Da muengh gij ngaeuzlaeng Huz Sunghyiz ciemhciemh siusaet youq gyaeujgai, Gauh Sanhsanh ngaez lumj gofaex nei dinghdingh ndwn youq gizhaenx, raemxda lumj naedcaw daj song mbiengj gemj hausek lae roengz- daeuj.

Haemhhaenx, Gauh Sanhsanh gag boux ndeu ma daengz suzse, siengj hwnj gij cingzgingj haxbaenh, de baenzlawz hix ninz mbouj ndaek, de roxnyinh Huz Sunghyiz caeuq Fangh Meijnaz gvanhaeh gig mbouj itbuen, lumj lij miz maz saeh muenz de dem. Huz Sunghyiz daj seizlawz caeuq Fangh Meijnaz ndei hwnjdaeuj ne? Gyoengqde dauqdaej miz maz gvan- haeh ne? Gauh Sanhsanh yied naemj sim yied luenh, yied naemj yied ninz mbouj ndaek, mbouj roxnyinh seizlawz ranz couh rongh lo. Aenvih haemh- lwenz mbouj ndaej laep lwgda ninz saek yaep, ranzrongh seiz Gauh Sanhsanh moengjmoengj doengjdoengj couh ninzndaek bae lo. Caj daengz 7 diemjcung nauhcung baez yiengj, Gauh Sanhsanh nunu lwgda baez yawj, hwnjban gaenq ganj mbouj ndaej gib lo, de cijndei daj dienhvah bae gunghswh coh lingjdauj cingjgyaj ngoenz ndeu, ciepdwk youh laep lwgda ninz lo.

Couh youq Gauh Sanhsanh ninz ndaej gig vandiemz seiz, sawqmwh dingqnyi baihrog miz vunz roq dou, de gig mbouj cingznyienh daj gwnz congz ruenz hwnqdaeuj haidou. Baez haidou raen dwg Huz Sunghyiz, Gauh Sanhsanh ndatheiq lo, de cienqndang couh yaek gvendou hwnjdaeuj. Huz Sunghyiz lienzmuengz lanz dwk, de yienh ndaej miz di mbouj ndei eiqseiq naeuz:“Sanhsanh, hawj gou yiengq mwngz gejnaeuz cingcuj ba, mboujnex yienghneix bouxboux cungj mbouj ndei gvaq.” Huz Sunghyiz haeujbae naengh roengzdaeuj, ndoet cenj raemx ndeu, yienzhaeuh diemj ci ien ndeu cit hwnjdaeuj.

Muengh gij hoenzien geujneuneu yied sanq yied gyae, Huz Sunghyiz haibak gangj lo. “Sanhsanh, gizsaed mwngz hix rox, duenh seizgan neix daeuj gou itcig ra mbouj ndaej hong, ndawsim gig mbouj ndei gvaq. Ngoenz- lwenz mbwq lai okbae guhcaemz seiz dingjlingz bungzraen Fangh Meijnaz. De rox daengz gij cingzgvang gou le couh doiq gou naeuz, de caeux couh gyaez gou lo, cijaeu gou caeuq mwngz faenbiek, de couh gaisau gou bae gunghswh daxboh de hwnjban. Sanh- sanh, raeuz song boux daj iq couh guhdoih ndei, gou baenzlawz sij ndaej caeuq mwngz faenbiek ne? Gou sijsaeq naemj gvaq lo, Fangh Meijnaz boux mehmbwk neix ndawranz yienz- naeuz gig miz cienz, hoeng hix vasim dangqmaz, raen boux gyaez boux. Seizneix raeuz song boux sien camh- seiz faenbiek, gou gyajcang caeuq de doxndei, gvaq song sam bi rom ndaej cienz lai le raeuz couh doxaeu.”

“Gijmaz, mwngz seizneix mbouj dwg gangj vahloq ukgyaeuj hix mbouj miz maz vwndiz ba Huz Sunghyiz, gij vah neix mwngz baenzlawz couh gangj ndaej ok bak daeuj ne? Mwngz seiz- neix ra mbouj ndaej faenh gunghcoz ndei he, mbouj daibyauj ngoenzcog hix ra mbouj ndaej, miz maz sinhoj raeuz song boux caez bae dingj. Guh maz saeh itdingh aeu naemj cingcuj caiq bae guh, mboujnex couh ienqhoij mbouj gib lo.” Gauh Sanh- sanh lumj mbouj roxnaj Huz Sunghyiz nei gangj.

“Gou gaenq dapwngq Fangh Meijnaz lo, singhgiz laeng couh bae gunghswh daxboh de hwnjban. Sanh- sanh, cingj mwngz saenq gou, gou dwg caensim gyaez mwngz, gou yienghneix guh hix dwg vihliux raeuz song boux ndei!” Huz Sunghyiz gangj sat couh got Gauh Sanhsanh.

“Mwngz seizneix liz gou gyae di, gou mbouj siengj dingq gij vah neix, hix mbouj siengj caiq raen mwngz!” Gauh Sanhsanh sing hung swenj hwnjdaeuj, yunghrengz fid Huz Sunghyiz deuz, yienzhaeuh nyoengx de okdou bae doq gvendou hwnj- daeuj. Huz Sunghyiz gip ndaej youq rogdou youh bongx youh heuh, hoeng faj dou neix caiq hix mbouj vih de hai lo.

Caj Huz Sunghyiz deuz le, Gauh Sanhsanh nyaenx mbouj ndaej raemxda youh lae lo, de naemj mbouj doeng, Huz Sunghyiz vihmaz bienq- baenz yienghneix? Dwg mbouj dwg aen seiqgyaiq neix hawj vunz bienq ndaej daiq vaiq daiq yienhsaed lo, ngaenzcienz gaenq bienq ndaej beij cingzngeih engq naek? Gauh Sanh- sanh nyaenx mbouj ndaej dauq geiq gaxgonq, geiq ndaej gij cingzgingj gyoengqde song boux doxndiep dox- gyaez, gij cingzgingj hawj de baenz- lawz hix mbouj ndaej lumz. Dangh- naeuz seizgan ndaej lae doxdauq ma daengz gaxgonq geijlai ndei ha, Gauh Sanhsanh cingznyienh seizgan ciengxlwenx dingz youq gizhaenx.

Gauh Sanhsanh yied naemj yied siengsim, de daj ndaw doengjgvih dawz aen hab iq ndeu okdaeuj, yienzhaeuh menhmenh dajhai, ndawde cingqdwg aen goenhnyawh he geij bi gonq haemh ronghndwen ronghsag Huz Sunghyiz soengq hawj de. Gauh Sanhsanh dawz aen goenhnyawh neix gaenjgaenj depgaenh youq najaek, mbouj roxnyinh seizlawz couh ninz- ndaek bae lo.

Lajbyonghngoenz Gauh Sanhsanh ndiu daeuj sikhaek dajcaemx, daj- suenq okbae guhcaemz gaijheiq. Yaek okdou seiz, de byaij daengz gyaeuj- congz aen gingq hung haenx, sijsaeq yawj le yawj swhgeij, saeknaj yienh ndaej miz di hauheu, lwgda hix miz di ndaemfoeg. Gauh Sanhsanh cengq- gengz doiq swhgeij riu le riu, cienq- ndang beq aen daeh couh okdou bae lo.

“Gauh Sanhsanh, mwngz ndei ha, cang baenz lengj yaek bae gizlawz ne? Mbouj dwg youh caeuq daegmbauq lawz okbae damz cingz gangj gyaez ba?” Gauh Sanhsanh ngiengx gyaeuj baez yawj, raen dwg Fangh Meijnaz, de miz di hozndat naeuz:“Gou seizneix mbouj miz seizgan caeuq mwngz gangj gij vahhoengq neix, cingj mwngz lizbae!”

“Gauh Sanhsanh, gou seizneix hix vahsaed lwnh hawj mwngz nyi, danghnaeuz mbouj dwg vihliux Huz Sunghyiz, gou di he hix mbouj siengj daeuj daengz aen dieg naeuh neix, gizneix dwg 10 fanh maenz ngaenz, daj ngoenzneix hwnj, mwngz caeuq Huz Sunghyiz di gvanhaeh he cungj mbouj miz lo, mwngz ceiqndei gaej bae ra de!” Fangh Meijnaz doq gangj doq daj ndaw daeh mbon ok dab cienz na- nupnup ndeu okdaeuj ndenq hawj Gauh Sanhsanh.

“Doxgyaez mbouj dwg guh seng- eiq, mbouj dwg aeu ngaenzcienz couh rox cawx ndaej, danghnaeuz yienz- faenh sat le couh faenbiek, mbouj miz byawz vih byawz cengqgengz ce roengzdaeuj, gou caeuq Huz Sunghyiz hix doxdoengz!” Gauh Sanhsanh heiq gip lo, swnhfwngz couh dawz dab cienz haenx boemz youq gwnznamh.

（caengz sat）