Geij bi neix daeuj, Vanzgyangh Mauznanzcuz Swciyen gaenxmaenx haiguh Cuengh Gun song vah saw sonhag hozdung, yungh lai cungj banh- fap doicaenh hwnjguh dieg guhyiengh sonhag “Cuengh Gun song vah saw”, gungganq le buek vunzcaiz minzcuz vunznoix Cuengh Gun song vah saw cungj rox he, vih daezsang minzcuz suciz、gyalai minzcuz doxgiet、swnjcienz caeuq fatyiengz minzcuz vwnzva、coicaenh dieg comzyouq minzcuz vunz- noix ginghci ndawbiengz hwngfat guh- ok gungyen.

It dwg daengxcungq son’gyauq, daezsang gij suijbingz lauxsae sonhag song vah saw. Hengzguh gij dajveh son- gyauq daengxcungq, binaengz miz muzdiz、miz dajveh anbaiz lauxsae song vah saw camgya song vah saw yezvu son’gyauq, doenggvaq son’gyauq, lawhmoq gyauyuz gvanhnen, gaijgwz sonhag vunqsik, daezsang sonhag caetliengh.

Ngeih dwg dungjcouz gviveh, laeb ndei aen gihci sonhag song vah saw caeuq hwnjguh gihci. Hableix baijbouh dieg guhyiengh sonhag song vah saw, cingjhab gij rengz lauxsae song vah saw, gaijndei gij swhyenz sonhag, ciuq bi- ndwen caeuq daegdiemj vahgangj hagseng hailaeb dangzgoq song vah saw, gohyoz anbaiz dangz song vah saw. Laebguh song vah saw sonhag bingzgyaq gikcoi gihci, gujli lauxsae gaijgwz son- hag vunqsik, gaijndei sonhag fuengfap, haifat dungxcaiz hagseng, daezsang gij naengzlig hagsib.

Sam dwg gyagiengz sonyinx, daezswng song vah saw caetliengh, youq yen gyauyenzsiz caeuq aen cungsim hagdangz dieg guenjleix boiq hawj song vah saw sonhag conhciz gyauyenzyenz, fucwz guenjleix ngoenznaengz sonhag song vah saw, yen minzyijgiz ganbu giemnyaemh guh gyauyenzyenz, bang conhciz gyauyenzyenz cujciz haiguh gyauyenz hozdung, haiguh goqdaez yenzgiu, doigvangq gyauyenz cingzgoj.

Seiq dwg ngaenzcienz baujcang, bangrengz hwnjguh dieg guhyiengh. Binaengz, yen caizcwng bued cienz cienhangh yungh daeuj hwnjguh dieg sonhag song vah saw, doengzseiz, ceng- aeu gaep baihgwnz ngaenzcienz haeuj- coengh, bi 2016 Vanzgyangh ndaej Swcigih Gyauyuzdingh gvihaeuj daengx gih 9 aen “dieg samgak” guhyiengh song vah saw caeuq 6 aen hwnjguh dieg sonhag song vah saw, binaengz ndaej ngaenzcienz haeujcoengh 60 fanh lai maenz, bangrengz dajcauh daengx gih sonhag song vah saw、song vah saw yenzgiu、song vah saw hozdung、son- gyauq song vah saw、song vah saw yaubwnj gocwngz haifat caeuq swnjcienz minzcuz vwnzva daengj 6 aen dieg hwnjguh moegbiu.

(Mungz Siyiz)