Byaij haeuj gij mbanj Sanh- gyangh Dungcuz Swciyen, ndaej roxyiuj gij fungcingz minzcuz naek- gywg le, vanzlij ndaej yawjraen cungj citheiq minzcuz vunznoix daegbied ndeu——Heiqdung, cungj heiq deihfueng cienzdoengj neix, vunzlai Dungcuz cungj gyaez dingq haengj yawj, ndaej naeuz dwg “duj va lwenqda geizheih yisuz ndaw lueg- bya” ndeu. Bi 2011, Heiqdung Sanhgyangh dangguh hanghmoeg mbe’gvangq citheiq cienzdoengj, ndaej lied haeuj buek daihsam guekgya gaep feih vuzciz vwnzva yizcanj mingzloeg.

Heiqdung youq Ciuhcingh seiz Gyahging couh hainduj miz, faen gij diuzheiq lwnh saedceij Bouxgun caeuq diuzheiq lwnh saedceij Dung- cuz song daihloih. Heiqdung Sanh- gyangh dwg daj Gveicouh riuzcienz gvaqdaeuj, aeu ciengq lwnhsaeh guhcawj, aeu gij gangjbeg daegdied gag miz guhbouj, diuqciengq diuq- wenq caenh miz song coenz, swz- ciengq daep haeuj song coenz neix couh ndaej fanfoek yienjciengq. Gij gvaengh aeu caizliuh de gvangqlangh, nangq daengz cwngci、ginghci、vwnzva、leixdauh、daudwz daengj. Heiqdung cienzdoengj, hainduj caenh miz song bouxyienj youq gwnz daizheiq naenghciengq, gvaqlaeng riengzdwk gij cingzciet gojgaeq biujyienj haenx ciemhciemh fukcab, hwngfat daengz ndwn dwk roxnaeuz byaij dwk “cih 8 vang” ciengq; seiz yienjciengq, youz boux saefouh heiq “gaembouh” ndeu naengh youq baihlaj daez vahheiq, bouxyienj yienjciengq coenz ndeu sat, yozdui couh ndaekroq duenh yaem’wenq ndeu gvaqmonz, hawj bouxyienj ndaej dingq rox coenz vahheiq baihlaj daez haenx. Saefwen roxnaeuz saeheiq (dangq boux bienheiq) diegvih youq heiqban ceiq sang, gyoengqde cungj rox bien heiq, gij swzgo bien okdaeuj ciengq dawzbak sebseb, ndigah ciengzseiz ndaej aen heiqban wnq cingj bae guh “saefouh” bangcoengh. Gij yozgi cienzdoengj Heiqdung hainduj caenh miz aen ngeihyienz ndeu, caiq miz laz、gyong、ca buenx roq; cix mbouj miz gij hangzdangq dingh de, caenh miz giekcouj haemq daegbied, gijdoengh vadgei mizyinx, sing gangjbeg geizgvaiq. Cungguek moq laebbaenz gvaqdaeuj, souh gij citheiq Bouxgun caeuq gij heiq deihfueng wnq yingjyangj, Heiqdung youq biujyienj hingzsik、yaem’wenq diuqciengq、ndangdaenj hongdawz daengj fuengmienh cungj miz hwngfat moq, rox ciuq gij cingzciet citheiq hwngfat yaekaeu bae vehnda gij- doengh, supaeu gij yamqdin daizheiq、ndangdoengh Bouxgun caeuq gij minzcuz wnq, haeujsim cangnaj、cangndang caeuq ndagingj, caemh- caiq mbeilaux yinxhaeuj le gij diuqciengq golaux Dungcuz、go bizbaz、go gimzgavaiz、go caijdangz、fwen daengj, yozgi caemh demlai le aendig、aenvenz、bizbaz、gimzgavaiz daengj; seizgan biujyienj caemh daj gaxgonq cit heiq ndeu yienj baenz caet bet ngoenz sukdinj daengz sam seiq ngoenz caiqlij geij diemj cung couh yienj sat, rengzhoengh biujyienh de engq yienhda. Miz Heiqdung le, vunzlai Dungcuz cungj gig haengj- gyaez, riengjret gvangqlangh dwk youq doengh dieg Dungcuz cienzdoh. Daengz seizneix, Heiqdung diuzheiq moq gaeuq gaenq miz baenz 400 lai aen, gij diuzheiq haemq okmingz haenx miz 《Cinz Niengzmeiz》《Mangjswj》《Fujguenh》《Meidauz》daengj.

Youq doengh dieg Mbanjdung, mbanjmbanj cungj miz heiqban, gvaq cieng gvaq ciet, mbanj caeuq mbanj doxcaez doxgyau yienjok, doxdax doxhag banjdaeuz yienjheiq, aeu ndei bouj yaez. Daegbied dwg moix bi seizcouh dajsou sat roxnaeuz ngoenz- ndei angqhoh, Heiqdung yienj ndaej engq hoengh, ndaw mbanj gyonglaz gyukgyad, sing fwen sing riu mbouj dingz, nauhyied dangqmaz.