Gaxgonq miz boux sai ndeu, coh de heuhguh Daegsae. Ciuh goeng ciuh boh Daegsae dwg bouxmiz, hoeng, daengz ciuh Daegsae couh hoj lo. De ndaem maz mbouj baenz maz, ciengx maz mbouj ndaej maz, saedceij hoj lai raeuh. Vahgeq naeuz fouqmiz mbouj gvaq sam daih, caen dwg dahraix bw.

Daegsae 8 bi dai meh, 10 bi dai boh, baenz boux lwggyax ndeu. De 30 bi le, lij caengz aeu ndaej yah. Gyoengq doengzdoih de gaenq baenz- ranz miz lwgnyez lo, cij miz de haeujok cungj dwg bouxdog ndwi. Aen ranz de youq lijdwg ranz namh, aenvih nanz mbouj ndaej coih, aen ranz youh rwix youh cumx. De yawj gij ndwen- ngoenz cihgeij gag youq ndawsim danqheiq naeuz: Gou caen siliengz, mbouj miz saekdi fukheiq lawz!

Miz ngoenz ndeu, Daegsae byaij daengz gyaeujmbanj, raen boux dahsau nomjoiq caemhcaiq gyaeundei he, hoeng de damengz. Daegsae byaij gvaqbae cam de:“Mwngz naeuz fukheiq dwg maz?” Dahsau neix dap naeuz:“Ciuhvunz gou cungj dwg youq ndawlaep, doiq gou daeuj gangj, da gou yawj ndaej raen doxgaiq, neix couhdwg fukheiq ceiq hung gou lo.” Daegsae ngaekngaek gyaeuj, byaij deuz lo.

De byaij ok mbanj bae, raen gyangdoengh miz gofaexdauz ndeu, de byaij gyawj cam gofaexdauz:“Mwngz naeuz fukheiq dwg maz? Gofaexdauz dap naeuz:“Ndaw namh laj goek gou miz goenj rin hung ndeu, dangj gij rag gou, rag gou mbouj ndaej cwxcaih iet, gutgungq baenz gaemz dog, mbouj ndaej supsou gij yingzyangj lai, loengh dwk gou cij rox hai va, mbouj rox giet- mak. Danghnaeuz gou rox hai va youh ndaej gietmak, gou couh roxnyinh gou miz fukheiq lo.” Daegsae dingqnyi gofaexdauz baenzneix gangj, hix mbouj gangj maz, youh byaij deuz lo.

Daegsae byaij hwnj bya bae, raen dingjbya miz duz nuem hung ndeu, de gvaqbae cam duznuem:“Mwngz naeuz fukheiq dwg maz?” Duznuem neix dap naeuz:“Gou youq gwnz bya neix mulienh cibgeij bi lo, lij caengz lienh baenz duzlungz. Baenzlai bi daeuj, gou mbouj gwn gvaq boux vunz he, hix mbouj sienghaih gvaq doenghduz he. Hozhawq le gou couh gwnz raemxraiz, dungxiek le gou couh gwn nywjnyaj. Danghnaeuz gou ndaej bienqbaenz duzlungz, gou couhdwg miz fukheiq lo, daengz seizhaenx gou couh haiz ok naed cawbauj ndaw dungx gou gung hawj vunzlai.” Daegsae lumj dingq ndaej rox nei lizbae lo.

Daegsae maranz le gag naemj: Gij fukheiq caezgya cungj mbouj miz byawz doxdoengz, maz doiq gou daeuj gangj dwg fukheiq ne? O, gou rox lo. Danghnaeuz gou miz ranz、miz yah, ndaem maz ndaej maz caemhcaiq ciengx maz baenz maz, gou hix dwg boux miz fukheiq ndeu. Baenzneix siengj le, de gietdingh okbae ra fuk- heiq.

Daegsae bae lwnh hawj goeng ceiq laux ndaw mbanj, naeuz de yaek okrog bae ra fukheiq. Goenglaux dingq le daej mbouj dwg riu hix mbouj dwg, naihsim dwk naeuz Daegsae:“Fukheiq mbouj dwg ra ndaej nw! Fukheiq dwg guh okdaeuj ne!” Daegsae geiz- heih dwk cam Goenglaux:“Fukheiq dwg guh okdaeuj? Baenzlawz guh?” Goenglaux dap naeuz:“Lai guh saeh- ndei, fukheiq couh gag daeuj lo.” Daegsae dingq le moengjmoengj doengjdoengj, vihmaz lai guh saehndei couh miz fukheiq ne?

Hoeng de lijdwg dingq gij vah Goenglaux. Daj seizhaenx hwnj, ndaw mbanj miz hoengzsaeh begsaeh, Daegsae cungj bae bangfwngz; miz vunz guh ranz, de couh bae bang hong; mwh ndaem mwh sou, de couh bae caeuq vunzmbanj caemh guh. Sam bi gvaqbae lo, saedceij Daegsae lij lumj yiengh gaeuq nei. De youh bae cam Goenglaux:“Goenglaux ha Goenglaux, saehndei gou guh gvaq haujlai lo, hoeng, fukheiq vihmaz lij caengz daeuj ni?” Goenglaux riu “ho ho” naeuz:“Mwngz guh saehndei cungj siengj aeu bauqdap, neix mbouj dwg caensim caen’eiq bae guh saehndei bw! Baenzneix fukheiq mbouj rox daeuj.” Daegsae dingq le miz di najmong lo.

Ngoenz ndeu, Daegsae hwnj bya bae ra duznuem, doiq de naeuz:“Duznuem ha, naed cawbauj ndaw dungx mwngz ce youq ndaw dungx hix mbouj miz yungh, mboujyawx haiz okdaeuj ba, raeuz dawz bae gai aeu ngaenz, dawz ngaenz daeuj vih vunz- mbanj guh di saehndei, lumjnaeuz coih roen、guh giuz、 mbwt cingjraemx、daengj hagdangz daengjdaengj, baenz lwi?”Duznuem neix ngeixngeix, rox- nyinh Daegsae gangj ndaej deng, couh haiz naed cawbauj ndaw dungx de ok bak lo.

Naed cawbauj neix caen dijbauj dahraix, gai ndaej haujlai ngaenz. Daegsae dawz gij ngaenz gai ndaej guh gij saeh de gaxgonq coh duznuem dwen daengz, vih vunzmbanj coih roen、 guh giuz、daengj hagdangz, lij youq gyang mbanj mbwt aen cingj- raemx ndeu. Daj seizhaenx hwnj, gyoengq vunzmbanj ok mbanj couh miz roen, mbouj aeu byaij roen- saejgaeq lo, gvaq dah mbouj aeu vaijraemx lo; lwgnyez ndaw mbanj youq henz ranz couh ndaej doegsaw, mbouj aeu hwnq rongh bin bya byaij gyae bae hagdangz; vunzmbanj mbouj aeu bae gizgyae rap raemx daeuj gwn lo.

Gyoengq vunzmbanj caeuq mbanjnden cungj haenh Daegsae simndei, caemhcaiq docih de raixcaix. Caezgya lij naeuz:“Vunzndei mbwn hoh.”

Caiqnaeuz, duz nuem hung haenx baez haiz ok naed cawbauj ndaw dungx le, mbouj geij nanz, de couh bienqbaenz duzlungz lo, mbin hwnj gwnz mbwn bae lo.

Ngoenz ndeu, Daegsae fwd siengj daengz gofaexdauz rox hai va mbouj rox giet mak. De dawz gvak bae mbwt goenj rin hung laj goek dangj rag haenx, mbwt le sam ngoenz sam hwnz cij dawz goenj rin hung okdaeuj. Daegsae dawz namh caeuq aeu bwnh bae moek goemq dauq, lij rwed raemx hawj gofaexdauz dem. Bihaenx gofaexdauz ndaej gietmak lo, caemhcaiq lij bienqbaenz go faex sien ndeu.

Daegsae dingq vunz naeuz miz boux canghyw ndeu, rox yw damengz, de ok ngaenz bae cingj canghyw daeuj yw dahsau damengz gyaeujmbanj de bungz. Canghyw yawj gvaq fouq da dahsau le, hai ywdoj hawj de. Daegsae ngoenzngoenz bae bang dahsau damengz baek yw, dahsau gwn 49 ngoenz yw le, da de caen yawj ndaej raen doxgaiq dahraix, de angq dwk mbouj miz maz beij ndaej hwnj. Youq gij ngoenz caeuq Daegsae doxyouq, de deng gij simndei Daegsae dajdoengh, doeklaeng de couh haq hawj Daegsae guh yah lo.

Gwn raemx mbouj lumz boux mbwt mboq. Duznuem ndaej bienq- baenz duzlungz le couh soengq aen ranz moq ndeu hawj Daegsae, godauzsien soengq cwz caeuq vaiz hawj Daegsae. Dahsau haenx caeuq Daegsae caemh gvaq ndwenngoenz, songde ndaem maz ndaej maz, ciengx maz baenz maz. Daegsae yawj gij saedceij cihgeij, ndawsim diemz- subsub, de gag daengq: Lai guh saehndei, laebdaeb guh roengzbae, lij aeu ciuhlaeng cienzswnj roengzbae, baenzneix fukheiq gag rox ra daeuj bw!