix gangj daeuj goj raez lo.

Daegdungh dwg daeglwg Laux- ngeih, de youq baihrog dajgoeng haujlai bi lo, bi daengz haemh cij dauqranz baez ndeu, baebae dauq- dauq cungj dwg: Bae boux vunz ndeu, dauq boux dog. De ndaej 25 bi lo, hab aeu yah lo.

Bi’gvaq haemhndaep, gwn caeuz sat le, geij bohlwg naengh gyang ding gangjgoj, Lauxngeih naeuz:“Sou 3 daeg, bouxboux gen hung ga maengh, miz goet miz rengz, seizlawz cij ra ndaej yah dauqranz?

Miz fwen naeuz:

‘Song duz bya rieng nding,

Duz sing (ciengj) duz bae gonq,

Duz bae gonq daengz vaengz,

Duz bae laeng gak raiq.’”

Mehngeih naeuz:“Seizneix aeu boux bawx he mbouj yungzheih, ranz raeuz 3 daeg lwgsai, baenzlawz gangj hix hawj Daegdungh aeu gonq, de dwg lauxdaih.”

Ngoenz co’it, bouxmbanj ceiq maij cunz ranz, ranz gwnz bae ranz laj gangjgoj, ranz gyang bae ranz henz lwnh saeh, miz laeuj gwn laeuj, miz noh gwn noh, ngoenzneix bouxmbanj couhdwg beixnuengx, ranznden couh- dwg caencik, mbouj faen mwngz gou. Mehmoiz ndaw mbanj daeuj daengz ranz Lauxngeih, mehmoiz naeuz:“Mbanjsangh miz dah sau ndeu heuh Dahgvai, ndanggoet nienzgeij caeuq Daegdungh cingq ngamj baenz doiq ndeu, mwngz yungh mbouj yungh gou bae camcam.” Lauxngeih cingq vih gienh saeh neix sieng uk, cien gouz fanh gouz mehmoiz vaiqdi bae cam.

Ndwencieng gvaq mbwn couh ciemhciemh raeuj lo, seiz dajndaem hix yaek haihong, mehmoiz ndaej vah dauq lo.

Mehmoiz naeuz:“Ranz Mbanj- sangh haenx singq Banh, ranz de miz boux sai song boux mbwk, lwgsai Lauxdaih Banh Singhdouj yaek ndaej 40 hix lij caengz miz yah, ranz de naeuz miz haeux guhdoih naengj, miz caengq guhdoih yungh, danghnaeuz mwngz baihneix miz dahsau he hawj ranz de guh lwgbawx, ranz de couh nyienh haq Dahgvai gvaqdaeuj.”

Lauxngeih naemj: Vuenh cwz vuenh vaiz yien cag couh ndaej, vuenh bit vuenh gaeq cang raep couh baenz, hoeng vuenh vunz mbouj yungzheih ha. Engq mbouj yungh gangj de bae gizlawz ra ndaej dahlwg ndeu haq gvaqbae ne?

Lauxngeih cingq nyaeuq naj seiz, mehmoiz lumj rox maz nei vixvix ranz Lauxgo de. Deng lo! Lauxngeih naemj le yaep he, angq dwk gag bekfwngz baez he, riu soengq mehmoiz le doq bae ra lauxgo de lo.

Lauxdaih vunz sang ndang reux, naj loq byom. De vaiz dai gaeu mbouj reuq, meuz roz gyaeuj mbouj roz, laebdaeb miz 3 dah lwgmbwk le, de miz di sim mbouj nyienh, cungj naemj baenzlawz hix aeu seng daeg lwgsai he, gwq ienq mehyah de miz daemz ciengx mbouj baenz bya, miz naz ndaem mbouj ndaej haeux, baenzlawz hix seng mbouj ndaej lwgsai daeuj.

Dah lwgdaih Lauxdaih heuh Dahnaq, bineix ngeihcib seiq、haj, de naj maeq ndang luenz, gyaeundei dangqmaz. Seizneix lwg maj baenz sau, rangz laux baenz faex lo, hoeng miz lwgmbwk gyang ranz, mbouj miz gvan daeuj boiq, 3 dahlwg cungj mbouj caengz miz cawj.

Ngoenzngoenz bae aeu nywj,

Ciengx cwz rox ciengx vaiz,

Nyaz loeg doeng caengz gai,

Lauheiq dai laj riengh.

Gienh saeh neix, Lauxdaih sieng gvaq mbouj noix ukgyaeuj.

Ngoenzneix, Lauxngeih naj riu- nyumnyum hwnj dou daeuj, Lauxdaih mbouj naemj hix rox miz saehndei, Lauxngeih doiq Lauxdaih naeuz baenzneix baenzneix, Lauxdaih dingq le, hix bekfwngz hwnjdaeuj, daengx naj hai riu.

Ngoenz he haetromh, ndaw rungh mok haet lij caengz sanq, vunz ranz Banh couh daeuj daengz ranz Lauxdaih camyah. Ranz Lauxngeih hix baij vunz bae ranz Banh camyah, couh yienghneix, song mbanj sam ranz gap baenz caen lo.

Gofaex youq gyang ndoeng,

Faenz roengz couh baenz yungh,

Ngoenzneix ciengx lwg hung,

Gap gyoengq guh ranz ndeu.

Rog ranz, bauqrengh yiengj ndaej bibi baba, beixnuengx caencik mbouj dingz mbouj duenh, ranz Lauxngeih roq gyong daj laz, ranz Lauxdaih caimax gwn laeuj.

Dahnaq boux ndeu ndoj haeuj ndaw rug bae, yaek gangj gangj mbouj ndaej, yaek daej daej mbouj ok, de dailix mbouj siengj haq hawj Banh Singhdouj. Seizneix godangz yaek aeu bawx, de aeu haq bae ranz Banh. Caen dwg heuh mbwn mbwn sang、heuh namh namh laeg, mbouj rox baenzlawz guh ndei.

Lwg byag meh okdou,

Daej ndang fouz ndang naet,

Lwg lumj gaiq sauqbaet,

Duzmaet hix mbouj lah.

Lwg byag meh roengz lae,

Daej da foeg da gawh,

Mbouj dwg lumj bae haw,

Youz mbawq(mbwq) le couh dauq.

Dahnaq doq daej doq yamq sang yamq daemq gaen vunzlai bae ranz Banh.

Dahnaq youq ranz Banh Singh- douj ndaej 3 ngoenz lo, geij ngoenz neix Dahnaq ngang dangqmaz, Banh Singhdouj mbouj gamj gaenh de.

Ciuq sibgvenq, daengz ranz gvan 3 ngoenz le couh aeu dauq ranzmeh baez ndeu, Dahnaq angq lumj duzroeg ok rongz nei, caeuxcaeux couh sousib doxgaiq, ngaiz hix mbouj gwn couh okdou.

Seizhah haetromh, raemxraiz gig naek. Dahnaq boux dog byaij youq gwnz roen bya, din vaq dumzcatcat liux, yamq din naek lumj ga venj rin nei. De naemj: Banh Singhdouj nienzgeij laux mbouj youqgaenj, hoeng de vunz gik youh ngah laeuj lumj mingh, baenzlawz hix mbouj ndaej haq hawj ndaek vunz neix.

Dahnaq naemj dwk naemj dwk, daeuj daengz henz goengloh lo, seizneix cihek cingq daeuj daengz, de mbouj caiq ngeix saek yaep couh hwnj ci bae.

Gangj daeuj hix ngamjhab, seizneix vunzmbanj cingq nyaengq ndaemcin, Dahgvai daj dauqbae ranzmeh le, hix mbouj raen caiq dauq. Lauxngeih couh bae cam Lauxgo Dahnaq dauq gvaq ranzmeh mbouj caengz, song beixnuengx doxcam vah caengz gyoet, vunz ranz Banh hix daeuj ra Dahnaq lo.

Daihgya cungj geizheih lo, Dahnaq daj roengz lae ngoenzhaenx couh mbouj raen dauq gvaq, seizneix ranz Banh dauqdaeuj ra vunz? Dauqdaej dwg gyoengqde daeuj ra raeuz aeu vunz roxnaeuz raeuz bae ra gyoengqde aeu vunz ni?

Saehcingz miz di doxgveuj lo, Dahnaq mbouj dauq ranz Banh, Dahgvai hix mbouj dauq ranz Daegdungh, song ranz vunz couh yienghneix doxdingj dwk.

Bi ndeu gvaqbae, song bi gvaq- bae, sam bi gvaqbae…… Dahnaq lix mbouj raen vunz, dai mbouj raen goet. Daegdungh caeuq Dahgvai hix mbouj caiq baenz gvanbaz.

Dahnaq bae gizlawz? Mbouj miz vunz rox, boh de Lauxdaih engq mbouj rox. Caen dwg:

Lwg iq muengh lwg hung,

Lwg baenz lungz miznaj,

Lwg laux mbouj dingqvah,

Vaih faj naj bohmeh.

Laeuj noh hix gwn gvaq,

Gyaqcang hix caux caez,

Ngoenzneix lwg mbouj bae,

Saetlaex yaek dai vunz.

Gou mbouj miz lwgsai,

Hai lwgmbwk bae vuenh,

Boh cien suenq fanh suenq,

Lwg dauq haih bouxlaux.

Caez guh vunz laj deih,

Mbouj heiq daenj heiq gwn,

Guhdoih youq lajmbwn,

Mbouj lumj vunz lumj duz.

Ngoenz ndeu, Lauxdaih sousib doxgaiq, boux ndeu okdou bae lo, vunzmbanj cungj laihnaeuz de bae dajgoeng, couh mbouj miz vunz dawz haeujsim lo.

（caengz sat）