Sai:

Okdou mbouj deng seiz,

Mbouj meiz(miz) duzroeg gvaq,

Gou bae cang vangx caj,

Roeg mbouj gvaq saek duz.

Mbwk:

Gizde mbouj miz faex,

Mwngz cung bae couh cang,

Mbouj miz roeg haeuj vangx,

Dangyienz gaemh mbouj ndaej.

Sai:

Cang vangx laj godeiz,

Mbouj meiz(miz) duzroeg gvaq,

Cang vangx laj gocaq,

Roeg mbouj gvaq saek duz.

Mbwk:

Gyang ndoi miz goreiz,

Meiz(miz) roeg daeuj douh lai,

Dinbya miz goraih,

Roeg mbin baihneix daeuj.

Sai:

Cang vangx laj goleiz,

Caemh mbouj meiz(miz) roeg ai,

Cang vangx laj gogaiz,

Roeg mbouj daeuj naiq raeuh.

Mbwk:

Roeg youq gwnz goreiz,

Mbouj ei vah gou cang,

Roeg youq laj go’gvang,

Mwngz youh cang gizwnq.

Sai:

Roegfek cang mbouj ndaej,

Roeggae mbouj dawz vangx,

Gou aeu faz bae cang,

Mbouj saenq vangx mbouj ndaej.

Mbwk:

Roegfek rox roeggae,

Mwngz cungj naeuz bae cang,

Dangh roeg mbouj haeuj vangx,

Bae cang sai doegrengz.

Sai:

Mingh gou mbouj baenz mingh,

Cingq cang mbouj ndaej roeg,

Guh yienghyiengh cungj loek,

Coegcamz gvaq ciuhvunz.

Mbwk:

Baezneix couh roxhit,

Itdingh aeu haeujsim,

Roeg youq laj gorimh,

Cim ndei cang couh dawz.